काठमाडौं – निर्वाचन आयोगले आगामी ३० बैशाखमा हुने स्थानीय तह निर्वाचनको कार्यतालिका तयार पारिरहेको छ । बैशाख २ मा उम्मेदवारी दर्ता गर्ने गरी निर्वाचन कार्यतालिका तयार भइरहेको आयोग स्रोतले जानकारी दिएको छ । आयोगले केही दिनभित्रै निर्वाचन कार्यतालिका औपचारिक रूपमा सार्वजनिक गर्ने तयारी गरेको छ । हाल प्रारम्भिक रूपमा निर्वाचन कार्यतालिका तयार पारिएको र त्यसलाई अन्तिम रूप दिएर चाडै सार्वजनिक गरिने आयोगका प्रवक्ता शालिग्राम पौडेलले जानकारी दिएका छन् ।
आयोगले तयार पारेको प्रारम्भिक कार्यतालिकाअनुसार आगामी ६ चैतदेखि निर्वाचन प्रयोजनका लागि दल दर्ता खुलाइने छ । दल दर्ता सकिएपछि निर्वाचन आचारसंहिता लागू हुने र सम्भावित खाका फेरबदल हुन सक्ने स्रोतले बताएको छ । आयोगको प्रारम्भिक खाकाअनुसार १४ बैशाखमा उम्मेदवारको अन्तिम नामावली सार्वजनिक गरिनेछ । निर्वाचनको पहिलो प्रक्रियाका रूपमा मतदाता नामावली सार्वजनिक गर्नुपर्छ, तर आयोगले मतदाताको विवरण तयार गरिसकेको छैन ।
५ पुस ०७७ सम्ममा देशभर १८ वर्ष पूरा भएका १ करोड ६२ लाख ४३ हजार ११० जना मतदाता थिए । यसमा महिलाको संख्या ८० लाख ३० हजार ९८४ र पुरुषको संख्या ८२ लाख ११ हजार ९५४ तथा तेस्रोलिंगीहरूको संख्या १७२ जना थिए । प्रमुख निर्वाचन आयुक्त दिनेश थपलियाले अन्तिम मतदाता नामावली प्रकाशन गर्नका लागि कम्तिमा ३५ दिन लाग्ने बताएका छन् । यसबीचमा आयोगले अभियानकै रूपमा मतदाता नामावली संकलन कार्यलाई अघि बढाएको थियो । करिब एक वर्षसम्म संकलन गरिएका मतदाताहरूको विवरण अद्यावधिक गर्ने काममा केही समय लाग्ने आयोगले जनाएको छ । सबै विवरण अद्यावधिक भइसकेपछि अन्तिम नामावली प्रकाशन गरिने छ । ‘अन्तिम मतदाता नामावली सार्वजनिक हुन कम्तीमा ३५ दिन लाग्न सक्छ । आयोगले तयार गरेको नामावली वडा तहसम्मबाट रुजु भएपछि मात्रै सार्वजनिक गरिन्छ’ प्रमुख आयुक्त थपलियाले भने ।
यसपटकको स्थानीय तहको निर्वाचनमा १ करोड ७८ लाख मतदाता हुने आयोगले अनुमान गरेको छ । ०७४ को स्थानीय चुनावमा १ करोड ४० लाख ७४ हजार ४२४ जना मतदाता थिए । आयोगका प्रवक्ता शालिग्राम पौडेलले स्थानीय निर्वाचनसम्बन्धी नियमावली, निर्देशिका, कार्यविधिमा संशोधन गर्नुपर्ने प्रावधान पहिचान गर्न, कर्मचारी व्यवस्थापन गर्न, बजेट तर्जुमालगायतको काम गर्न छुट्टाछुट्टै कार्यदल बनेको जानकारी दिए । ‘आन्तरिक कार्यतालिका बनाइरहेका छौँ । मतदाता नामावली संकलन स्थगन ग¥यौँ । अहिले प्रशोधनमा लागेका छौँ’ उनले भने ।
स्थानीय तहको निर्वाचन हुन अब ९३ दिन मात्रै बाँकी छ । आयोगले निर्वाचनको मिति नजिकिँदै जाँदा तयारी तीव्र पारेको छ । सामान्यतया आयोगले निर्वाचनको तयारीका लागि १२० दिन आवश्यक पर्ने बताउँदै आएको छ । तर, यसपटक आयोगले तयारीका लागि त्यति समय पाएको छैन । सरकारले गएको सोमबार मात्र निर्वाचन मिति घोषणा गरेपछि आयोगलाई तयारीमा दबाब थपिएको हो ।
