तनहुँ– नेपाली कांग्रेसका वरिष्ठ नेता रामचन्द्र पौडेलले देशको हितलाई केन्द्रबिन्दुमा राखेर काम गर्न जनप्रतिनिधिहरूसँग आग्रह गरेका छन् । तनहुँको व्यास नगरपालिकाको ३० औँ स्थापना दिवसका अवसरमा आयोजित कार्यक्रममा उनले जनप्रतिनिधिहरूले आङ्खना लागि मात्र सोच्न थाले भने देशको व्यवस्था विग्रने भन्दै देशको हितलाई ध्यानमा राखेर काम गर्न आग्रह गरे ।
उनले भने, ‘जनप्रतिनिधिहरूले देशको हितलाई केन्द्रबिन्दुमा राखेर काम गर्नुहोस् ।’ उनले जनप्रतिनिधि सुविधाभोगी हुन नहुने भन्दै आफ्नो सुविधा र उन्नति भन्दा पनि देशको हितलाई सोच्नुपर्ने सुझाव दिए । उनले भने, ‘आङ्खना लागि मात्र सोच्न थालियो भने व्यवस्था बर्बादी तर्फ जान्छ ।’ उनले राजनीति र विकासलाई सँगै अगाडि बढाउनुपर्ने जनाउँदै गाउँमै जनतालाई बसुँ बसुँ बनाउनुपर्ने सुझाव दिए ।
नेता पौडेलले राष्ट्रको स्वतन्त्रता र लोकतन्त्र बचाउने अहिलेको मुख्य आवश्यकता भएको बताए । उनले विगतमा के गरियो भन्दा पनि अब के गर्ने हो त्यसतर्फ केन्द्रित हुनुपर्ने सुझाव दिए । राजनीति र विकासलाई सँगै अगाडि बढाएर लान सके देशमा समृद्धि आउने उनको भनाई थियो । त्यस्तै बुधबार भानु साहित्य उद्यानको दमौलीमा आयोजित प्रारम्भिक गुरुयोजनाको प्रस्तुतीकरण कार्यक्रममा वरिष्ठ नेता पौडेलले आदिकवि भानुभक्त आचार्यको जन्मथलो चुँदीरम्घालाई नेपालका सातै प्रदेशको प्रतिनिधित्व हुने गरी सप्तधाम निर्माण गर्नुपर्ने बताए ।
उनले जानकीधाम, पशुपतिधाम, लुम्बिनी, मुक्तिनाथ धामलगायतका सातवटै प्रदेशको धाम त्यस क्षेत्रमा राखेर राष्ट्रिय एकताको भावनात्मक केन्द्रका रूपमा स्थापना गर्नुपर्ने सुझाव दिए । उनले आदिकवि भानुभक्तले लेखेको रामयणको भाषाले भावनात्मकरूपमा नेपालीलाई एकीकरण गराउन महत्वपूर्ण योगदान रहेको बताए । पृथ्वीनारायण शाहले तरबारको भरमा नेपालको एकीकरण गरे त्यसरी नै भानुभक्तले रामयण लेखेर एकीकरणको सूत्रमा बाँधेको उनले बताए ।
उनले उक्त क्षेत्रलाई साहित्यिक पर्यटकीय गन्तव्यस्थलका रूपमा विकास गरिनुपर्ने पनि बताए । उनले भाषा, साहित्य, संस्कृतिको संरक्षण, राष्ट्रियता र पर्यटन क्षेत्रको संरक्षण र संवद्र्धन गर्ने लक्ष्य राखि अगाडी बढ्न सुझाव दिए । कार्यक्रममा गण्डकी प्रदेशका आन्तरिक मामिलामन्त्री डोबाटे विश्वकर्माले तनहुँको विकासमा वरिष्ठ नेता पौडेलको भूमिकालाई बिर्सन नमिल्ने बताए । उनले आगामी वैशाख ३० गते हुने स्थानीय तह निर्वाचनलाई शान्तिपूर्ण रूपमा सम्पन्न गर्न प्रदेश सरकार प्रतिबद्ध रहेको पनि बताए ।
