भक्तपुर– नेपाली कांग्रेसका महामन्त्री विश्वप्रकाश शर्माले कांग्रेसले कुनै पनि विषयमा राष्ट्रघात नगर्ने बताएका छन् । विहिबार मध्यपुरथिमि–४ बालकुमारीमा नेपाली कांग्रेस मध्यपुरथिमि नगर समितिले आयोजना गरेको प्रथम नगर सम्मेलनको उद्घाटन गर्दै उनले एमसिसी राष्ट्रघात हो भन्ने कुरा बेकार हो भन्दै कांग्रेसले कहिल्यै राष्ट्रघात गर्न नसक्ने बताए ।
उनले कुनै पनि देशको सैन्य रणनीति नेपाललाई स्वीकार्य नहुने बताउँदै एमसिसीमा सैन्य रणनीति नरहेको प्रष्ट पारे । एमाले अध्यक्ष ओली आफैँले मन्त्रिपरिषद्बाट निर्णय गराएर एमसिसी सम्झौता संसद्मा दर्ता गराएको भन्दै उनले संसद्मा नाराबाजी गरिरहँदा कुनै पनि दिन एमसिसी मूर्दावाद नभन्नु, एमसिसीका बारेमा बोल्दै नबोल्नु एमालेको पनि एमसिसीमा समर्थन थियो भन्ने पुष्टि हुने बताए ।
चुनाव अगाडि एमसिसी राष्ट्रघात हुने र चुनावपछि राष्ट्रहित हुन्छ भन्ने पक्षमा कांग्रेस नरहेको भन्दै महामन्त्री शर्माले कांग्रेसलाई चुनावपछि मात्रै एमसिसी पास गरौँ भन्ने प्रस्ताव आएको बताए । उनले भने, ‘अहिले पास गर्दा राष्ट्रघाती हुने, चुनावपछि गर्दा राष्ट्रघाती नहुने यो कस्तो कुरा हो ? राष्ट्रघात हो भने त चुनावअघि गरे पनि पछि गरे पनि राष्ट्रघात नै हो । त्यसैले कांग्रेसले राष्ट्रघात हुने काम गर्दैन ।’
एमसीसी चुनावपछि पास गरौँ भन्नेहरूले बानेश्वरमा उफ्रिरहेका युवाको भोटमात्रै हेरेको, तर कांग्रेसले त्यस्ता युवाको भविष्य पनि हेरेको उनको दाबी थियो । नेपाल गरिब देश भएकाले सैन्य रणनीतिबाहेक जुनसुकै देशको सहयोग पनि स्वीकारेर देशको विकासमा लगाउनुपर्ने उनको भनाई थियो ।
त्यस्तै महामन्त्री शर्माले आगामी वैशाख ३० गते हुने स्थानीय तहको निर्वाचनमा उमेर पुगेका प्रत्येक व्यक्तिलाई मतदानमा सहभागी हुन आह्वानसमेत गरे । उनले राजनीतिदेखि विरक्तिएर भोट हाल्न जान्न भन्ने मानसिकता नराख्न युवा वर्गलाई आग्रह गर्दै जस्तोसुकै अवस्था आए पनि मतदान गर्ने अधिकार प्रयोग गर्न सुझाव दिए । तर मतदान गर्ने बेलामा भने युवाले एकपटक गम्भीर भएर सोचेर भोट हाल्नुपर्ने बताए । उनले भने, ‘यसअघिको सरकारको समीक्षा गर्नुस्, अहिले कांग्रेस सरकार आएपछिको पनि समीक्षा गर्नुस्, मतदान गर्नुस् ।’
-1755862759.jpeg)
