काभ्रेपलाञ्चोक– नेपाली कांग्रेसका नेता प्रकाशमान सिंहले स्थानीय तहको निर्वाचनमा तालमेलका लागि पार्टीले सातवटै तहका कार्यसमितिसँग छलफल गरी निर्णय लिने जनाएका छन् । काभ्रेपलाञ्चोकको धुलिखेलमा आयोजना गरेको नेपाली कांग्रेस काठमाडौं जिल्ला कार्यसमितिको ५०औँ बैठकमा उनले उक्त कुरा बताएका हुन् ।
उनले नेपाली कांग्रेस डेमोक्रेटिक पार्टी भएकोले सबैको राय अनुसार नै निर्णय लिने बताए । उनले अरु पार्टीमा जस्तो कांग्रेसभित्र कसैको फरक मत नरहेको बताए । उनले भने, ‘चुनावी तालमेलका बारेमा निर्णय गर्नका लागि सबै तहका कार्यसमितिहरूसँग राय लिइने छ ।’ उनले कांग्रेस एक्लै पनि चुनाव लड्न तयार भएको भए पनि कांग्रेस डेमोक्रेटिक पार्टी भएकोले केन्द्रीय कार्यसमिति, प्रदेश कार्यसमिति, जिल्ला कार्यसमिति, क्षेत्र कार्यसमिति, पालिका कार्यसमिति, वडा कार्यसमितिको पनि राय लिएर अगाडी बढ्ने बताए ।
कांग्रेसमा केन्द्रीय कार्यसमिति, सातै वटा प्रदेश कार्यसमिति, ७७ जिल्ला कार्यसमिति, १६५ संघीय निर्वाचन क्षेत्र कार्यसमिति, ३ सय ३० प्रदेश निर्वाचन क्षेत्र कार्यसमिति, ७ सय ५३ पालिका कार्यसमिति, ६ हजार ७ सय ४३ वडा कार्यसमिति रहेको छ । यी सबको विचार लिएर नै अगाडी बढ्ने उनले बताए । उनले भने, ‘यी सबको भ्यु प्वाइन्ट लिएर पार्टी एउटा डेमोक्रेटिक तवरले एक्सरसाइज गरेर के गर्दा राम्रो हुन्छ ।’
नेता सिंहले आम नेपाली जनताको चाहनाअनुसार सबै दलले राष्ट्र र जनतालाई केन्द्रमा राखेर राष्ट्र र जनताको हित हुनेगरी राष्ट्रिय सहमतिको वातावरण बनाएर अगाडि बढ्नुको विकल्प नभएको बताए । उनले संघीयतालाई संस्थागत गरी विकास निर्माणका कार्य अगाडि बढाउनुपर्ने पनि बताए । सुशासनलाई सर्वोपरि हितमा राखेर कदम अगाडि बढाउनु पर्ने हालको आवश्यकता भएको उनको भनाइ छ ।
उनले १४ औँ महाधिवेशनबाट पार्टी नयाँ ऊर्जा उत्पन्न भएको भन्दै चुनावको लागी कांग्रेस तयार भएको बताए । ‘कांग्रेस भर्खरै महाधिवेशन सम्पन्न भएको छ,’ सिंहले भने, ‘अर्गनाइजेसनमा उर्जा पैदा भएको छ । उर्जाअनुसार कांग्रेस एक्लै लड्नलाई पनि तयार छ ।’ प्रतिगमन रोक्न पाँच दलीय गठबन्धन बनेको र गठबन्धन सरकारले संविधानको भावना र मर्मअनुरूप सरकारले स्थानीय तहको निर्वाचन मिति तोकेको पनि बताए ।
गठबन्धन सरकार प्रतिगमन रोक्नका लागि बनेको सरकार भएकोले संविधानलाई ट्रयाकमा राख्ने, संविधानको भावना र मर्मअनुरूप सरकारले स्थानीय तहको निर्वाचन मिति तोकेको उनको भनाई थियो । उनले निर्वाचनको मिति तोकिसकेका कारण निष्पक्ष र धाँधलीरहित ढङ्गले निर्वाचन सम्पन्न गर्ने दायित्व सरकारको भएको भन्दै कांग्रेस नेतृत्वको सरकारले यो कार्य सफलतापूर्वक गर्नेमा आफू विश्वस्त रहेको
पनि बताए ।
