जनकपुरधाम– भौतिक पूर्वाधार तथा यातायात मन्त्री रेणु यादवले वर्षौ देखिको नेपाली जनताको रेल चढ्ने सपना पूरा भएकोमा खुशी व्यक्त गरेकी छन् । शनिबार नेपाली रेल उद्घाटनको अवसरमा जनकपुरधाम रेल्वे स्टेशनमा शनिबार आयोजित कार्यक्रममा मन्त्री यादवले नेपाली जनताको रेल चढ्ने सपना पूरा भएको बताइन् ।
रेल संचालन भएपछि नेपालको व्यापारलाई अगाडि बढाउन सकिने उनको धनाई थियो । उनले रेल संचालनले व्यापार समृद्ध भए यहाँका युवालाई विदेश जानुनपर्ने धारणा राखिन् । उनले रामसीताको सम्बन्ध जोडिएको नेपाल र भारतमा रेल संचालन भएपछि दुबै देशको सम्बन्धमा एउटा आयाम थप भएकोसमेत बताईन् ।
मन्त्री यादवले बिजलपुरासम्मको ट्रयाक निर्माण भइसकेको र हस्तान्तरण हुनेवित्तिकै त्यहाँसम्म पनि रेल चल्ने बताइन् । उनले बर्दिवासदेखि निजगढसम्मको ७० किलोमिटर रेल्वे ट्रयाकको तयारी भइरहेको बताउँदै रक्सौलदेखि सिमरा र सिमरादेखि काठमाडौंको यात्रा पनि रेलबाट हुने बताइन् ।
उनले विराटनगरबाट जोगबनी हुँदै बर्दिवाससम्म रेल्वे लाइन जोडे दुई देशको सम्बन्ध अझ सुमधुर हुने पनि बताईन् । कार्यक्रममा मधेस प्रदेशका मुख्यमन्त्री लालबाबु राउतले रेल सेवा सञ्चालनले सरकारको विकास र समृद्धिको लक्ष्य प्राप्तिका लागि कोसेढुङ्गा हुने उनले विश्वास व्यक्त गरे ।
यसले मधेस प्रदेशको विकास र समृद्धिमा टेवा पुग्ने उनको भनाई थियो । उनले लामो समयको प्रतिक्षापश्चात रेल सेवा सञ्चालन आएकोमा खुसीको लागेको बताउँदै यसबाट प्रदेशको आर्थिक विकास र पर्यटन प्रवद्र्धनमा ठूलो योगदान पुग्ने बताए ।
सदिऔँदेखि रहेको नेपाल–भारत सम्बन्धलाई रेल सेवाले अझै प्रगाढ बनाउने विश्वास व्यक्त गर्दै मुख्यमन्त्री राउतले रेल सेवा सञ्चालनका लागि संघीय सरकारले ठुलो भूमिका खेलेका बताए । सो अवसरमा जनकपुरधाम उपमहानगरपालिकाका प्रमुख लालकिशोर साहले जयनगर–कुर्था रेल सेवा सञ्चालन भएसँगै जनकपुरधामको विकासमा महत्वपूर्ण योगदान पुग्ने बताए । उनले रेल सेवाका कारण जनकपुरधामभित्र दैनिक पर्यटक बढ्ने र आर्थिक विकासले गति लिने विश्वास व्यक्त गर्दै नगरप्रमुख साहले रेल सेवाको सुरक्षा र संरक्षणका लागि आवश्यक सहयोग गर्ने प्रतिबद्धता व्यक्त गरे ।
नेपालका लागि कार्यवहाक भारतीय राजदूत नाव्या खम्पाले नेपालको आर्थिक विकासलाई भारत सरकार नेपाल सरकारसँग मिलेर काम गर्न चाहेको बताउँदै रेल सेवा यसैको उदाहरण भएको बताए । उनले रेल सेवा सञ्चालनसँगै नेपाल र भारतबीचको सम्बन्ध अझ मजबुत बन्ने विश्वास व्यक्त गरे ।
नेपाल रेल्वे कम्पनी लिमिटेडका महानिर्देशक दीपककुमार भट्टराईले आइतबारदेखि दैनिक दुईपटक जयनगर–कुर्था रेल चल्ने जानकारी गराए । गत २०७७ असोज २ गते भारतीय कोकंण रेल्वे कम्पनीसँग ८४ करोड ६५ लाखमा खरिद गरेको रेलमा दुई सेट इन्जिनसहित १० वटा बोगी रहेको छ भने करिब एक हजार ३०० यात्रु बोक्न सक्ने क्षमता रहेको छ ।
