काठमाडौं - फागुनमा हुने नेकपा (एमाले) निकट नेपाल निजामती कर्मचारी संगठनको राष्ट्रिय अधिवेशनमा केपी ओलीले उद्घाटन गर्ने भएका छन् ।
काठमाडौंमा फागुन २८ र २९ गते हुने प्रमुख प्रतिपक्षी दल नेकपा (एमाले) निकट नेपाल निजामती कर्मचारी संगठनको ११औँ राष्ट्रिय अधिवेशनमा केपी ओलीले उद्घाटन गर्ने बिहीबार रिपोर्टर्स क्लबमा पत्रकार सम्मेलन गर्दै बताएका हुन् ।
संगठनले फागुन २८ गते एमालेका अध्यक्ष तथा पुर्व प्रधानमन्त्री केपी शर्मा ओलीको प्रमुख आतिथ्यमा कार्की ब्याङ्क्वेट थापाथली हाइट, काठमाडौंमा अधिवेशनको उद्घाटन हुने जानकारी दिएको हो ।
संगठनले आगामी फागुन २८–२९ गते हुने ११औं राष्ट्रिय अधिवेशनको सम्पुर्ण तयारी पुरा भएको पनि जनाएको छ । पत्रकार सम्मेलनमा बोल्दै संगठनका संयोजक केदारप्रसाद देवकोटाले ११औं राष्ट्रिय अधिवेशनको सम्पुर्ण तयारी पुरा भएको जनाएका छन् ।
उनले ७७ जिल्ला तथा ३६ विभागीय कार्य समितिहरुका अधिवेशन सम्पन्न भइसकेको बताए । उनकाअनुसार ६१९ जना केन्द्रीय प्रतिनिधिहरु निर्वाचित र अधिवेशन आयोजक समितिका २८२ जनासहित ९०१ जना प्रतिनिधिहरुको अधिवेशनमा सहभागिता हुनेछन् ।
उनले भने,‘सहकारी क्षेत्रबाट ६७ जना र आधिकारिक ट्रेड युनियनबाट १२१ जना प्रतिनिधि र कुल उपस्थिति प्रतिनिधिमध्ये १८२ जना महिला र ७१९ जना पुरुष प्रतिनिधिहरुको सहभागिता रहनेछ ।’
देवकोटाले अधिवेशनलाई सफल पार्न १४ उप–समितिहरु गठन गरी अधिवेशन तयारीका कामहरुलाई व्यवस्थित गरिएको बताएका छन् । उनले अधिवेशनले निजामती सेवाको सांगठनिक ढाँचा तथा स्वरुप, संघ, प्रदेश र स्थानीय निजामती सेवा ऐनमा समावेश हुनुपर्ने विषयहरुको बारेमा ब्यापक छलफल गरिने सुनाएका छन् ।
११औं अधिवेशनले कर्मचारीहरुसँग अनिवार्य कार्य सम्पादन सम्झौता ‘जहाँ सरकार, त्यहाँ ट्रेड युनियन’ लगायतका संगठनले लिने आगामी रणनीति र कार्यभरसमेत निर्धारण गर्ने जानकारी दिए । उनले अधिवेशनले आगामी ३ वर्षका लागि संगठनको नेतृत्व चयन गर्दै अधिवेशन समापन हुने बताएका छन्।
अधिवेशनको लागि भोलि फागुन २७ गते बेलुकासम्म सबै प्रतिनिधिहरु काठमाडौं आइसक्ने र टेर्ड युनियनलाई चुस्तदुरुस्त राख्न र भ्रष्टाचारमुक्त गराउने विषयमा छलफल केन्द्रीत हुने सुनाएका छन् ।
संगठनका केही सदस्यहरुले नयाँ कमिटी गठन गरेको उल्लेख गर्दै उनले उनीहरु जाँदैमा १ प्रतिशत भन्दा थोरै पनि संगठनलाई असर नपरेको स्पष्ट पारे । उनले नयाँ नेतृत्वको चयन मतदानमार्फत नभई सर्वसम्मत रुपले गर्ने पनि बताए ।
११औं राष्ट्रिय अधिवेशन आयोजक समिति प्रचार प्रसार विभागका संयोजक युवाचन्द्र घिमिरेले प्रेश विज्ञप्ती पढेर सुनाएका थिए । आजको पत्रकार सम्मेलनको सञ्चालन भने कार्यालय सदस्य तथा प्रवक्ता प्रभाष प्रसाद साहले गरेका थिए ।
-1755862759.jpeg)
