काठमाडौं– अवैध व्यापारबाट कमाएको पैसाको स्रोत खुलाउन नसकेपछि व्यवसायीद्वय कैलाश गोयल र श्रवण गोयल संकटमा फसेका छन् । उनीहरूमाथि शक्ति केन्द्र र पैसाको आडमा सरकारी कर्मचारीलाई हातमा लिइ अवैध कारोबार गरेको आरोप छ । व्यवसायीद्वयले भन्सार विभागका उच्च अधिकारीहरूसँगको मिलेमतोमा न्यून विजकीकरण गरेर सवारीसाधन आयात गरी करोडौं रूपैयाँ कर छली गरेको खुलेको छ ।
यसरी कमाएको रकमबाट बालुवाटारस्थित ललितानिवासको जग्गा किनेका कैलाश र श्रवण जग्गा खरिद गर्दा बुझाएको पैसाको स्रोत देखाउन नसकेपछि अहिले मानसिक तनावमा परेको उनीहरूसँग निकट रहेका एक व्यवसायीले बताएका छन् ।
यी दुई दाजुभाइसहित पाँच जना मिलेर १५ वर्षअघि किनेको जग्गामा विवाद उत्पन्न भएसँगै उनीहरूले उक्त रकमको स्रोत देखाउन सकेका छैनन् । गोयल परिवारले भाटभटेनी सुपरमार्केटका सञ्चालक मीनबहादुर गुरुङसँग बालुवाटारको २२ रोपनी जग्गा प्रतिआना सात लाख ३५ हजार रूपैयाँका दरले डिएलएफ डेभलपर्स प्रालिको नाममा किनेका थिए । मालपोत कार्यालयले त्यतिबेलाको चलनचल्तीको मूल्यमा जग्गा किन्दा एक करोड १० लाख रूपैयाँ कर असुली गरेको थियो ।
उक्त जग्गा किन्दा तत्कालीन समयमा गोयल परिवारले गुरुङलाई २५ करोड रूपैयाँभन्दा बढी करबाहेक बुझाएका थिए । अहिले गोयल दाजुभाइसहितको टिमबाट कम्पनीका अध्यक्ष कैलाशले विशेष अदालतमा मुद्दा खेपिरहेका छन् ।
ललितानिवासको सरकारी जग्गा मालपोत तथा नापी कार्यालयका कर्मचारी र भूमाफियाहरूले व्यक्तिको नाममा दर्ता गरेपछि त्यसमध्ये २२ रोपनी डिएलएफ डेभलपर्स प्रालिलाई मोटो रकम लिएर बिक्री गरेको आरोप लागेको छ ।
डिएलएफ डेभलपर्सका अध्यक्षसमेत रहेका व्यवसायी कैलाशले भने आफूहरू पीडित भएको बताउँदै आएका छन् । उक्त जग्गा खरिद गर्दा बुझाएको पैसाको स्रोतबारे प्रश्न गर्दा उनी केही बोल्न चाहँदैनन् । अख्तियार दुरूपयोग अनुसन्धान आयोगले दर्ता गरेको मुद्दामा विशेष अदालतले एक करोड ५० लाख रूपैयाँ धरौटी लिएर उनलाई छोडेको थियो । मुद्दा भने अझै किनारा लागिसकेको छैन ।
गोयल परिवारले कसैले गलत जग्गा दर्ता गराएको वा नक्कली जग्गा दर्ता गरेको भन्ने आफूहरूलाई थाहा नहुने बताउने गरेको छ । आफूहरूले फिल्ड हेरेर नै जग्गा किनेको दाबी गोयल परिवारले गर्दै आएको छ । गोयल परिवारले अवैधरूपमा सामान नेपाल भित्र्याउने र अत्यधिक महँगोमा बिक्री नर्ने गरेको आरोपसमेत लाग्दै आएको छ । कर, राजस्व, आयकरका साथै मूल्यअभिवृद्धि कर (भ्याट) समेत ठूलो मात्रामा छली गर्दै आएको उक्त परिवारले अवैधरूपमा न्यून भन्सार मूल्यांकन गरेर भित्र्याउने गरेका छन् । भन्सारका कर्मचारी र केही व्यापारीको मिलेमतोमा कम भन्सार मूल्यांकन गरी महँगा गाडी नेपाल भित्र्याउने कार्य हुँदै आएको छ ।
साउथ चाइना एक्जिम लिमिटेडबाट नेपालका लागि टेस्ला कारको प्याकिङ लिस्ट जारी गरेको नक्कली कागजातमा गाडी नेपाल भित्र्याउनेमा गोयल समूह अगाडि रहेको छ । साउथ चाइनाले नेपालको अरेटी इन्टरनेसनल टंगाल काठमाडौंको नाममा विल नम्बर एआर २२९२०२५९ आर टेस्ला कार पठाएको भेटिएको छ । ४९ हजार डलरमा बिक्री भइरहेको टेस्ला कार नेपाल ल्याउँदा ३५ हजार डलरमा किनेको नक्कली बिल पेस गरी न्यून भन्सार मूल्यांकनबाट राजस्व छली गरेको प्रस्ट देखिन्छ । अरेटी इन्टरनेसनलले यसमा प्रयोग भएको मोटर क्षमतासमेत झुक्याएर १५ प्रतिशतमात्रै अन्तः शुल्क तिरेर ल्याएको पाइएको छ ।
गाडीको भन्सार मूल्य ४१ लाख ६० हजार ४५० रूपैयाँ देखाइएको छ । भन्सार शुल्कबापत १६ लाख ६४ हजार रूपैयाँ तिरिएको उल्लेख गरेको छ । तत्कालीन अर्थमन्त्री डा. युवराज खतिवडाले गत वर्षको माघ १३ गते मन्त्रीस्तरीय निर्णयमार्फत् आर्थिक ऐनको गलत व्याख्या गरेर ती गाडी छोड्नका लागि बाटो खोलिदिएसँगै अवैध धन्दाले प्रश्रय पाएको थियो । यसरी अवैधरूपमा कानुनी छिद्रालाई प्रयोग गरी श्रवण गोयल र राकेश अदुकिया नामक व्यापारीले नेपालमा ‘ज्यागुआर ल्याण्डरोभर अटोमोटिभ पिएलसी’ भन्ने बेलायती बहुराष्ट्रिय कम्पनीको गाडीसमेत आयात गरेको भेटिएको छ ।
उनीहरूले भन्सार कर्मचारीसँगको मिलिमतोमा ल्याण्डरोभर, रेञ्जरोभर र ज्यागुआर गाडीहरू कम भन्सार मूल्यांकन गरेर नेपाल भित्र्याएर अत्यधिक मूल्य निर्धारण गरी बिक्री गर्दै आएको पाइएको छ । ज्यागुआर ल्याण्डरोभर अटोमोटिभ पिएलसी वा त्यसको सहायक कम्पनीले किशोर गियरलाई गाडी बिक्रीको अनुमतिसमेत दिएको छैन, र उसले नेपालका लागि आधिकारिक बिक्रेता पनि नियुक्त गरेको छैन । यही कम्पनीको नामबाट उक्त अवैध धन्दा गरिँदै आएको खुलेको छ । आर्थिक ऐनको दफा १२ को खण्ड ‘ङ’ मा लेखिएको छ– ‘यस उपदफाको खण्ड ‘क’ (माथि उल्लिखित व्यवस्था) वा खण्ड ‘ख’ (प्रयोग भइसकेका सवारीसाधन पैठारी गर्न नपाइने व्यवस्था) मा उल्लिखित सर्तहरू उल्लंघन गरी पैठारी गरिएका सवारी वा ढुवानीका साधनहरू जफत गर्न सकिनेछ ।’ तर, उक्त ऐनलाई समेत लत्याउँदै गोयल समूहले अवैध व्यापार गरिरहेको छ ।
अहिले आर्थिक ऐनको गलत व्याख्या गरेर जुन गाडीको भन्सार जाँचपास गरिँदै छ, ती गाडी पनि मुलुकका ‘हाइ प्रोफाइल’ उद्योगपति, व्यापारी र सञ्चार उद्यमीहरूले आफू चढ्नका लागि भित्र्याउन लागेको भनिए पनि अन्त्यमा ती गाडीहरू महँगो मूल्यमा अन्यत्र बिक्री गर्नकै लागि नेपालमा आयात गरिँदै आएको छ । ती गाडीको आधिकारिक वेबसाइटमा गाडीको स्पेसीफिकेसन अनुसार अमेरिकामा यसको मूल्य ५४ हजार ९९० अमेरिकी डलर रहेको छ । चीनमा अर्कै ब्याट्री प्रयोग गरेकाले ४७ हजार ९५० अमेरिकी डलर पर्ने उल्लेख छ । तर, नेपालमा भने ती गाडीहरू ३५ हजार अमेरिकी डलरमा आयात भएको भन्दै त्यही मूल्यमा भन्सार तिरेको देखिन्छ । नेपालमाभन्दा अन्य देशमा उक्त गाडीको मूल्य कसरी फरक पर्यो भन्ने विषय रहस्यमय रहेको छ ।
-1755862759.jpeg)
