[caption id="attachment_22977" align="alignnone" width="800"]
[/caption]
काभ्रेपलाञ्चोक– नेपाली कांग्रेसका महामन्त्री गगन थापाले निर्वाचनमा अन्य दलसँग कुनै पनि हालतमा गठबन्धन गर्न नहुने बताएका छन् । बुधबार बनेपा नगरसमितिद्वारा आयोजित बृहत् सम्मान तथा पार्टी प्रवेश कार्यक्रममा आफू निर्वाचनमा गठबन्धन गर्न नहुने पक्षमा रहेको बताए ।
उनले पार्टीलाई निर्वाचनमा तालमेल नगर्न सकेसम्म आग्रह गर्ने बताए । उनले सकेसम्म पार्टीलाई आफ्नो सिद्धान्तमा ल्याउन प्रयास गर्ने नसके पार्टीको निर्णय आफुले मान्ने बताए । निर्वाचनमा अन्य दलसँग गठबन्धनबारे केन्द्रीय बैठकमा गम्भीर छलफल हुने र पार्टीकै निर्णयअनुसार उम्मेदवार छान्दा मन परेन भन्न पाइने तर पार्टीले छानेको उम्मेदवार सबैको सर्वमान्य हुने उनले बताए ।
निर्वाचनमा कांग्रेस एक्लैले जितेर देखाउनुपर्ने उनको भनाई थियो । महामन्त्री थापाले आउँदो पाँच वर्ष कांग्रेसलाई मत दिन जनतालाई अनुरोध गर्न नेताकार्यकर्तालाई आग्रह गरे । उनले योजनासहित जनतामा जानुपर्ने बताए । उनले नेताहरूलाई पाँच वर्ष मत दिएर स्थानीय तह र संसदीय निर्वाचनमा जिता पछि जनताको विश्वास जित्नुपर्ने बताए । उनले स्थानीय मात्र नभई प्रदेश र संघमा पनि बहुमत ल्याउनुपर्ने सुझाव दिए । उनले आङ्खनो पार्टीले आउँदो पाँच वर्षका लागि बहुमत ल्याएर व्यवस्था ठिक ढङ्गले सञ्चालन गरी जनताको अवस्थामा सुधार गर्ने, युवालाई कतार र मलेसिया जानबाट रोक्न प्रयास गर्ने बताए ।
महामन्त्री थापाले पार्टीको जिल्ला, प्रतिनिधिसभा, प्रदेशसभा क्षेत्र तथा स्थानीय तहमा निर्वाचित पदाधिकारीलाई सम्मान गरेका थिए भने अन्य दलबाट कांग्रेसमा नवप्रवेशी करिब २०० लाई क्रियाशील सदस्यता प्रदान गरेका थिए । आयोजकले १४औँ महाधिवेशनमा महामन्त्री थापालगायत केन्द्रीय सदस्यमा निर्वाचितलाई सम्मान गरेको थियो ।
कार्यक्रममा पार्टी केन्द्रीय सदस्यत्रय मधुप्रसाद आचार्य, उर्मिला केसी र गणेश लामा, बागमती प्रदेश सभापति इन्द्र बानियाँ, प्रदेश महामन्त्रीद्वय कञ्चनचन्द्र वादे र राजु श्रेष्ठ, जिल्ला सभापति तीर्थ लामा, सचिव माधव ढकाल, प्रतिनिधिसभा क्षेत्रीय सभापतिद्वय महेश खरेल र दिनेश लामा, प्रदेशसभा क्षेत्रीय सभापति रामहरि श्रेष्ठलगायतले नवप्रवेशीलाई बधाई एवं शुभकामना ज्ञापन गर्दै पार्टीको ‘घर घर जाऔँ, कांग्रेस जिताऔँ अभियान’मा दत्तचित्त भएर लाग्न आग्रह गरेका थिए ।
-1755862759.jpeg)
