म्याग्दी– गण्डकी प्रदेशका मुख्यमन्त्री कृष्णचन्द्र पोखरेलले धार्मिक पर्यटक भित्र्याउनका लागि ‘सर्किट’ बनाउन लागिएको बताएका छन् । म्याग्दीको बेनी नगरपालिका–१ मा सोमबारदेखि सुरु भएको ‘रत्नेचौर धार्मिक महोत्सव’ को उद्घाटन गर्दै मुख्यमन्त्री पोखरेलले धार्मिक पर्यटक भित्र्याउनका लागि गण्डकी, लुम्बिनी र मधेश प्रदेशको सर्किट बनाउन लागिएको बताए । उनले धार्मिकस्थललाई हवाई र सडक मार्गबाट जोड्न प्राथमिकता दिएका पनि जानकारी गराए ।
शनिबारदेखि पोखरा–जनकपुरधाम हवाई उडान सुरु गरिएको बताउँदै मुख्यमन्त्री पोखरेलले धार्मिक पर्यटनको विकासका लागि मुक्तिनाथ, लुम्बिनी, जनकपुरधाम र विन्धवासिनीलाई समेटेर धार्मिक सर्किट बनाउन लागिएको जनाए ।
मुख्यमन्त्री पोखरेलले गण्डकीका पर्यटकीय र धार्मिकस्थललाई पनि एकअर्कासँग जोडेर विकास गर्न थालिएको बताउँदै हिमाल र मधेसको समृद्धिमा एकअर्काको सम्बन्ध रहेको जनाए । निर्माणाधीन कालिगण्डकी कोरिडोर सडकलाई पूर्णता दिने र कोरला नाका खुलाएर चिनका वौद्धधर्मावलम्बीलाई लुम्बिनी तथा भारतका हिन्दू धर्मावलम्बीलाई मुक्तिनाथ भित्र्याउने योजनाअघि सारिएको उनको भनाई थियो ।
लक्ष्मीहरि मन्दिरका संस्थापक जीयर स्वामीले रत्नेचौर मुक्तिक्षेत्रको प्रवेशद्धार भएकाले यसको धार्मिक र पर्यटकीय दुवै किसिमको महत्व भएको बताए । रत्नेचौर क्षेत्रमा रहेको धार्मिक महत्वलाई उजागर तथा प्रचारप्रसार र लक्ष्मीहरि मन्दिरको चौतर्फी विकासका लागि महोत्सवले सहयोग पुग्ने अपेक्षा गरिएको वडाध्यक्ष एवं मुल आयोजक समितिका बरिष्ठ उपाध्यक्ष टेकबहादुर रावलले बताए ।
लक्ष्मीहरि मन्दिरको २५औँ रजतजयन्ती तथा संस्थापकचार्य जगतगुरु अनन्त विभूषित श्रीपराङ्कुशाचार्य यतिराज जीयर स्वामीको नक्षत्र शताब्दीको अवसरमा फागुन ३० गतेसम्म धार्मिक महोत्सव आयोजना गरिएको मूल आयोजक समितिका अध्यक्ष नेत्रबहादुर महतले बताए ।
मूल आयोजक समितिका उपाध्यक्ष चीरञ्जीवी बोगटीले मन्दिर स्थापना भएको २५ वर्ष र मन्दिरका संस्थापकाचार्य एक सय वर्ष पूरा भएको अवसरमा आयोजित महायज्ञमा संकलन हुने रकमलाई यस क्षेत्रको धार्मिक पर्यटन पूर्वाधार निर्माणमा परिचालन गरिने जानकारी दिए ।
-1755862759.jpeg)
