मोरङ– प्रदेश १ का मुख्यमन्त्री राजेन्द्रकुमार राईले मुलुकको समृद्धि एवं रोजगार वृद्धिमा उद्यमीहरूलाई लाग्न सुझाव दिएका छन् । मोरङ व्यापार संघले सञ्चालन गरेको ‘विराट ट्रेड एक्स्पो’को समापन गर्दै एक्स्पोले राष्ट्रिय पुँजी निर्माणमा महत्वपूर्ण भूमिका खेलेको बताए । उनले उद्योग स्थापनाका लागि सहज ढंगले नीतिनियम निर्माण गर्ने प्रतिबद्धतासमेत व्यक्त गरे ।
उनले मुलुकको वैदेशिक व्यापार घाटा कम गर्न निर्यात मुलुक उद्योग स्थापना तर्फ ध्यान दिनुपर्ने सुझाव पनि दिएका छन् । उनले उद्यमीहरूलाई यस्तो उद्योग खोलेमा सरकारले नीतिनियम निर्माण गरी उद्योगलाई सहज गरिदिने आश्वासन दिए । मुख्यमन्त्री राईले उद्योगी व्यापारीको चाहनाअनुसार विराटनगरमा क्षेत्रीय अन्तर्राष्ट्रिय विमानस्थल निर्माणका लागि बजेट निकासा गर्न संघीय सरकारले प्रक्रिया सुरु गरेको जानकारी दिए । त्यस्तै यस क्षेत्रका लागि आवश्यक पर्ने प्रदर्शनीस्थलका निर्माणका लागि पनि सबै पक्षबीच आवश्यक छलफल सुरु गरी कार्यलाई अगाडी बढाउने उनको भनाई थियो ।
त्यस्तै कार्यक्रममा विराटनगर महानगरपालिकाका प्रमुख भीम पराजुलीले तीन तहको सरकारको सहयोगमा विराटनगरमा क्षेत्रीय अन्तर्राष्ट्रिय विमानस्थल निर्माण गर्नुपर्ने बताए । नेकपा (एमाले)का स्थायी कमिटी सदस्य एवं पूर्वमन्त्री हिक्मतकुमार कार्की यस्ता एक्स्पोले आर्थिक क्षेत्रमा सहयोग पुग्ने विश्वास व्यक्त गरे । नेपाली कांग्रेसका केन्द्रीय सदस्य अमूर्त अर्याल एक्स्पोले यस क्षेत्रमा आर्थिक चलायमानमा सहयोग पुर्याएको बताए ।
एमाले मोरङ अध्यक्ष ऋषिकेश पोखरेलले यस्ता एक्स्पोले विकासका गतिविधीलाई सहयोग गर्ने बताए । संघका अध्यक्ष नवीन रिजाल, उद्योग संगठन मोरङका अध्यक्ष सुयश प्याकुरेल, नेपाल उद्योग परिसंघका भीम घिमिरे, संघका पूर्वअध्यक्ष ताराचन्द खेतान र नेपाल पत्रकार महासंघ प्रदेश अध्यक्ष लीलावल्लभ घिमिरेले विराटनगरलाई पुनः दोस्रो ठूलो शहर बनाउन सबैले आङ्खनो क्षेत्रबाट भूमिका खेल्नुपर्ने सुझाव दिए ।
