स्थानीय निर्वाचनका लागि कांग्रेसकाे अभियान

राजनीति

Home
राजनीति
स्थानीय निर्वाचनका लागि कांग्रेसकाे अभियान

स्थानीय निर्वाचनका लागि कांग्रेसकाे अभियान

साे अभियानमा विभिन्न आठ उद्देश्य रहेको पार्टी कार्यालयद्वारा आयोजित पत्रकार सम्मेलनमा उत्त जानकारी दिएकाे हाे ।

अभियानअन्तर्गत आगामी वैशाख ३० गते हुने स्थानीय तहको निर्वाचनमा मतदानमा सहभागी भई आफ्नो लोकतान्त्रिक अधिकार प्रयोग गर्न मतदातालाई अपिल गर्दै निर्वाचनको माहोल बनाउने उद्देश्य रहेको पार्टी प्रवक्ता डा प्रकाशशरण महतले जानकारी दिएका छन् । स्थानीय निर्वाचनमा कांग्रेसलाई विजयी गराउन वडा र टोल तहसम्म पार्टीभित्र सौहार्दता, एकता र ऊर्जा अभिवृद्धि गर्ने, कांग्रेसका उम्मेदवारलाई विजयी गराउन मतदातालाई अपिल गर्ने अभियानको उद्देश्य रहेको बताइएकाे छ । यसैगरी ‘हरेक काँधलाई भारी, हरेक हातलाई जिम्मेवारी’ को नीति साथ पार्टीको विधानमा व्यवस्था गरिएका विभिन्न जिम्मेवारी बाँडफाँट गरेर पार्टी पङ्क्तिलाई स्थानीय निर्वाचनमा बृहत्तर परिचालनतर्फ उन्मुख गराउने उनले बताए । कांग्रेसको नेतृत्वमा विगतमा हाँसिल राजनीतिक र आर्थिक उपलब्धि जनसमक्ष विस्तारित रूपमा राख्ने, विगतमा नेकपाको नेतृत्वको सरकारको गत तीन वर्षे कार्यकालमा भएका जनभावना विपरीतका गतिविधि, असंवैधानिक कदम र भ्रष्टाचार प्रकरण जनतासमक्ष व्यापकरूपमा राख्ने कांग्रेसको अभियान रहेकाे जनाएकाे छ । प्रतिपक्षमा रहनुपर्ने जिम्मेवारीका बाबजुद संविधान रक्षाका लागि बाध्यात्मकरूपमा सरकारमा जानु परेको यथार्थ जनसमक्ष राख्ने, कांग्रेसको नेतृत्वमा सरकार बनेपछि जनताको जीवन रक्षालाई प्रधान कार्यभार बनाएर सरकारले छोटो समयमा ७० प्रतिशत नागरिकलाई खोप लगाइसकेको र निर्वाचनसम्म पुग्दा प्रायलाई लगाइसक्ने योजना थप स्मरण गराउँदै जनतालाई कोरोना महामारीसँग अझै सतर्कताका लागि अपिल गरिने प्रवक्ता डा महतले जानकारी दिए । राष्ट्रिय सहमति निर्माण गरी हालसम्मको सबैभन्दा ठूलो अनुदान सहयोग परियोजना मिलेनियम च्यालेन्ज कर्पाेरेशन (एमसिसी) कांग्रेसका सभापति एवं प्रधानमन्त्री शेरबहादुर देउवाको सुझबुझपूर्ण नेतृत्वमा वर्तमान सरकारले संसद्बाट पारित भएको हुँदा त्यसबारे जनस्तरमा छरिएका भ्रम र दुष्प्रचारलाई बुँदागतरूपमा चिर्दै वास्तविकरूपमा राख्ने अभियानको उद्देश्य रहेकाे जनाएकाे छ । कांग्रेसले अभियान सुरु हुनु दुई दिनअघि सबै जिल्लामा पार्टीका केन्द्रीय प्रतिनिधि पुग्ने जनाएको छ । केन्द्रीय प्रतिनिधिलाई अभियान सुरु हुनुअघि तथा सुरु भएपश्चात् वडा तहको कार्यक्रमलाई प्रभावकारी बनाउन प्रेरित भूमिकाका लागि सबै स्थानीय तहमा एक पटक अनिवार्य पुग्ने जिम्मेवारी तोकिएको छ । अभियान सुरु हुनुभन्दा कम्तीमा दुई दिनअघि जिल्ला समितिको बैठक सम्पन्न गरेर सबै कार्यक्रम केन्द्रित कार्ययोजना तय गर्ने जिल्ला कार्यसमितिलाई निर्देशन गरिएको जनाइएकाे छ । केन्द्रबाट निर्धारित अभियानलाई व्यापक रूपले सफल बनाउन सम्पूर्ण एकता साथ परिचालित हुने, स्थानीय घोषणापत्र निर्माण समिति गठन गरेर अविलम्ब कार्य प्रारम्भ गर्ने, समितिमा पार्टी निकट शिक्षक, प्राध्यापक, वकिल, पत्रकारलगायतको बौद्धिक क्षेत्रको पनि सहभागिता गराउने, समितिमार्फत घोषणापत्र निर्माण संवाद कार्यक्रम आयोजना गरेर स्थानीयवासीको भावना समाहित गर्ने गरी पार्टीका पालिकालाई जिम्मेवारी दिइएको छ । सबै जिल्लामा एकै दिन एकै समयमा दिउँसो १ बजे एकसाथ जिल्लास्तरीय रूपमा उद्घाटन समारोह हुने सम्मेलनमा प्रवक्ता डा महतले जानकारी दिएका छन् । जिल्लास्तरीय उद्घाटन समारोहपश्चात् सम्पूर्ण कार्यक्रम स्थानीय तह, त्यसमा पनि मूलतः वडा र टोल केन्द्रित हुने जनाइएकाे छ ।

प्रकाशित मिति: बुधबार, फागुन २५, २०७८ १९:०२

प्रतिक्रिया दिनुहोस्