काठमाडौं– नेकपा एमालेका अध्यक्ष केपी शर्मा ओलीले आउँदो निर्वाचनमा नेपाली कांग्रेसलाई आगामी १३ सिटमा झारिदिने बताएका छन् ।
एमालेको सम्पर्क समन्वय कमिटीले शनिबार काठमाडौंमा गरेको कार्यक्रमलाई सम्बोधन गर्दै ओलीले ६० वर्ष नाघेका कुनैपनि ज्येष्ठ नागरिकहरूले कांग्रेसलाई भोट नहाल्ने दाबी समेत गरे । त्यसका लागि चुनावी अभियानमा केन्द्रित हुन उनले कार्यकर्तालाई निर्देशन दिए ।
‘बुढो कांग्रेस पाँच वर्ष अघि २३ सिटमा झरेको होइन? कांग्रेसलाई १३ सिटमा झारिदिनु पर्छ अहिले, लाग्नुस् तपाईंहरू । बुढाबुढी, साठी वर्ष माथिका ज्येष्ठ नागरिकहरूले कांग्रेसलाई भोट हाल्दैनन् । अनि युवाहरू काँग्रेस, माओवादीबाट चेतिसकेका छन् । उनीहरूले पनि कांग्रेसलाई भोट हाल्दैनन्’, ओलीले भने ।
ओलीले माओवादी केन्द्रलाई गत संसदीय निर्वाचनमा आफूहरूले जोगाइदिएको टिप्पणी गरे । उनले अबको निर्वाचनमा माओवादी र माधव नेपालहरू पछि समाप्त हुने दाबी गरे । ‘एमालेलाई चौंथो पार्टी बनाउँछु भन्छ कोही । अहिले चौंथो पार्टी हो एमाले संसदमा? संसदमा एमालेसँग ९८ सिट छ। अरुको धेरै भएकाको पनि ६१ सिट छ । कोही हामीले बनाइदिएको ४८ सिट लिएर हामीले टाँसी दिएको जुँगामा ताउ लाउँछ ।
त्यसकारण म साथीहरूलाई भन्न चाहन्छु–यो गठबन्धन केही होइन।’ओलीले विभिन्न जालझेल, तिकडम र षडयन्त्र गरेर आफ्नो पार्टीलाई सरकारबाट हटाउने काम गरेको भन्दै अब फेरि हटुनुनपर्ने गरी आगामी निर्वाचनमा जित हासिल गर्नुपर्ने बताए ।
ओलीले चुनावमा गठबन्धन दलहरूले वेथिति गर्न सक्ने भन्दै कार्यकर्तालाई जबरजस्त तयार भएर खटिन निर्देशन पनि दिएका छन् ।‘चुनाव स्वतन्त्र, निष्पक्ष, शान्तिपूर्ण रूपमा सम्पन्न गराउनुपर्दछ । हलो जोत्ने मानिसले हातमा किताब लिएर होइन लौरो लिएर जोत्छ ।
गठबन्धनवालाले हामी जस्तो सदाचार इमान नैतिकता जस्ता कुरा बुझ्दैन’, उनले भने ,‘यिनका बेथिति रोक्न जबर्जस्त तयारी गर्नुपर्छ । बाकस आँखाबाट ओझेल हुन दिनु हुँदैन ।’
अहिलेको गठबन्धनलाई ठेगान लगाउन आफू पूर्ण रूपमा स्वस्थ्य रहेको भन्दै नथाक्ने उनको भनाइ छ । उनले कांग्रेसको पछाडि पछाडि कुद्नेहरूसँग एकताको कुरा गर्ने काम नै नभएको बताए ।
‘प्रचण्डजी तपाईं हामीले बनाइदिएको भाँडो हेरर बसिरहनुभएको छ । त्यसभित्रको त सकिसकेको छ । हामीले भरिदिएको भाँडो त सकिसकेको छ,’ ओलीले भने ,‘मेयर उपमेयरदेखि जनप्रतिनिधि र नेताहरू एमालेमा प्रवेश गरेको लस्कर देख्नुभएको छैन?’
माधव नेपाल नेतृत्वको नेकपा एकीकृत समाजवादी भने पार्टी नै नभएको ओलीको टिप्पणी छ ।
-1755862759.jpeg)
