चितवन– आइतबार प्रतिनिधि सभाबाट अनुमोदन भएको विवादित अमेरिकी आर्थिक सहायता परियोजना मिलेनियम च्यालेन्ज कर्पोरेसन (एमसिसी) सम्झौताको विरोधमा आह्वान गरिएको नेपाल बन्दको विभिन्न जिल्लामा मिश्रित प्रभाव परेको छ । १२ बुँदे व्याख्यात्मक घोषणा मन्त्रिपरिषद्बाट पारित गरी एमसिसी सम्झौता संसद्बाट बहुमतले अनुमोदन गरे पछि त्यसको विरुद्धमा विप्लव नेतृत्वको नेकपा, मोहन वैद्य नेतृत्वको नेकपा (क्रान्तिकारी माओवादी), ऋषि कटेल नेतृत्वको नेकपा, आहूती नेतृत्वको वैज्ञानिक समाजवादी कम्युनिष्ट पार्टी नेपाल, कर्णजीत नेतृत्वको नेकपा माओवादी केन्द्र समाजवादी र सिपी गजुरेल नेतृत्वको देशभक्त जनगणतान्त्रिक मोर्चाले सदनबाट अनुमोदन गरिएको एमसिसी खारेजीको माग गर्दै नेपाल बन्द आह्वान गरेका हुन् ।
बन्दको अवज्ञा गरेको भन्दै चितवनमा तीन वटा गाडीमा तोडफोड भएको छ । बन्धकर्ताहरूले भरतपुर ओरालोमा ना४ख ४३२५ नम्बरको भुस बोकेको ट्रक, रामपुरमा ना६ख ५५३४ नम्बरको इँटा बोकेको ट्रक र भरतपुर–७ बुद्धचोकमा प्रदेश ३–०१०२३ च ३६८४ नम्बरको भ्यानमाथि ढुंगा हानेर क्षति गरेको प्रहरीले जनाएको छ । सवारी साधनका सिसा फुटेका छन् ।
जबरजस्ती बन्द गराउँदै हिँड्ने छ जना बन्दकर्तालाई पक्राउ गरिएको जिल्ला प्रहरी कार्यालय चितवनका प्रवक्ता एवं प्रहरी नायव उपरीक्षक नरहरि अधिकारीले जानकारी दिए । प्रहरीले लायन्सचोकबाट धुव्र खड्का, मदन केसी, सुरेन्द्र बस्नेत, कुमार विकलगायतलाई पक्राउ गरेको हो । त्यस्तै बन्दका क्रममा सुर्खेतमा झडप भएको छ । प्रहरी र बन्दकर्ताबीचको झडपले वीरेन्द्रनगरको मंगलगढी चोक तनावग्रस्त बनेको हो ।
स्थिति नियन्त्रणमा लिन प्रहरीले दुई दर्जनभन्दा बढी सेल अश्रुग्याससमेत हानेको जिल्ला प्रहरी कार्यालय सुर्खेतका प्रवक्ता एवं डिएसपी रामप्रसाद घर्तीले जानकारी दिए । तर, आन्दोलनकारीहरूले भने विभिन्न गल्लीबाट निस्किएर प्रहरीमाथि ढुंगामुढा गरेका थिए । प्रहरीले १० जनाभन्दा बढी प्रदर्शनकारीलाई नियन्त्रणमा लिएको छ । कर्णाली प्रदेशको राजधानी वीरेन्द्रनगर सोमबार तनावग्रस्त बन्यो ।
सोमबार नेपाल बन्दमा आन्दोलनकारी र प्रहरीबीच झडप भएपछि वीरेन्द्रनगर तनावग्रस्त बनेको हो । जिल्ला प्रहरी कार्यालय सुर्खेतका प्रवक्ता एवं डिएसपी रामप्रसाद घर्ती सहितको टोली अहिले आन्दोलन भइरहेको स्थलमा छ । घर्तीका अनुसार ८ जना भन्दा बढी आन्दोलनकारीलाई नियन्त्रणमा लिइएको छ । विशेषगरी वीरेन्द्रनगरको मुख्य चोक मंगलगढी चोक तनावग्रस्त बनिरहेको थियो । स्थिति नियन्त्रणमा लिन प्रहरीले दुई दर्जन बढी अश्रुग्यास समेत हानेको थियो ।
बन्दका कारण लुम्बिनी प्रदेशका मुख्य मुख्य सहरहरू रुपन्देहीको बुटवल, भैरहवा, दाङको भालुवाङ, लमही, घोराही, बाँकेको नेपालगन्ज लगायतका क्षेत्रमा बन्दको आंशिक प्रभाव परेको छ । लुम्बिनी प्रदेशका जिल्लाहरूमा सार्वजनिक सवारीका साधन चलेका छैनन् । बन्दका कारण मुख्य राजमार्ग क्षेत्रका पसलहरू साथै सहरका मुख्य बजारहरू धेरैजसो बन्द रहे पनि आंशिक रुपमा खुलेका छन् ।
