काठमाडौं– सत्तारुढ गठबन्धनले आउँदो स्थानीय तह निर्वाचनमा तालमेल गर्ने निर्णय गरेर गृहकार्य अघि बढाएको छ । तर, कसरी अघि बढ्ने, कहाँ–कहाँ कसलाई नेतृत्व दिने भन्ने विषयमा गठबन्धनभित्र सहमति जुट्न बाँकी छ ।
यही बेला बुधबार चितवन पुगेका नेकपा माओवादी केन्द्रका अध्यक्ष पुष्पकमल दाहालले सबैले आ–आफ्नो ठाउँमा लचिलो हुन सिक्नुपर्ने टिप्पणी गरे ।
दाहालको उक्त अभिव्यक्तिले चितवनका कांग्रेस नेताहरूलाई झस्काएको छ । अध्यक्ष दाहालको भनाइ आइतबार कांग्रेस चितवनले गरेको निर्णयप्रति लक्षित थियो । आइतबार बसेको कांग्रेस जिल्ला कार्यसमितिको बैठकले भरतपुर महानगरपालिकाको मेयर नपाए एकलरूपमै चुनावमा जाने घोषणा गरेको थियो । हाल भरतपुर महानगरपालिकामा माओवादी केन्द्रकी रेणु दाहाल मेयर छन् । अघिल्लो निर्वाचनमा कांग्रेसको समर्थनमा उनी भरतपुरको मेयर निर्वाीचत भएकी थिइन् । कांग्रेसले उपप्रमुखमा चित्त बुझाएको थियो । यसपालि भने कुनै पनि हालतमा मेयर आफूले पाउनुपर्ने कांग्रेस नेताहरूको माग छ । उनीहरूले केन्द्रीय नेतृत्वलाई समेत यो विषयमा सचेत गराइसकेका छन् ।
तर, दाहालले रेणुलाई नै दोहो¥याउन चाहिरहेका छन् । केही दिन पहिले पनि उनले चितवन पुगेर कांग्रेसका जिल्ला नेताले भनेर मात्र केही नहुने बताएका थिए । उनले महानगरको निर्णय केन्द्रबाटै हुने र भरतपुर माओवादीको भागमा पर्ने आशय व्यक्त गरेका थिए । कथं, भरतपुर माओवादीको भागमा पर्यो भने रेणु नै उम्मेदवार बन्ने लगभग पक्का छ ।
बुधबार चितवन पुगेका दाहाल भूमिहीनलाई लालपूर्जा वितरण कार्यक्रममा सहभागी भएका थिए । सरकारले स्थानीय तह निर्वाचन घोषणा गरेपछि दाहाल चितवन केन्द्रित भएका छन् । भरतपुर महानगरपालिकामा फेरि प्रमुखको दाबी गरिरहेकी छोरी रेणुका लागि माहोल बनाउन दाहाल उद्घाटन, शिलान्यासजस्ता कार्यक्रमको छेक पार्दै चितवन पुगिरहेका छन् ।
कतिसम्म भने उनले बुधबार भूमि आयोगको कार्यक्षेत्रलाई नै ‘हस्तक्षेप’ गरे । भूमिहीनलाई जग्गा वितरण गर्न भनेर सरकारले राष्ट्रिय भूमि आयोग बनाएको छ । चितवनमा पनि यसको जिल्लास्तरीय कार्यालय र पदाधिकारी छन् । बुधबार विभागीय मन्त्री शशी श्रेष्ठ पनि लालपूर्जा वितरण कार्यक्रममा सहभागी भएकै थिइन् । तर, दाहाललाई प्रमुख अतिथिका रूपमा सहभागी गराइनु ‘रणनीतिक’ मानिएको छ । भूमि आयोगको चितवन जिल्ला अध्यक्ष बद्री तिमिल्सिना माओवादी केन्द्रकै हुन् ।
उसो त दाहाल यो महिनामा बुधबार मात्रै चिवतन पुगेका होइनन् । यसअघि चैत १०, ११ तथा १६ गते उनी चितवनमै रहे । विभिन्न कार्यक्रममा सहभागी भए । जतिजति चुनावको नजिकिँदै गइरहेको छ, दाहालको चितवन दौडधुप पनि बाक्लिँदै गएको छ । चैत ११ मा भरतपुर महानगरपालिकाको प्रशासनिक भवन शिलान्यास गर्न पुगेका उनले मेयर दाहालको खुबै प्रशंसा गरेका थिए । ९४ करोड ३२ लाख रूपैयाँ लागतमा निर्माण हुन लागेको भवनको शिलान्यास गर्दै उनले महानगरमा धेरै विकास भएको बताएका थिए । सोही दिन माओवादी केन्द्र जिल्ला समन्वय समितिको प्रथम विस्तारित बैठकलाई दाहालले सम्बोधन गरेका थिए । त्यसको अघिल्लो दिन दाहाल चैत १० मा आफ्नो निर्वाचन क्षेत्रका पाँच कार्यक्रममा सहभागी भएका थिए ।
उनले माडी–२ मा निर्माण सम्पन्न भएको चिरौली सडकको उद्घाटन गरे । त्यसपछि माडीकै परुई खोलाको पुल र कुसुमखोलाका चेपाङ समुदायलाई निर्माण गरिदिएको चेपाङ नमूना वस्तीको उद्घाटन गरेका थिए । उनले माडीका अगुवा नेता कार्यकर्तालाई सम्बोधन गर्दै प्रशिक्षण दिए । त्यसपछि भरतपुर शारदानगरमा आयोजित महिला फुटबल लिगको उद्घाटन गरे । उद्घाटन कार्यक्रममा उनले गौतमबुद्ध अन्तर्राीष्ट्रय क्रिकेट रंगशाला सरकारको दायित्वभित्र आएको र त्यसको काम अघि बढाउन आफूले सहयोग गर्ने प्रतिबद्धता जनाए ।
चैत ११ मा काठमाडौं फर्र्किएका दाहाल १६ गते फेरि चितवन पुगे । त्यसदिन उनले राप्ती नगरपालिकामा निर्माण गरिएको विद्युत् सबस्टेसनको उद्घाटन गरे । बस्ती क्षेत्रमा सबस्टेसन निर्माण गरिएको भन्दै स्थानीयले विरोध गरिरहे पनि दाहालले उद्घाटन गरे । हाल ऊर्जामन्त्री माओवादीकै पम्फा भुसाल छन् । सोही दिन दाहालले संघीय सरकारको बजेटमा बनाउन लागिएको नारायणी तटबन्धको शिलान्यास गरे । झण्डै पाँच अर्ब रूपैयाँ लागतमा बन्न लागेको २३ किलोमिटर तटबन्धको दाहालले भरतपुर–२६ स्थित शिसुवारमा शिलान्यास गरेका थिए । त्यस्तै, उनले महानगरको रिङरोडअन्तर्गतको पश्चिम खण्डको सडकको शिलान्यास पनि गरे । पटिहानीमा निर्माण गरिएको बहुउद्देश्यीय कबर्ड हलको पनि उनले उद्घाटन गरे ।
यसले दाहाल चितवनलाई लिएर उकुसमुकुसमा छन् भन्ने प्रस्ट हुन्छ । जसरी पनि फेरि भरतपुरको मेयर हत्याउने रणनीतिमा लागेका उनी त्यसका लागि माहोल बनाउन लागिपरेको माओवादीकै एक नेताले बताए । उनको चितवन दौडधुप त्यसैको उपज हो । बुधबार भरतपुरमा आयोजित कार्यक्रममा बोल्दै उनले निर्वाचनमा गठबन्धन गरेर जाने निर्णय गरिसकेको भन्दै सबैले लचिलो हुन सिक्नुपर्ने उल्लेख गरेका थिए । जसको आशय कांग्रेसको दाबीलक्षित थियो ।
‘हामीले चुनावमा गठबन्धन गरेर जाने निर्णय गरिसक्यौं । सबैले आ–आफ्नो ठाउँमा लचिलो हुन सिक्नुपर्छ । त्याग गर्ने मानसकिता बनाउन सकियो भने असम्भव हुँदैन,’ दाहालले भने । देशलाई छिटोभन्दा छिटो समाजवादउन्मुख राज्यतर्फ लैजान मिलेर जान आवश्यक रहेको उनको भनाइ थियो । उनले यसपल्ट धेरै महिलालाई मेयर र उपमेयर बनाउने चाहना रहेको पनि बताए । भरतपुरमा महिला मेयर र उपमेयरले राम्रो काम गरेको उनको भनाइ थियो ।
भरतपुर महानरपालिकोको नेतृत्वका लागि माओवादी र कांग्रेसबीच निकै माथापच्ची हुने देखिन्छ । कांग्रेसले भरतपुरमा आफूले मेयर नपाउने हो भने एक्लै अघि बढ्ने बताए पनि सोमबार सत्ता गठबन्धन आबद्ध दलको जिल्लास्तरीय बैठकमा तालमेल गरेर जाने विषयमा सहमति भएको छ । यद्यपि, त्यसको मोडालिटी भने टुंगो लागेको छैन । गठबन्धन दलले केही दिनअघि महानगरको हकमा केन्द्रबाटै उम्मेदवार टुंग्याउने निर्णय गरेकाले पनि मोडालिटी बन्न नसकेको हो ।
अघिल्लो स्थानीय निर्वाचनमा चितवनका सातमध्ये भरतपुर महानगरसहित माडी नगरपालिकामा माओवादीले जितेको थियो । एमालेले रत्ननगर, खैरहनी, राप्ती र कालिका नगरपालिकामा जितेको थियो भने कांग्रेसले इच्छाकामना गाउँपालिका मात्र जितेको थियो ।
-1755862759.jpeg)
