काठमाडौं– जनता समाजवादी पार्टीका नेता मंगलप्रसाद गुप्तालाई पार्टी प्रवेश गराउन एमाले अध्यक्ष्ँ केपी शर्मा ओली पुस ६ गते कपिलवस्तु पुगे । २०७४ सालको प्रतिनिधि सभा निर्वाचनमा कपिलवस्तु क्षेत्र नम्बर ३ मा दोस्रो मत प्राप्त गरेका गुप्तालाई भित्र्याउन एमालेले ठूलै कार्यक्रम गर्यो ।
अध्यक्ष ओली नै पुग्ने भएपछि त्यसको रौनक समेत बेग्लै थियो । ओलीले त्यसदिन गुप्तासहित पाँच हजार नेता/कार्यकर्तालाई एमालेमा भित्र्याएको दाबी गरे । गुप्ता २०७४ को निर्वाचनमा संघीय समाजवादी फोरमका तर्फबाट उम्मेदवार बनेका थिए । आउँदो वर्ष चुनाव हुने निश्चित भए पनि कुन मितिमा हुने भन्ने निक्र्योल भइसकेको थिएन । पहिले स्थानीय तहको निर्वाचन गर्ने वा संघीय निर्वाचन गर्ने भन्ने निर्णय भइसकेको थिएन । तर, ओली चुनावी अभियानमा जुटिसकेका थिए ।
अहिले देश चुनावी माहोलमा होमिएको छ । निर्वाचन आयोगले निर्वाचन कार्यतालिका सार्वजनिक गरिसकेको छ । वैशाख ३० हुने स्थानीय तह निर्वाचनका लागि वैशाख ११ र १२ गते उम्मेदवारी मनोननयको समय निर्धारण गरिएको छ । चुनाव घोषणा भएसँगै ओलीको सक्रियता झन् बढेको छ ।
फागुन २५ गते मोरङको रंगेली नगरपालिका प्रमुख दिलिप अग्रवाल र उपप्रमुख केशवकुमारी खराललाई एमालेमा भित्र्याउन ओली रंगेली पुगे । अघिल्लो निर्वाचनमा नेकपा माओवादी केन्द्रका तर्फबाट निर्वाचत भएका उनीहरू अर्को निर्वाचन नजिकिँदै गर्दा एमालेमा भित्रिए । उनीहरूसँगै वडा १ का अध्यक्ष कृष्ण खनाल, वडा ५ अध्यक्ष महानन्द मण्डल र वडा ७ का अध्यक्ष रामचन्द मण्डललाई पनि ओलीले त्यसैदिन एमालेमा भित्र्याए । उनीहरू सबै माओवादीबाट निर्वाचित भएका थिए ।
त्यसको पर्सिपल्ट फागुन २८ गते वीरगञ्ज पुगेका ओलीले वीरगञ्ज महानगरपालिका मेयर विजय कुमार सरावगीलाई एमालेमा भित्र्याए । २०७४ को स्थानीय निर्वाचनमा तत्कालीन संघीय समाजवादी फोरमबाट वीरगञ्ज महानगरको मेयरमा निर्वाचित सरावगी हाल जनता समाजवादी पार्टी (जसपा) का केन्द्रीय सदस्य थिए । त्यसपछि काठमाडौंका कार्यक्रममा व्यस्त भएका ओली आइतबार इलाम पुगे ।
इलामको फिक्कलमा आयोजित कार्यक्रममा ओलीले विगमा पटक–पटक एमालेबाट चुनाव जितेका र हाल एकीकृत समाजवादीतर्फ लागेका झलनाथ खनालमाथि खरो टिप्पणी गरे । फिक्कल खनालको निर्वाचन क्षेत्र हो । त्यहाँ पुगेर उनले नेता खनाललाई मात्रै होइन एकीकृत समाजवादीका अध्यक्ष माधवकुमार नेपाल, माओवादी केन्द्रका अध्यक्ष पुष्पकमल दाहाल ‘प्रचण्ड’ र निर्वाचन आयोगसम्मलाई घोचपेच गरे । हुन त अहिले ओली मात्र होइन एमालेकै शीर्ष नेता, माओवादी केन्द्रका अध्यक्ष प्रचण्ड, नेकपा एकीकृत समाजवादीका अध्यक्ष्ँ नेपाल लगायतका नेताहरू पनि देश दौडाहमा लागेका छन् ।
गत फागुन २९ गते विराटनगरमा आयोजित राजनीतिक–वैचारिक प्रशिक्षण कार्यक्रममा सहभागी भएका प्रचण्ड चैत २ काठमाडौंमा आयोजित अर्को कार्यक्रममा सहभागी भए । चैत ३ गते बुटवलमा आयोजित एक कार्यक्रममा पुगेका उनी शनिबार (चैत ५ गते) पार्टी कार्यालय उदघाटन गर्न सिन्धुली पुगे । उनको दौडधुप त्यतिमै रोकिएन । आइतबार उनी माओवादी केन्द्रको गण्डकी प्रदेश समितिले आयोजना गरेको प्रशिक्षण कार्यक्रमलाई सम्बोधन गर्न पोखरा पुगे ।
त्यहाँ उनले एमाले अध्यक्ष केपी शर्मा ओलीविरुद्ध खरो टिप्पणी गरे ।ओलीलाई रूपान्तरण गर्न सकिएला भनेर प्रयास गरेपनि नसकिएको उनले टिप्पणी गरे । ‘केपी ओलीलाई रूपान्तरण गर्न सकिएला भनेर हामीले एकता गर्यौँ । सकिएन । हुँदाहुँदा ओलीजी त कमल थापासँग चुनावी तालमेल गर्ने तयारी गर्दै हुनुहुन्छ रे,’ प्रचण्डले भने ।
आइतबार नै एकीकृत समाजवादीका अध्यक्ष नेपालले केन्द्रीय कार्यालयमा केही व्यक्तिलाई आफ्नो पार्टीमा भित्र्याए । त्यसक्रममा उनले विभिन्न जिल्लामा आफूहरू शक्तिशाली भएपनि अन्य पार्टीहरूले सहकार्य गर्न चाहिरहेको बताए । सहकार्य गर्न चाहनेलाई स्वागत गर्ने उनको भनाइ छ । ‘विभिन्न जिल्लाले भनिरहेको छ हामी एक्लै पनि बलियो शक्ति हौँ, तर विभिन्न पार्टीहरूले भनिरहेका छन् हामीसँगै सहकार्य गरेर जाऔँ’, नेपालले भने । उसो त नेपाल काठमाडौंमा मात्र केन्द्रित छैनन् । उनी पनि विभिन्न जिल्लामा हुने सभा र प्रशिक्षण कार्यक्रमलाई सम्बोधन गर्न पनि पुगिरहेका हुन्छन् ।
आइतबार नै एमाले वरिष्ठ उपाध्यक्ष ईश्वर पोखरेल सुर्खेत पुगे । वीरेन्द्रनगरमा आयोजित कार्यक्रममा उनले माओवादी नेता ठम्मर विष्टलाई एमालेमा भित्र्याए । केहीदिन पहिले मात्र प्रदेश सभा सदस्य र माओवादीको प्रमुख सचेतकबाट राजीनामा दिएका विष्टले एमाले रोजे ।
एमाले, माओवादी र समाजवादी मात्र होइन कांग्रेस पनि निर्वाचनकेन्द्रित अभियानमा जुटेको छ । ‘गाउँ गाउँ जाऔं, कांग्रेस जिताऔं’ भन्ने नारासहित एक महिने अभियान थालेको कांग्रेसका नेताहरू हरेक जिल्लामा परिचालित भएका छन् । प्रधानमन्त्री समेत रहेका सभापति शेरबहादुर देउवा आफैं जिल्ला–जिल्ला नपुगेपनि उपसभापति, महामन्त्री लगायतका नेताहरूले भने केही जिल्लामा पुगिरहेका छन् । प्रधानमन्त्री देउवा भने शनिबार काभ्रेसको तेमाल गाउँपालिकाको भवन उद्घाटनका लागि त्यहाँ पुगे । उनले निर्वाचनलाई स्वच्छ र भयरहित वातावरणमा सम्पन्न गर्न सबै लाग्नुपर्ने बताएका थिए ।
आउँदो चुनावलाई लक्षित गरेर नेताहरू गाउँ गाउँ त पुगिरहेका छन् । तर, उनीहरू आफ्ना लक्ष्य, उद्देश्य, सपना र योजना होइन, अर्कैको कुरा काटिरहेका छन् । एकले अर्कालाई धारेहात लगाउन तल्लीन जस्ता देखिन्छन् । एकअर्काप्रति असहिष्णु सुनिने उनीहरू तुच्छ गालीमा रमाउन थालेका छन् । आइतबार विभिन्न कार्यक्रममा सहभागी भएका ओली, दाहाल र नेपालले यस्तै गरे । उनीहरूले त्यहाँ आफ्नो पार्टीले जनतामाझ लैजान चाहेको योजना, देशका लागि देखेका सपनाका कुरा गरेनन् । बरु एकले अर्काको आलोचनामै प्रशस्त समय खर्चिए ।
‘अहिले एउटा पाँच दलीय गठबन्धन बनेको छ। एक्लै त एमालेतिर चियाउन कसैले सक्दै सक्दैन । एक्लै कसैले आँटै गर्दैन । त्यसैले पाँच दलीय गठबन्धन’, इलामको कार्यक्रममा ओलीले भने, ‘नेकपा एमाले मात्रै हो, सिंगो जनताको प्रतिनिधि । त्यसलाई पाँच दल, सात दल चाहिँदैन । एउटै दल एमाले काफी छ । ताराहरू रातभरि आकाशमा हुन्छन् । एउटै सूर्य बिहान झुल्किएपछि सबै संसार उज्यालो हुन्छ ।’
त्यति मात्र होइन उनले निर्वाचन आयोगमाथि पनि प्रश्न उठाए । उनले कांग्रेसलाई सजिलो बनाउनका लागि मतपत्रमा चुनाव चिह्न हरियो रङको बनाउन लागिएको टिप्पणी गरे । ‘म निर्वाचन आयोगलाई सम्मान गर्न चाहन्छु, र भन्न चाहन्छु, निर्वाचन आयोगले एउटा पार्टीको पक्षमा काम गर्ने होइन, निष्पक्ष भएर काम गर्नुपर्छ । अहिले निर्वाचन आयोगले चुनाव चिह्नमा रङ कुन दिने भन्दा, रुखको रङ सबैलाई दिने रे । कस्तो अचम्मको निर्वाचन आयोग देखाप¥यो’, ओलीले भने, ‘कांग्रेसको रुख हरियो पार्नका लागि हरियो रङ चाहियो, कांग्रेसको रुख निलो पार्नका लागि निलो रङ चाहियो । सूर्य हरियो हुन्छ कहीँ ?’
आइतबारै काठमाडौंमा भएको कार्यक्रममा एकीकृत समाजवादीका अध्यक्ष नेपाल ओलीप्रति खनिए । उनले ओलीलाई यथास्थितिवादका प्रतिकका रूपमा अथ्र्याए । ‘केपी ओली यथास्थितिवादका प्रतिक हुन् । तिनी परिवर्तनका बहाक होइनन्, यथास्थितिका बाहक हुन् । प्रतिगामी चरित्रका एउटा नमूना हुन् । केपी ओली सबै ठाउँमा पराजित हुँदै गइरहेका छन्’, उनले भने ।
