[caption id="attachment_20582" align="aligncenter" width="1200"]
काठमाडौं- प्रतिनिधिसभा बैठक पुन: ६ फागुनमा बस्ने गरी स्थगित भएको छ। बुधबारको बैठक करिब पाँच मिनेट बसेर स्थगित भएको हो।[/caption]
बैठक सुरु हुनासाथ प्रमुख प्रतिपक्षी दल नेकपा एमालेका सांसदहरुले नाराबाजी गरेका थिए । नाराबाजीका बीच सभामुख अग्निप्रसाद सापकोटाले संसद् बैठक अघि बढाए।
बैठकमा प्रधानमन्त्री शेरबहादुर देउवाको तर्फबाट कानुन, न्याय तथा संसदीय मामिलामन्त्री दिलेन्द्रप्रसाद बडुले थारु आयोगको प्रतिवेदन पेस गरे। त्यस्तै तीन जना पूर्वसांसदको निधनप्रति शोक प्रस्ताव पनि बैठकले पारित गरेको छ।
बुधबारको बैठकमा अमेरिकी सहयोग परियोजना एमसिसी टेबुल गर्ने तयारी सरकारले गरेको भए पनि अन्तिममा हुन सकेन। सत्ता गठबन्धनको दल नेकपा माओवादी केन्द्रको संसदीय दलको बैठकले एमसिसी टेबुल गरिए त्यसको विपक्षमा मतदान गर्ने र सरकारबाट बाहिरिने निर्णय गरेको थियो।
संरसदीय दलको बैठकबाट उक्त निर्णय पारित भएलगत्तै माओवादी अध्यक्ष पुष्पकमल दाहाल प्रचण्डु र प्रधानमन्त्री देउवाबीच बालुवाटारमा भेटवार्ता भएको थियो।
उक्त वार्तामा सत्ता गठबन्धनका नेताहरुबीच छलफल गरेर मात्र एमसिसी टेबुल गर्ने सहमति भएपछि बुधबारको संसद् बैठकमा यो प्रस्ताव नपरेको हो।
संसद् बैठकको कार्यसूची तय गर्न सभामुख अग्निप्रसाद सापकोटाले बोलाएको कार्यव्यवस्था समितिको बैठकले पनि एमसीसी अनुमोदनको विषय कार्यसूचीमा नराख्ने निर्णय गरेको थियो।
बुधबार संसद्मा एमसिसी अनुमोदनको प्रस्ताव टेबुल गर्न लागेको विरोधमा नयाँ बानेश्वर क्षेत्रमा विरोध प्रदर्शन भएको थियो। उक्त प्रदर्शनमा सत्तारुढ दलका नेताहरुसमेत सहभागी भएका थिए।
