काठमाडौं –नेपाली कांग्रेसकले अमेरिकी सहयोग परियोजना एमसिसीलाई संसदबाट अनुमोदन हुनेमा विश्वस्त रहेको छ । सोमबार नेपाली कांग्रेसका प्रवक्ता डा.प्रकाशशरण महतले एमसिसी संसदबाट अनुमोदनमा सत्तारुढ दलहरुले सहयोग गर्ने विश्वास व्यक्त गरेका हुन् ।
सञ्चारकर्मीहरुसँग कुरा गर्दै कांग्रेस प्रवक्ता महतले भने, ‘उहाँहरुले जसरी टेबल गर्न सहयोग गर्नुभयो, त्यसरी नै अनुमोदन गर्न सहयोग गर्नुहुन्छ भन्ने हाम्रो विश्वास छ । कसरी प्रस्तुत हुनुहुन्छ, १२ गतेपछि थाहा हुन्छ । सरकारले आइतबार प्रतिनिधिसभा बैठकमा एमसिसी सम्झौता पेश गरेको छ र संसदको अर्को बैठक फागुन १२ गते बोलाइएको छ ।
एमसीसी अनुमोदनका लागि सत्तारुढ दलहरुसँगै प्रमुख विपक्षीसँग पनि सम्वाद गरिरहेको भन्दै उनले सत्तारुढ गठबन्धनमा समस्या नआउने विश्वास व्यक्त गरेका छन् ।
‘कुन रुपमा सहयोग गर्नुहुन्छ हेर्न बाँकी छ, तर पास नहुने अवस्था आउँदैन ’ महतले भने ।
पूर्व परराष्ट्रमन्त्री समेत रहेका महतले एमसिसीलाई नेपालमा अनावश्यक राजनीतिकरण गरिएको र राष्ट्रघाती भनिएको बताएका छन् ।एमसीसी जस्तो सहयोग जसले दिए पनि आँखा चिम्लिएर स्वीकार गर्ने उनको भनाई छ ।उनले भने, ‘बीआरआईमा मैले नै सही गरेको हुँ । नेपालको हित हुने कुनै पनि सहयोगलाई स्वागत गर्छौं ।’
