बुटवल– गृहमन्त्री बालकृष्ण खाणले अविकसित देशहरूको गरिबी र बेरोजगारी अन्त्य गर्नका लागि एमसीसी परियोजना ल्याएकोले त्यसको स्वागत गर्नुपर्ने धारणा व्यक्त गरेका छन् । नेपाल प्रेस युनियन रूपन्देहीले मंगलबार तिलोत्तमामा आयोजना गरेको कार्यक्रममा उनले एमसीसीको सहयोग लिनु नेपालको अधिकार भएको बताउँदै गरिबी र बेरोजगारी अन्त्य गर्नका लागि अमेरिकाले एमसीसी परियोजना ल्याएको जनाए ।
गृहमन्त्री खाणले सरकारमा रहेका दल र तिनका नेताहरूले नै एमसिसीबारे भ्रम फैलाएकोले एमसिसीबारे सत्यतथ्य उजागर गर्नुपर्ने बताए । उनले संसद्ले अनुमोदन गरेको व्याख्यात्मक घोषणामा एमसिसीमै भएकै जानकारी गराए ।
उनले एमसिसी राष्ट्रको हितमा हुँदाहुँदै पनि यसबारे अनेक भ्रम फिँजाइएकाले कार्यकर्ताले यसबारे जनतामाझ प्रष्ट पार्न आग्रह गरे ।
उनले एमसिसी अनुमोदन गरेकै कारण निर्वाचनमा हुने क्षतिलाई रोक्नका लागि मतदातामाझ यसबारेमा प्रष्ट पार्नु जरुरी रहेको बताए । उनले नेपालका धेरै कम्युनिस्ट पार्टी एमसीसीका विषयमा दोधारमा रहेको पनि टिप्पणी गरे । उनले राजनीतिको मूलधार बाहिर रहेका शक्तिलाई पनि संविधान स्वीकार गरेर मूलधारमा आउन आग्रह गर्दै सरकार त्यस्ता शक्तिसँग पनि सहकार्य गर्न तयार रहेको बताए । उनले मूलधारमा नआएका शक्तिलाई पनि अहिले राज्यले सुरक्षाको प्रबन्ध गरिरहेको जनाए ।
गृहमन्त्री खांणले कांग्रेस जहिले पनि नागरिकको अभिव्यक्ति स्वतन्त्रताको पक्षमा रहेको भन्दै वर्तमान सरकार पनि आलोचना सहन तयार रहेको बताए । उनले नागरिकको अभिव्यक्ति स्वतन्त्रता र प्रेस स्वतन्त्रता कुनै हालतमा सरकारले निषेध नगर्ने भन्दै सञ्चार क्षेत्रसँग सम्बन्धित कानूनमा कुनै संशोधन आवश्यक भए पनि सरकार त्यसका लागि तयार रहेको बताए ।
कार्यक्रममा नेपाली कांग्रेस लुम्बिनी प्रदेश सभापति अमरसिंह पुनले कांग्रेसको नेतृत्वमा मात्रै लोकतन्त्र र संविधानको रक्षा हुने बताए । कार्यक्रममा जीपी कोइराला स्मृति पत्रकारिता पुरस्कारबाट पत्रकारद्वय माधव नेपाल र हरिश ढकाललाई पुरस्कृत गरिएको थियो । गृहमन्त्री खाणले जनही २५ हजार राशिको पुरस्कार प्रदान गरे । त्यस अवसरमा नेपाली कांग्रेस रूपन्देहीका सभापति रामकृष्ण खाण, नेपाल प्रेस युनियनका पूर्वकेन्द्रीय उपसभापति हरि लम्साल, नेपाल पत्रकार महासंघ रूपन्देहीका अध्यक्ष रामराज पोखरेल, प्रेस चौतारी नेपाल रूपन्देहीका अध्यक्ष लक्ष्मण पौडेल, नेपाल प्रेस युनियन रूपन्देहीकी सभापति रेखा भुसाललगायतले मन्तव्य व्यक्त गरेको थिए ।
-1755862759.jpeg)
