काठमाडौं– प्रमुख प्रतिपक्षी दल नेकपा एमालेको विराटनगर महानगर कमिटीले आइतबार विराटनगरको मेयरका लागि पाँच जनाको नाम सिफारिस गर्यो । महानगरपालिका कमिटीका अध्यक्ष सागर थापा, केन्द्रीय सदस्य रामलाल साह, मोरङ जिल्ला कमिटी उपाध्यक्ष बाबुराम कार्की, प्रदेश सदस्य पर्शुराम बस्नेत र महेश भट्टराईको नाम केन्द्रीय कार्यालयमा सिफारिस गरेर पठाएको महानगर कमिटीले जनाएको छ ।
सत्ता गठबन्धनले चुनावी तालमेलको ‘मोडालिटी’ टुंग्याउन नसकिरहेका बेला प्रमुख प्रतिपक्ष एमालेले भने उम्मेदवार सिफारिसलाई तीव्रता दिइरहेको छ । धमाधम उम्मेवार सिफारिस भइरहेका छन् । आउँदो ३० वैशाखका लागि तय स्थानीय तह निर्वाचनमा पनि गठबन्धन गरेर जाने निर्णय गरेको वर्तमान सत्ता गठबन्धन भने तालमेलको मोडालिटीमै अल्झिरहेको छ । कुनै निष्कर्ष निकाल्न सकेको छैन ।
एमालेले आइतबार मात्रै ललितपुर महानगरपालिका र चितवनको भरतपुर महानगरपालिकाका लागि उम्मेदवार सिफारिस गरेको छ । विराटनगरबाट पाँच जनाको नाम सिफारिस भए पनि ललितपुर र भरतपुर बाट भने एक/एक जनाको नाम सर्वसम्मत सिफारिस भएका छन् । जसकारण उनीहरू नै अब एमालेका आधिकारिक उम्मेदवार बन्ने देखिन्छ ।
एमालेले ललितपुर महानगरपालिकाको मेयरका लागि हरिकृष्ण व्यञ्जनकारलाई अघि सार्ने निर्णय गरेको छ । व्यञ्जनकार २०७४ सालको स्थानीय निर्वाचनमा ललितपुर महानगरमा झिनो मतले पराजित भएका थिए । त्योबेला कांग्रेसका चिरिबाबु महर्जनले २४ हजार ६४२ ल्याएर निर्वाचित हुँदा व्यञ्जनकारले २४ हजार ३१३ मत पाएका थिए । एमालेले ललितपुरको उपमेयरका लागि भने मञ्जरी शाक्य आस्था र सरस्वती खड्काको नाम सिफारिस गरेर केन्द्रमा पठाएको छ ।
एमालेले यही चैत मसान्तभित्र देशभरका उम्मेदवारको नाम सिफारिस गरिसक्न यसअघि नै परिपचत्र गरिसकेको छ । जसअनुसार सबै तहमा तीव्ररूपले काम अघि बढिरहेको केन्द्रीय निर्वाचन विभागका उपप्रमुख निरज आचार्य बताउँछन् । ‘हामीले चैत मसान्तभित्र उम्मेदवारको सिफारिस गरिसक्न परिपत्र गरेका थियौं । सोहीअनुसार काम भइरहेको छ ।
गाउँपालिका र नगरपालिकाको वडाको हकमा सम्बन्धित पालिका कमिटी, गाउँपालिका अध्यक्ष्ँ जिल्ला कमिटी र नगरपालिका प्रमुख एवं महानगरको वडाअध्यक्षका लागि प्रदेशले निर्णय गर्ने मापदण्ड बनाएका छौं,’ आचार्यले भने, ‘उपहानगर र महानगरपालिकाका प्रमुख÷उपप्रमुख भने तल्ला कमिटीबाट आएका सिफारिसका आधारमा केन्द्रले टुंग्याउँछ ।’
आचार्यले भनेजस्तै उम्मेदवार चयनमा एमालेले खासै अलमल गरेको देखिँदैन । जिल्ला–जिल्लामा उम्मेदवार सिफारिस गर्ने काम भइरहेको छ । एमालेको स्थानीय कमिटीले दैलेखको चामुण्डा बिन्द्रासैनी नगरपालिकाको मेयरमा सूर्यबहादुर शाही, धनुषाको जनकपुरधाम उपमहानगरपालिकाको मेयरमा उम्मेदवार शिवशंकर साह (हिरा)लाई सिफारिस गरेको छ ।
यस्तै, काभ्रेको चौँरीदेउराली गाउँपालिका अध्यक्षमा गैरसरकारी संस्था महासंघका पूर्वअध्यक्ष जितराम लामा, सिन्धुलीको गोलञ्जोर गाउँपालिकाको अध्यक्षमा शंकरराज बराल र डोटीको जोरायल गाउँपालिकाको अध्यक्षमा दुर्गादत्त ओझा तथा उपाध्यक्षमा जमुना बोहराको नाम सिफारिस गरेको छ । ओझा र बोहरा अघिल्लो निर्वाचनमा एमालेको तर्फबाट गाउँपालिका अध्यक्ष, उपाध्यक्ष निर्वाचित भएका थिए । एमालेले पुनः उनीहरूलाई नै उम्मेदवार बनाउन सिफारिस गरेको हो ।
तल्लोस्तरमा धमाधम काम भइरहेकाले कति तहमा उम्मेदवार सिफारिस भए भन्ने एकीकृत तथ्यांक एमालेको केन्द्रीय कार्यालयमा आइपुगेको छैन । यद्यपि, दैनिक रिपोर्टिङ भने भइरहेको बताइएको छ । ‘अहिलेसम्म यति पालिकाबाट सिफारिस भयो भन्ने यकिन तथ्यांक त छैन । तर, दैनिक रिपोर्टिङ भइरहेको छ । त्यसलाई अद्यावधिक र एकीकृत गर्ने काम भइरहेको छ,’ निर्वाचन विभाग उपप्रमुख आचार्यले भने ।
पूर्वमन्त्री मेयर सिफारिस
एमालेले आइतबार चितवनको भतरपुर महानगरपालिकाको उम्मेदवार पनि सिफारिस गरेको छ । अघिल्लो निर्वाचनमा कांग्रेस–माओवादीको गठबन्धन हुँदा एमाले भरतपुरमा झिनो मतले पराजित भएको थियो । माओवादीका गणना प्रतिनिधिले मतपत्र च्यातेपछि विवाद अदालतसम्म पुगेको थियो । अदालतको आदेशपछि १९ नम्बर वडामा पुनः मतदान भएको थियो । भरतपुरमा अघिल्लो निर्वाचनमा एमालेको तर्फबाट देवीप्रसाद ज्ञवाली र कांग्रेस–माओवादी गठबन्धनबाट माओवादीकी रेणु दाहाल मेयरका उम्मेदवार थिए । दाहाल ४३ हजार १२७ मत ल्याएर निर्वाचित भएकी थिइन् भने निकटतम प्रतिद्वन्द्वी ज्ञवालीले ४२ हजार ९२४ मत पाएका थिए ।
मेयरको तुलनामा उपमेयरमा मतान्तर केही फराकिलो परेको थियो । उपमेयरमा पनि कांग्रेस–माओवादी गठबन्धनको तर्फबाट उम्मेदवार बनेकी कांग्रेसकी पार्वती शाह ४७ हजार १९७ मत ल्याउँदै निर्वाचित भएकी थिइन् । एमालेकी दिव्या शर्मा आचार्यले ३९ हजार ५२५ मत प्राप्त गरेकी थिइन् । सोही महानगरमा एमालेले आउँदो निर्वाचनका लागि मेयरमा विजय सुवेदीको नाम सिफारिस गरेर पठाएको हो ।
एमाले उपमहासचिव प्रदीप ज्ञवालीसमेतको उपस्थितिमा भएको महानगर कमिटीको बैठकले सुवेदीलाई उम्मेदवार बनाउने सर्वसम्मत निर्णय गरेको हो । अघिल्लोपटकका पराजित उम्मेदवार ज्ञवालीको प्रस्तावमा सुवेदीको नाम टुंगो लागेको बताइएको छ ।
बागमती प्रदेशसभा सदस्यसमेत रहेका सुवेदी प्रदेशका पूर्वमन्त्रीसमेत हुन् । अष्टलक्ष्मी शाक्य मुख्यमन्त्री हुँदा सुवेदी सामाजिक विकास मन्त्री बनेका थिए । उनी २०७४ को प्रदेश सभा निर्वाचनमा चितवन क्षेत्र नम्बर २ ‘ख’ बाट निर्वाचित भएका थिए । गठबन्धनका तर्फबाट भने भरतपुमा को उम्मेदवार हुने भन्ने रस्साकस्सी छ । माओवादीले फेरि पनि आफूले नै पाउनुपर्ने र रेणुलाई नै दोहो¥याउने बताइरहेको छ भने कांग्रेसले कुनै हालतमा नछोड्ने चेतावनी दिइसकेको छ । अघिल्लो निर्वाचनमा माओवादीलाई सहयोग गरेकाले यसपटक आफूहरूले स्वतः पाउनुपर्ने कांग्रेसको दाबी छ । मेयर आफूलाई नदिए एक्लै अघि बढ्ने चितवन कांग्रेसले घोषणा गरिसकेको छ ।
कांग्रेसले थाल्यो निवेदन संकलन
भरतपुर महानगरपालिकाको प्रमुख कसले पाउने भन्ने विषयमा गठबन्धनभित्र माथापच्ची चलिरहेका बेला कांग्रेसले भने प्रत्यासीको ‘रोस्टर’ बनाउने तयारी थालेको छ । कांग्रेस भरतपुर महानगर समितिले आइतबार र सोमबार दुई दिनसम्म महानगरको प्रमुख र उपप्रमुखमा उम्मेदवार बन्न इच्छुक नेताहरूलाई निवेदन दिन समय दिएको छ । जसअनुसार पहिलो दिन नै प्रमुख र उपप्रमुखतर्फ १३÷१३ जनाले निवेदन बुझाएका छन् ।
मेयरका लागि भरत अधिकारी, शंकरप्रसाद कँडेल, तारानाथ पौडेल, उत्तम जोशी, चित्रसेन अधिकारी, जगन्नाथ पौडेल, रामप्रसाद अधिकारी, विजय शर्मा भुसाल, दिनेश कोइराला, पार्वती शाह ठकुरी, दीर्घमान श्रेष्ठ, नीलकण्ठ शर्मा रिजाल र गौरीकुमारी श्रेष्ठले निवेदन दिएका छन् । शाह अहिले महानगरको उमपेयर हुन् ।
यस्तै, उपमेयरका लागि तारा गुरुङ, बुद्धिकान्त न्यौपाने, लक्ष्मी लामिछाने, नीरु कार्की, कल्पना पौडेल, देवेन्द्र गुरुङ, टंकनाथ पौडेल, पूर्णबहादुर गुरुङ र राजीव न्यौपानेले निवेदन दिएका छन् ।
