काठमाडौंं- अमेरिकी सहयोग नियोग मिलिनियम च्यालेञ्च कर्पोरेसन (एमसिसी)सँगको सम्झौता सरकारले प्रतिनिधिसभामा टेबुल गरेकोप्नति नेपाल कम्युनिष्ट पार्टीले विरोध जनाएको छ। उक्त पार्टीले सोमबार विज्ञप्ति जारी गरी सरकारको उक्त कदम राष्ट्रघाती भएको भन्दै भर्त्सना गरेको छ।
प्रतिनिधिसभामा एमसीसी सम्झौता टेबुल गरिएसँगै सार्वभौमसत्ता सम्पन्न संसद् र सांसदहरुको पनि अपमान भएको नेकपाको भनाइ छ।
'एमसिसी नेपालको संविधान, संसद्, सर्वाेच्च अदालत र ऐन कानुनभन्दा माथि राखिएको र हिन्द-प्रशान्त रणनीतिको अभिन्न अंग मानिएको तथा अमेरिकी उच्च अधिकारीद्वारा बारम्बार भनिँदै र स्वीकारिँदै आएको छ। नेपाललाई प्रत्यक्ष अमेरिकी सैन्य गुटमा संलग्न गराउने उद्देश्यले अनुदानको नाम दिएर गरिएको यो सम्झौता गरेर नेपाललाई विश्वका शक्ति राष्ट्रहरुबीच परस्पर द्वन्द्वको अखडा बनाउने निहीत स्वार्थमा प्रत्यक्ष परोक्ष फसाउँदै लगिएको प्रस्ट छ,' विज्ञप्तिमा उल्लेख छ।
यो सम्झौताले नेपालको परराष्ट्र नीतिलाई छिन्नभिन्न पार्ने तथा नेपाललाई अवाञ्छित रणमैदानमा परिणत गर्ने नेकपाको दाबी छ। सम्झौता अपमानजनक भएको बताउँदै नेकपाले एमसिसीलाई अस्वीकार गरी खारेजी गर्नुको विकल्प नभएको बताएको छ।
'नेपाल र नेपाली जनताको भाग्य र भविष्यमाथि ठाडै खेलवाड गर्ने र अमेरिकी स्वार्थको हित गर्ने सम्झौता खारेज गराउन नेपाली जनता एकताबद्ध भएर राष्ट्रव्यापी संयुक्त आन्दोलनमा उत्रनुपर्छ,' विज्ञप्तिमा भनिएको छ, 'बाह्य हस्तक्षेपका विरुद्ध खासगरी एमसीसी खारेजीका लागि संघर्षरत जनसमुदायमाथि सुरक्षा निकायहरुबाट भइरहेको बर्बर दमन रोक्न र दमन गर्नेहरुमाथि कडा कारबाही गर्न राज्यसँग नेपाल कम्युनिष्ट पार्टी माग गर्दछ।'
