काठमाडौं– स्वास्थ्य तथा जनसंख्यामन्त्री विरोध खतिवडाले पत्रकारको निःशुल्क स्वास्थ्य उपचार गर्ने व्यवस्थाका लागि पहल गर्ने बताएका छन् । महासंघको ६७औं स्थापना दिवसको अवसरमा बुधबार महासंघको केन्द्रीय कार्यालयमा आयोजित स्वास्थ्य शिविरलाई सम्बोधन गर्दै उनले उक्त प्रतिबद्धता जनाएका हुन् । उनले पत्रकारको स्वास्थ्य बिमा, ज्येष्ठ पत्रकार वृत्तिलगायतलाई व्यवस्थित गर्न र आमसञ्चार प्रशिक्षण प्रतिष्ठान स्थापना गर्न पहल गर्ने बताए ।
महासंघले स्थापना दिवस विभिन्न कार्यक्रम आयोजना गरी मनाएको जानकारी दिएको छ । यस अवसरमा बुधबार बिहान काठमाडौंको सिनामंगलबाट सञ्चारग्रामस्थित महासंघको केन्द्रीय कार्यालयसम्म प्रभातफेरी आयोजना गरिएको थियो । प्रभातफेरीमा महासंघका विभिन्न शाखामा आबद्ध पत्रकारहरूको उपस्थिति रहेको थियो । सञ्चारग्रामस्थित महासंघको कार्यालयमा पत्रकारका लागि निःशुल्क स्वस्थ्य शिविर सञ्चालन गरिएको थियो । जसमा दन्त तथा मिर्गौला परीक्षण र रक्तदान कार्यक्रमको आयोजना गरिएको महासंघले जनाएको छ ।
बुधबार नै महासंघले ‘पत्रकार तथा अञ्चार क्षेत्रमा कोभिड–१९ को प्रभाव’ बारेमा तीन छुट्टाछुट्टै समूहमा समूहगत छलफल गरेको थियो । अन्तरक्रिया कार्यक्रमलाई सम्बोधन गर्दै सञ्चार तथा सूचना प्रविधिमन्त्री ज्ञानेन्द्रबहादुर कार्कीले प्रेस तथा अभिव्यक्ति स्वतन्त्रताप्रति सचेत रहेको बताए । पत्रकारको पेसालाई व्यवस्थापन गर्न सरकार लागिपरेको उनले बताए । पत्रकारको सुविधाका लागि अनलाइनमार्फत सेवा उपलब्ध गराउँदै पत्रकारको सम्मानका लागि पत्रकारिता पुरस्कार, पत्रकार उपचार कोषलगायतमा सरकार क्रियाशील रहेको उनले बताए ।
समूहगत छलफलमा
‘कोभिड र प्रेस स्वतन्त्रताको अवस्था’ शीर्षकमा महासंघका पूर्वसभापति तारानाथ दाहालले कार्यपत्र प्रस्तुत गरेका थिए । महासचिव रोसन पुरीले ‘कोभिडको प्रभाव, महासंघको भूमिका र अबको रणनीति’ र पूर्वअध्यक्ष गोविन्द आचार्यले ‘पत्रकारहरूको पेसागत सुरक्षामा कोभिडको प्रभाव’ शीर्षकमा कार्यपत्र प्रस्तुत गरेका थिए ।
