काठमाडौं– प्रमुख सत्तारूढ दल नेपाली कांग्रेसका नेता तथा पूर्वमन्त्री मीन विश्वकर्माले एमसिसी पास गराउनका लागि आवश्यक सबै विकल्प र उपाय अपनाउने दाबी गरेका छन् । उनले एमसिसीलाई लिएर राष्ट्रिय राजनीति गिजोल्न नहुने टिप्पणी गरे ।
बुधबार काठमाडौंमा आयोजित साक्षात्कारमा बोल्दै नेता विश्वकर्माले यस्तो बताएका हुन् । उनले भने, ‘मुलुक यतिबेला सबैभन्दा पेचिलो, अप्ठ्यारो ठाउँमा पुगेको छ । विगतमा अत्यन्तै जटिल राजनीतिक अवस्था बनेपछि यो सरकार सबै ठाउँमा ठोक्किएर बनेको हो । यो सरकारसामु एउटा चुनौती आयो । एमसिसी पास गराउन प्रधानमन्त्रीज्यू लाग्नुभएको छ, उहाँ यसमा सफल हुनुहुनेछ ।’
एमसिसीलाई पहिलो पत्र नेकपा एकीकृत समाजवादी पार्टीका अध्यक्ष माधवकुमार नेपालले लेखेको उनले दाबी गरे । ‘झलनाथ खनाल, बाबुराम भट्टराई उहाँहरू प्रधानमन्त्री हुँदा एमसिसीको प्रक्रियामा सहभागी हुनुभएको छ, तर यहाँ त प्रधानमन्त्री र रक्षामन्त्री भइसकेकाले पनि नबुझी कमेन्ट गर्ने काम भयो । यो गलत हो,’ उनले भने ।
नेता विश्वकर्माले एमसिसी देशको हितमा भएको जिकिर गरे । उनले देश ठप्प पारेर हिँड्ने कुरा कांग्रेसलाई मान्य नहुने बताए । एमसिसी पास गराऔं भनेर प्रधानमन्त्री शेरबहादुर देउवाले पनि बारम्बार भनिरहेको उनले सुनाए । अहिले एमसिसीलाई लिएर कांग्रेस ‘हाम्रो घरमा कोही काम गर्ने भएनन्, बाहिरको आउनुहोस् भन्ने अवस्था’मा पुगेको समेत बताए ।
सोही कार्यक्रममा बोल्दै प्रमुख प्रतिपक्षी दल नेकपा (एमाले) का नेता तथा पूर्वमन्त्री कर्णबहादुर थापाले एमसिसीलाई लिएर सत्ता गठबन्धनले नाटक देखाउन नहुने टिप्पणी गरे । उनले भने, ‘जहाँसम्म एमसिसीको प्रावधानको विषयमा हाम्रो दृष्टिकोण छ, यो सडकमा प्रचार गरेजस्तो, त्यस प्रकारको सम्झौता होइन । यो विकास परियोजना हो । कुनै विदेशीलाई गाली गरेर राष्ट्रवादी भइन्छ भन्ने चिन्तनबाट एमाले मुक्त छ ।’
एमसिसी नेपालको हितमा रहेको उनले बताए । ‘यो राष्ट्रघाती छ भनेर भएको प्रचारमा कुनै सत्यता छैन । यसमा हामी स्पष्ट छौं । एमालेले पास गर्ने कि फेल गर्नेबारे केही भन्न जरुरी छैन । सरकारले एमसिसी पेस गरिसकेको छ । सरकारले पेस गरेको प्रस्ताव फेल गर्छु भन्नु अनैतिक कुरा हो ।
उहाँहरूले सरकार छोेडेपछि एमालेले निर्णय गर्छ,’ थापाले भने । अहिलेको सरकारले सदनमा पेस गरेका कुनै पनि विजनेसमा सरकारमा सहभागी भएका दलहरू नै बढी जिम्मेवार हुने उनको भनाइ छ । उनले एमसिसीको सम्बन्धमा नेकपा (माओवादी केन्द्र) र नेकपा (एकीकृत समाजवादी) को भूमिकालाई लिएर आपत्ति जनाए ।
