खाँदबारी– नेपाली कांग्रेसका महामन्त्री विश्वप्रकास शर्माले पार्टीको केन्द्रीय समितिको सुझावअनुसार नै गठबन्धनबारे निर्णय गरिने जानकारी गराएका छन् । सदरमुकाम खाँदबारीमा नेपाल प्रेस युनियनले आयोजना गरेको पत्रकार सम्मेलनमा महामन्त्री शर्माले अहिलेको गठबन्धन चुनावसम्म रहने नरहनेबारे पनि पार्टीको केन्द्रीय समितिले निर्णय गर्ने जनाए ।
उनले स्थानीय तह निर्वाचनलाई लक्षित गरी ‘घरघर जाऔँ, कांग्रेस जिताऔँ’ अभियान सञ्चालन गरि प्रचारप्रसार कांग्रेस एक्लैले गरिरहेको जानकारी गराउँदै गठबन्धनको बारेमा भने छलफल पश्चात मात्र निर्णय लिने बताए । उनले भने, ‘स्थानीय तहको निर्वाचनमा गठबन्धन गर्ने या नगर्ने भन्ने विषयको टुङ्गो चैत तेस्रो साता बस्ने केन्द्रीय समितिको बैठकले लगाउँछ ।’
पार्टीको केन्द्रीय समितिको सुझावअनुसार नै गठबन्धनबारे निक्र्योल गरिने बताउँदै स्थानीय तहको निर्वाचन वैशाख ३० गते नै हुने जानकारी गराए । उनले भने, ‘गठबन्धन गरेर होस् वा नगरी, स्थानीय तहको निर्वाचन वैशाख ३० गते नै हुन्छ ।’ उनले स्थानीय तह निर्वाचनलाई लक्षित गरी कांग्रेसले ‘घरघर जाऔँ, कांग्रेस जिताऔँ’ अभियान सञ्चालन गरिएको पनि बताए ।
महामन्त्री शर्माले कांग्रेसले पार्टी नयाँ ढंगको बनाउन र जनतासँग समन्ध स्थापित गर्न अभियान सञ्चालन गरिहेको बताउँदै भने, ‘जनतासँग समन्ध स्थापित गर्न ‘घरघर जाऔँ, कांग्रेस जिताऔँ’ अभियान सञ्चालन गरेका हौँ ।’
चुनावमा विचारको मुद्दा र विकासबारे बहस गर्नु जनताका लागि हितकार हुने हुनाले जनता यस्ता विषयमा उत्साहित हुनुपर्ने उनको भनाई थियो । उनले भने, ‘ चुनावमा विचारको मुद्दा र विकासबारे जनताले बहस गर्नु जरुरी छ ।’ उनले कांग्रेसले सत्ता सञ्चालन गरेको छोटो समयमा नै ७० प्रतिशतभन्दा बढी नागरिलाई कोरोना विरुद्धको खोप लगाउन सफल भएको शर्माले बताए । उनले भने, ‘सरकार जनताको स्वास्थ्य सम्बन्धी गम्भिर छ ।’
