काठमाडौं– प्रधानमन्त्री शेरबहादुर देउवा तीनदिने औपचारिक भ्रमणका लागि आज छिमेकी मुलुक भारत जाँदै छन् । आज मध्याह्न उनी नयाँ दिल्ली प्रस्थान गर्ने कार्यक्रम छ । भारतीय प्रधानमन्त्री नरेन्द्र मोदीको निमन्त्रणामा प्रधानमन्त्री देउवा भारत भ्रमणमा जान लागेका हुन् ।
गत २९ असारमा पाँच दलीय गठबन्धनको सरकार गठनपछि पाँचौं पटक प्रधानमन्त्री बनेका थिए । त्यसपछि देउवाले पहिलोपटक भारतको औपचारिक भ्रमण गर्न लागेका हुन् । यसअघि कोरोना भाइरसको महामारीका कारण उनको भ्रमण हुन सकेको थिएन । त्यसैले प्रधानमन्त्री देउवाको यो भ्रमणलाई महत्वपूर्ण रूपमा लिइएको छ ।
परराष्ट्र मन्त्रालयका अनुसार प्रधानमन्त्री देउवा नेतृत्वको प्रतिनिधिमण्डल नेपाल वायुसेवा निगमको नियमित उडानमार्फत दिउँसो १ः२५ बजे नयाँ दिल्ली प्रस्थान गर्नेछ । भ्रमण टोलीमा देउवा पत्नी आरजु राणा देउवासहित परराष्ट्रमन्त्री डा.नारायण खड्कालगायत मन्त्रीहरू, सचिवहरू तथा पदाधिकारीहरू रहेका छन् । भ्रमण टोलीमा सरकारी उच्च अधिकारी, उद्योगी व्यवसायी, सञ्चारकर्मी गरी करिब ५० जना सहभागी हुने परराष्ट्र मन्त्रालयले जनाएको छ ।
भ्रमणका क्रममा प्रधानमन्त्री देउवाले भारतका उपराष्ट्रपति बैंकैया नायडूसँग शिष्टाचार भेटवार्ता गर्ने कार्यक्रम रहेको छ । चैत १९ गते भारतीय प्रधानमन्त्री मोदीसँग हैदरावाद हाउसमा प्रतिनिधिमण्डलस्तरीय वार्ता हुने कार्यक्रम रहेको छ । साथै, भारतीय प्रधानमन्त्री मोदीले आयोजना गर्ने दिवाभोजमासमेत प्रधानमन्त्री देउवासहितको प्रतिनिधिमण्डल सहभागी हुनेछ ।
त्यसैगरी, प्रधानमन्त्री देउवासँग भारतीय विदेशमन्त्री तथा भारत सरकारका राष्ट्रिय सुरक्षा सल्लाहकारले भेटवार्ता गर्ने परराष्ट्र मन्त्रालयले जनाएको छ । भ्रमणका क्रममा देउवाले भारतका विदेश मामिलामन्त्री र राष्ट्रिय सुरक्षा सल्लाहकारसँग पनि भेट गर्नेछ । त्यस्तै प्रधानमन्त्री देउवाले भारत भ्रमणका अवसरमा नयाँ दिल्लीमा व्यापारीको भेलालाई सम्बोधन गर्ने कार्यक्रम रहेको छ । तीन दिने भ्रमण सकेर प्रधानमन्त्री देउवा चैत २० गते साँझ ६ः१० बजे स्वदेश फर्कने कार्यक्रम रहेको छ ।
सञ्चार तथा सूचना प्रविधिमन्त्री ज्ञानेन्द्रबहादुर कार्कीले प्रधानमन्त्री देउवाको भारत भ्रमणले दुई देशबीचको सम्बन्धलाई थप सुदृढ बनाउने बताए । उनले नेपाल र भारतको बीचमा सरकार–सरकारको मात्र नभइ जनता–जनताको स्तरमा पनि सम्बन्ध रहेको बताए । ‘यो सम्बन्धलाई अझ प्रगाढ बनाउने र हाम्रा बीचमा देखिएका समस्याहरूलाई उच्चस्तरको राजनीतिक र कूटनीतिक माध्यमद्वारा हल गर्न यसपटकको प्रधानमन्त्रीको भ्रमण सफल हुने विश्वास लिएका छौँ,’ उनले भने ।
