दमौली– गण्डकी प्रदेशका मुख्यमन्त्री कृष्णचन्द्र नेपाली पोखरेलले गण्डकी प्रदेश सरकारले जनताको लागी निःशुल्क रगत पाउने व्यवस्था गरेको बताएका छन् । तनहुँको व्यास नगरपालिका–१० दुम्सीचौरस्थित भानु माध्यमिक विद्यालयको शनिबार आयोजित स्वर्ण महोत्सवमा मुख्यमन्त्री पोखरेलले प्रदेश सरकारले छोटो अवधिमै जनताको मन छुने कामको सुरुआत गरेको बताए ।
उनले मन छुने कामको सुरुआतको क्रममा प्रदेशका जनताले रगत निःशुल्क पाउँने व्यवस्था सरकारले गरेको बताए । उनले भने, ‘निशुल्क रगतको शुल्क सरकारले व्यहोर्छ ।’ उनले सरकारले फागुन १ गतेदेखि प्रदेशभर रगत निःशुल्क उपलब्ध गराउने निर्णय गरेको र उक्त निर्णयले जनतालाई राहत हुने बताए । उनले आफू नेतृत्वको सरकार गठन भएको आठ महिनामा जनताको मन छुने धेरै काम गरेको बताए ।
उनले सरकार गठन भएको धेरै समय नभए पनि जनतालाई राहत पुग्ने केही कामको सुरुआत गरेको बताए ।
मुख्यमन्त्री पोखरेलले प्रदेशभित्रका अस्पतालमा निःशुल्करूपमा डायलासिस गर्ने क्षमता वृद्धि गर्ने सरकारको सोच रहेको बताए । प्रदेशभित्र हाल ५५० जना डायलासिस गर्नुपर्ने बिरामी रहे पनि १७५ ले मात्रै निःशुल्क सेवा पाइरहेकाले सुविधा विस्तार गर्नुपर्ने अवस्था रहेको उनको भनाइ थियो ।
मुख्यमन्त्री पोखरेलले प्रदेशअन्तर्गतका ११ वटै जिल्लामा सडकमा बेवारिसे अवस्थामा जनता भौतारिन नपरोस् भन्नका लागि मानव सेवा आश्रमसँग सम्झौता गरी त्यस्ता व्यक्तिको व्यवस्थापन गरिएको बताए । सरकारले पोखरामा दुई र लमजुङमा एउटा मानव आश्रमसँग सम्झौता गरी प्रतिव्यक्ति तीन हजार दिने गरी सडकमा बेवारिसे अवस्थामा रहने व्यक्तिको व्यवस्थापनका लागि बजेट विनियोजन गरेको उनले जानकारी दिए ।
सरकारले शिक्षा नीति ल्याएको र सोही नीतिमा रहेको ऐन बनाउनुपर्ने अवस्था रहेको उनको भनाइ थियो । कोभिडबाट मृत्यु भएकाका परिवारलाई ५० हजार राहत दिने र अभिभावक गुमाएका बालबालिकालाई १८ वर्ष उमेर नपुगेसम्म मासिक पाँच हजार राहत दिने कामको सुरुआत भएको मुख्यमन्त्री पोखरेलले बताए ।
-1755862759.jpeg)
