काठमाडौं– देशको सबैभन्दा ठूलो दल नेकपा एमाले स्थानीय तह निर्वाचन केन्द्रित हुन थालेको छ । देशका विभिन्न क्षेत्रमा सभा र पार्टी प्रवेश कार्यक्रमलाई पनि निरन्तरता दिएको एमालेले पार्टीका बैठक पनि गरिरहेको छ ।आउँदो वैशाख ३० गते हुने स्थानीय निर्वाचनका लागि केन्द्रित भएको एमालेले सोमबार पोलिटब्यूरो बैठकबाट उम्मेदवार छनोटका लागि मापदण्ड तयार पारेको छ ।
बैठकले उम्मेदवार छनोटका लागि ६ वटा मापदण्ड तय गरेको एमाले उपमहासचिव एवं प्रचार विभाग प्रमुख पृथ्वीसुब्बा गुरुङले जानकारी दिए । जनप्रतिनिधि भएर काम गरेकाहरूको हकमा उनीहरूको कामको मूल्यांकन, उनीहरूको कार्यक्षमता तथा विकास र सुशासनलाई आधार बनाउने एमालेको तयारी छ । त्यस्तै, लोकप्रियता र चुनावमा विजयको सुनिश्चिततालाई पनि एमालेले उम्मेदवार छनोटको मापदण्ड बनाएको छ ।
पार्टी आन्दोलनमा पु¥याएको योगदान, निष्ठा र समावेशी सन्तुलनलाई पनि आधार बनाएर उम्मेदवार छनोटको मापदण्ड तय गरेको प्रचार विभाग प्रमुख गुरुङले जानकारी दिए । वडाअध्यक्ष र सदस्यका उम्मेदवारको वडा कमिटीको सिफारिसमा गाउँपालिकाले निर्णय गर्ने, गाउँपालिका अध्यक्षको जिल्ला कमिटीले र नगरपालिकाका मेयर र उपमेयरको प्रदेश कमिटीले निर्णय गर्ने गुरुङले बताए । त्यस्तै, महानगरको मेयर र उपमेयरका उम्मेदवार प्रदेशको सिफारिसमा केन्द्रीय कमिटीले तय गर्नेछ ।
पोलिटब्यूरो बैठकमा आएका सुझावका आधारमा उम्मेदवार सिफारिस र निर्णयसम्बन्धी विधि र मापदण्डमा सामान्य हेरफेर भएको हो । यसअघि सचिवालय बैठकले वडाध्यक्ष र सदस्यको सिफारिस पालिका कमिटीले गरेर जिल्ला कमिटीले निर्णय गर्ने भनेकोमा अब वडाध्यक्ष र सदस्यका उम्मेदवारको सिफारिस वडा कमिटीले गर्ने प्रस्ताव गरिएको छ । प्रचार विभाग प्रमुख गुरुङले पार्टीका सबै केन्द्रीय सदस्यलाई आ–आफू मतदाता रहेको भूगोलमा केन्द्रित गराउने निर्णय समेत भएको जानकारी दिए ।
आफ्नो विभागीय काममा असर नगर्ने गरी उनीहरूलाई निर्वाचनमा खटाउने भएको हो । यस्तै, पार्टीको क्यालेन्डर बनाउने, जेष्ठ नागरिक सम्मान गर्ने लगायतका निर्णय पनि भएका छन् । पोलिटब्यूरो बैठकले आगामी केन्द्रीय कमिटी बैठकका लागि ११ वटा एजेण्डा समेत तय गरेको छ । एमालेले केन्द्रीय कमिटीको बैठक चैत ११ गतेका लागि बोलाएको छ । केन्द्रीय कमिटी बैठकले सचिवालय र पोलिटब्यूरो बैठकले गरेका निर्णय अनुमोदन गर्नेछ ।
सोमबारको पोलिटब्यूरो बैठकमा केही नेताहरूले धेरै दाबेदार भएर विवाद हुने तथा पार्टीलाई निर्णय गर्न समस्या हुने ठाउँमा चुनावी प्रक्रियाबाट उम्मेदवार चयन गर्ने प्रस्ताव पनि राखेका छन् । स्थायी कमिटी सदस्य हिक्मत कार्की, पोलिटब्यूरो सदस्य महेश बस्नेत लगायतका नेताहरूले धेरै विवाद भएको ठाउँमा पार्टीले केन्द्रबाटै एउटा कार्यदल बनाएर समाधान गर्ने र त्यस क्रममा आवश्यक पर्दा लोकतान्त्रिक प्रक्रियाबाट दाबेदारबीच चुनाव गराउने प्रस्ताव राखेका छन् ।
त्यस्ता ठाउँमा सम्बन्धित पालिकाभित्रका पार्टीका संगठित सदस्यहरूले मतदान गरेर जो रुचाउँछन् उसैलाई टिकट दिने विधि पनि अपनाउन सकिने नेताहरूको भनाइ छ । त्यसले गर्दा मलाई कार्यकर्ता र जनताले रुचाएका थिए तर, नेताले टिकट दिएनन् भन्ने गुनासो नरहने उनीहरूको तर्क छ । यसअघि पनि एमालेले कास्की, मकवानपुर लगायतका जिल्लामा यो विधि अपनाएको थियो । तर, त्यसबेला कमिटीका सस्यहरूबीच मात्र मतदान भएको थियो । यसपटक भने धेरै विवाद र उस्तै दाबेदार भएका ठाउँमा पार्टीका सदस्यहरूबाट उम्मेदवार छान्ने विधि पनि समेट्न नेताहरूले बैठकमा सुझाएका छन् ।
घनश्यामको प्रस्ताव–वाम गठबन्धन गरौं, ओलीको जवाफ– हुँदैन
नेकपा एमालेका नेता घनश्याम भुसालले कम्युनिस्ट पार्टीहरूबीच नै गठबन्धन र एकता हुनुपर्ने प्रस्ताव गरेका छन् । सोमबार भएको पोलिटब्यूरो बैठकमा उनले एमाले वाम एकताको मूलप्रवाह भएकाले यसका लागि पहल गर्नुपर्ने समेत बताए । तर, अध्यक्ष केपी शर्मा ओलीले भने यसमा खास इच्छा देखाएनन् ।
उनले अहिले नै वाम गठबन्धन हुन नसक्ने बताए । स्थायी कमिटी सदस्य शेरबहादुर तामाङका अनुसार भुसालले वाम एकतामा जोड दिँदा तीन वटा पार्टी विभाजन हुनुको कुनै सैद्धान्तिक आधार नरहेको र आसन्न निर्वाचनमा वामपन्थीको जितलाई सुनिश्चित गर्न पनि एकता आवश्यक भएको उल्लेख गरेका थिए । ‘कम्युनिस्ट पार्टीका बहुसंख्यक सदस्य र कार्यकर्ताले कम्युनिस्टहरूबीच गठबन्धन र एकता चाहेका छनु’, बैठकमा भुसालले भनेका थिए ।
तर, अध्यक्ष ओलीले भने आउँदो स्थानीय तह निर्वाचनमा वाम गठबन्धन हुन नसक्ने जवाफ दिए । ओलीले स्थानीय आवश्यकता अनुसार जुनसुकै दलसँग पनि तालमेल हुन सक्ने तर, वाम गठबन्धन मात्र बनाएर जाने सम्भावना नरहेको जवाफ दिए ।
‘स्थानीय आवश्यकताका आधारमा जुनसुकै पार्टीसँग पनि तालमेल गर्न सकिन्छ । गठबन्धन भनेर वाम पार्टीसँग मात्र हुँदैन’, बैठकमा घनश्यामको प्रस्तावमा जवाफ दिँदै ओलीले भने । घनश्यामको प्रस्तावपछि बोलेका नेता महेश बस्नेतले पनि विगतमा वाम एकता गरेर पछुताउनुपर्ने अवस्था आइसकेकाले त्यतातिर लाग्न नहुने बताएका थिए । बरु उनले देशमा दुई वटा मात्र पार्टी बनाएर जाने विषयमा सोच्नुपर्ने धारणा राखे ।
