त्रिशूली– प्रधानमन्त्री शेरबहादुर देउवाले एमसीसी अनुदानमा आएको रकम राष्ट्रको हितमा भएको दोहोर्याएका छन् । उनले यो ऋण नभएको पनि जानकारी गराए । नुवाकोटको किस्पाङ गाउँपालिकाको नयाँ प्रशासकीय भवनको उद्घाटन समारोहमा प्रधानमन्त्री देउवाले भने, ‘एमसिसी नेपालको विकासका लागि निःशुल्क प्राप्त भएको अनुदान भएकाले ऋण जतिपनि लिनुपर्ने, यस (एमसिसी)को त ब्याजसमेत तिर्नु नपर्ने भएकाले यो राष्ट्रको हितमा छ, अहित केही पनि गर्दैन ।’
उनले एमसिसी सम्झौता नेकपा (एमाले) नेतृत्वको सरकारले संसद्बाट पारित गर्न पेस गरेकाले अहिले त्यसैलाई अघि बढाएको बताए । यो परियोजनाले नेपालको विकासमा फड्को मार्न धेरै सहयोग गर्ने विश्वास व्यक्त गरे । उनले एमसीसी अनुदानमा आएको रकम भएको भन्दै केपी शर्मा ओलीको सरकार हुँदा यो संसद्मा ल्याइएको प्रस्ताव भएको बताए ।
त्यतिबेला एमाले नेता भीम रावलले संसद्मा ल्याउँदा केही पनि नबोलेको आरोप लगाउँदै अहिले आएर विरोध गरेको बताए । उनले उसबेला विरोध नगर्ने अहिले पास गर्दा विरोध गर्ने परिपाटी उनलाई नसुहाउने बताए । सरकारमा हँुदा एमसिसी चाहिन्छ भनेर संसद्बाट पास गर्नुपर्छ भनेर लाग्नेहरू अहिले सत्ताबाट बाहिर हुँदा विरोध गरेर दोहोरो चरित्र देखाएको आरोप लगाए ।
अनावश्यक कुराहरूमा नबहकिन उनले सबैलाई अनुरोध समेत गरे । कुनै पनि देशसँग ऋण लिदाँ वा अनुदान लिँदा राष्ट्रको हित विपरित गर्ने कुरा अहिलेको सरकारले कल्पना पनि गर्न नसक्ने उनले बताए । एमसीसीले गरिबी निवारण र विकासमा ठूलो सहयोग गर्ने उनको भनाइ थियो ।
प्रधानमन्त्री देउवाले स्थानीय तहको निर्वाचन नजिक आइसकेकाले त्यसलाई भयरहित वातावरणमा निष्पक्षरूपमा गराउन सरकार प्रतिबद्ध रहेको बताए । कार्यक्रममा नेपाली कांग्रेसका कार्यसम्पादन समितिका सदस्य अजुर्ननरसिंह केसी, प्रवक्ता डा प्रकाशशरण महत, केन्द्रीय सदस्य बहादुरसिंह लामा (तामाङ) नेकपा (एमाले)का केन्द्रीय सदस्य बिन्दा ढुङ्गाना, नेकपा (माओवादी केन्द्र)का प्रदेशसभा सदस्य हिरानाथ खतिवडालगायतका वक्ताहरूले नयाँ भवनको निर्माणले किस्पाङ गाउँपालिकाले प्रवाह गर्ने सेवामा थप गुणस्तरसहित जनतालाई सहजता पुग्ने विश्वास व्यक्त गरे । अध्यक्ष छत्रबहादुर लामाले विभिन्न स्रोतबाट जुटाइएको चार करोड ५६ लाखमा नयाँ भवन निर्माण गरिएको जानकारी दिए ।
