काठमाडौं– सत्तारूढ गठबन्धन तालमेलको अलमलमा रुमल्लिएका बेला प्रमुख प्रतिपक्ष दल नेकपा एमालेले भने धमाधम उम्मेदवार सिफारिस गरिरहेको छ । एमाले अध्यक्ष केपी शर्मा ओली पूर्व मेचीदेखि पश्चिम महाकालीसम्मका सभालाई सम्बोधन गर्न कुदिरहेका छन् ।
आज (३० चैतसम्म) उम्मेदवार सिफारिस गरिसक्न केन्द्रले गरेको परिपत्रअनुसार देशभरका अधिकांश पालिकामा एमालेले उम्मेदवार सिफारिस गरिसकेको छ । एमालेले गाउँपालिका र नगरपालिकाको वडाको हकमा सम्बन्धित पालिका कमिटी, गाउँपालिका अध्यक्ष्ँ जिल्ला कमिटी र नगरपालिका प्रमुख एवं महानगरको वडाअध्यक्षका लागि प्रदेशले निर्णय गर्ने मापदण्ड बनाएको छ । यस्तै, उपहानगर र महानगरपालिकाका प्रमुख/उपप्रमुख भने तल्ला कमिटीबाट आएका सिफारिसका आधारमा केन्द्रले टुंग्याउने एमाले निर्वाचन विभागका उपप्रमुख निरज आचार्यले बताए ।
धमाधम उम्मेदवार सिफारिस गरेको एमालेले कतै सर्वसम्मत टुंग्याएको छ भने कतै एउटै पदका लागि दर्जनौंको नाम सिफारिस गरेको छ । दुई प्रमुख महानगरपालिका ललितपुर र भरतपुरबाट एक÷एक जनामात्रै उम्मेदवार सिफारिस गरेको एमालेले काठमाडौं महानगरबाट भने सिफारिस गर्न सकेको छैन ।
उता पोखरा महानरपालिका प्रमुखका लागि एमालेका १२ जनाले दाबी गरेका छन् । मंगलबार एमालेको महानगरपालिका कमिटीले मेयर र उपमेयरको आकांक्षीहरूको नाम संकलन गरेको थियो । जसमा मेयरमा प्रदेशसभा सदस्य कृष्णबहादुर थापासहित १२ जनाले र उपमेयरमा ११ जनाले आकांक्षा राखेका छन् । हालका मेयर मानबहादुर जिसी र उपमेयर मञ्जुदेवी गुरुङले भने आगामी कार्यकालका लागि कुनै पनि पदमा दाबी गरेका छैनन् ।
मेयरको आकांक्षीहरूमा प्रदेश सांसदद्वय थापा र राजीव पहारी, प्रा.डा. विश्वकल्याण पराजुली, रश्मी आचार्य, भीम कार्की, मीनाकुमारी गुरुङ, सावित्री भण्डारी, बालसिंह काउछा मगर, दीपक पौडेल, पुष्पराज अधिकारी, पुष्पज्योति ढुंगाना र दर्शन लामा रहेका छन् । प्रदेशसभा सदस्य थापा पोखराका पूर्वमेयरसमेत हुन् ।
पोखरा महानगरमा मेयर पदका लागि १२ जनाको दाबी परेपछि मतदान गरेर नाम टुंग्याइने भएको छ । मेयर पदका आकांक्षीहरूले तीन हजार रूपैयाँ तिरेर मनोनयन दर्ता गराएका बताइएको छ । मेयरका लागि दुई पुरुष र एक महिलाको नाम केन्द्रीय कमिटीमा सिफारिस हुनेछ ।
पोखारको उपप्रमुखका लागि भने ११ जनाले दाबी गरेका छन् । शुष्मा पौडेल, शोभामोहन पौडेल, बामदेव ढुंगाना, टीकाराम पंगेनी, तेजनारायण अधिकारी, सञ्जीवबहादुर कोइराला, देवका पहारी (त्रिपाठी), जीवनप्रसाद आचार्य, बलराम गायक, हरिमाया गुरुङ र बैनबहादुर क्षेत्रीले उपमेयरका लागि दाबी पेस गरेका छन् । आकांक्षीहरूबीच सहमतिको प्रयास गर्ने र सहमति नभए मतदानबाट तीन जनाको नाम छनोट गरी केन्द्रीय कमिटीलाई सिफारिस गर्ने तयारी छ । यस्तै, बुटवल उपमहानगरपालिकाको मेयरका लागि एमालेले आठ जनाको नाम सिफारिस गरेको छ ।
एमाले उपमहानगर कमिटीको बैठकले नगरप्रमुखको उम्मेदवारका लागि हालका मेयर शिवराज सुवेदी, उपमेयर गुमादेवी आचार्यसहित आठ जनाको नाम सिफारिस गरिएको नगर अध्यक्ष किसन ज्ञवालीले बताए । मेयरमा सिफारिस गरिएकाहरूमध्ये सुवेदी, आचार्य र सावित्रा अर्याल केन्द्रीय सदस्य हुन् । यस्तै गोपाल राना, बाबुराम भट्टराई, तेजेन्द्र केसी, रामप्रसाद रेग्मी र सूर्यबहादुर भट्टराईको नाम पनि मेयरका लागि सिफारिस गरिएको छ । यस्तै उपमेयरका लागि ज्ञानु केसी, खेम लुइँटेल, मधुकला कुँवर र कल्पना थापाको नाम सिफारिस गरिएको छ ।
एमालेले यसअघि ललितपुर महानगरपालिकाका लागि हरिकृष्ण व्यञ्जनकार र भरतपुर महानरपालिकाका लागि विजय सुवेदीको नाम सिफारिस गरेर केन्द्रमा पठाएको छ । व्यञ्जनकार अघिल्लो निर्वाचनमा नेपाली कांग्रेसका चिरिबाबु महर्जनसँग ३२९ मतले पराजित भएका थिए । त्योबेला महर्जनले २४ हजार ६४२ ल्याएर निर्वाचित हुँदा व्यञ्जनकारले २४ हजार ३१३ मत पाएका थिए । भरतपुरको मेयर सिफारिस भएका सुवेदी बागमती प्रदेशसभा सदस्य एवं प्रदेशका पूर्वमन्त्री हुन् । अघिल्लो निर्वाचनमा एमाले भरतपुरमा झिनो मतले पराजित भएको थियो ।
कांग्रेस–माओवादी गठबन्धनकी रेणु दाहाल ४३ हजार १२७ मत ल्याएर निर्वाचित हुँदा निकटतम प्रतिद्वन्द्वी एमालेका देवीप्रसाद ज्ञवालीले ४२ हजार ९२४ मत पाएका थिए । मेयरको तुलनामा उपमेयरमा मतान्तर केही फराकिलो परेको थियो । उपमेयरमा पनि कांग्रेस–माओवादी गठबन्धनको तर्फबाट उम्मेदवार बनेकी कांग्रेसकी पार्वती शाह ठकुरी ४७ हजार १९७ मत ल्याउँदै निर्वाचित भएकी थिइन् । एमालेकी दिव्या शर्मा आचार्यले ३९ हजार ५२५ मत प्राप्त गरेकी थिइन् ।
विराटनगर महानगरपालिका लागि भने एमालेको नगर कमिटीले पाँच जनाको नाम सिफारिस गरेको छ ।महानगरपालिका कमिटीका अध्यक्ष सागर थापा, केन्द्रीय सदस्य रामलाल साह, मोरङ जिल्ला कमिटी उपाध्यक्ष बाबुराम कार्की, प्रदेश सदस्य पर्शुराम बस्नेत र महेश भट्टराईको नाम सिफारिस गरेर केन्द्रमा पठाइएको छ ।
गठबन्धनले टुंग्यायो तालमेलको ‘मोडालिटी’
काठमाडौं (प्रस)– सत्तारूढ पाँचदलीय गठबन्धनले आगामी ३० वैशाखमा हुने स्थानीय तह निर्वाचनमा तालमेल गर्ने ‘मोडालिटी’ टुंग्याएको छ । प्रधानमन्त्रीनिवास बालुवाटारमा मंगलबार साँझ बसेको बैठकले तालमेलको आधार तय गरेको कांग्रेस नेता एवं सरकारका प्रवक्ता ज्ञानेन्द्रबहादुर कार्कीले जानकारी दिए ।
उनका अनुसार गठबन्धनले तय गरेको मोडालिटीमा सिट बाँडफाँडका सातवटा आधार तय गरिएको छ । जसमा नेकपा एकीकृत समाजवादीलाई प्राथमिकतामा राखिएको छ । ‘२०७४ को स्थानीय तह निर्वाचनमा एमालेबाट प्रमुख पदमा विजयी भई नेकपा एकीकृत समाजवादीमा कायम रहेका जनप्रतिनिधिलाई त्यसैअनुसार मान्ने,’ सिट बाँडफाँडका लागि तय गरिएको आधारको पहिलो बुँदामा उल्लेख छ ।
यसैगरी, गठबन्धनमा आबद्ध दलका उम्मेदवारले पालिका र वडामा प्राप्त मतको मत भार मान्ने, २०७४ को स्थानीय निर्वाचनमा विजय प्राप्त नगरेको भए पनि स्थानीय तहमा उपस्थित रहेका दललाई पनि तालमेलमा सहभागी गराउने विषय मोडालिटीमा समावेश गरिएको छ । २०७४ को निर्वाचनमा गठबन्धनबाहेकका दल विजयी स्थानमा प्रमुख पदमा प्राप्त मतलाई आधार बनाउने तथा अन्य दलका उम्मेदवारले पाएको मतभारलाई पनि आधार मान्ने उल्लेख छ । गठबन्धनमा आबद्ध दलबाहिर चुनावी तालमेल गर्न नपाइने बुँदासमेत मोडालिटीमा समावेश गरिएको छ ।
गठबन्धनले सोही मोडालिटीका आधारमा सिट बाँडफाँड गरी केन्द्रमा पठाउन निर्देशन दिने निर्णय गरेको छ । तर, महानगर र उपमहानगरपालिकाको मेयर÷उपमेयरको सिट बाँडफाँडको निर्णय भने केन्द्रबाटै गरिने भएको छ । पाँचदलीय गठबन्धनको केन्द्रीय संयन्त्रले यसबारे निर्णय गर्ने कांग्रेस नेता कार्कीले बताए । नगर र गाउँपालिकाको तालमेलको सिट बाँडफाँड वैशाख ३ गतेभित्र जिल्ला संयन्त्रले प्रदेशलाई र प्रदेश संयन्त्रले निर्णय गरी वैशाख ५ गतेभित्र केन्द्रलाई पठाउने निर्णय गरिएको उनले बताए । ‘सबै पालिकाका वडाध्यक्ष र सदस्यहरूको सिट बाँडफाँड जिल्ला संयन्त्रले वैशाख ३ गतेभित्र टुंगो लगाउने,’ गठबन्धनको निर्णयमा छ । प्रदेश तथा जिल्ला संयन्त्रमा प्रत्येक दलको प्रमुखसहित दुई/दुई जना प्रतिनिधि रहने उल्लेख गरिएको छ ।
आगामी ३० वैशाखमा देशभरका ७५३ वटै स्थानीय तहमा निर्वाचन हुँदै छ । उक्त निर्वाचनमा तालमेल गर्न नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाबीच गठबन्धन बनेको छ ।
-1755862759.jpeg)
