काठमाडौं– नेपाली कांग्रेसनिकट नेपाल सांस्कृतिक संघले आगामी ३० बैशाखमा हुने स्थानीय चुनावको लागि नेपाली कांग्रेसको प्रचारप्रसारको लागि केन्द्र, प्रदेश, जिल्ला र स्थानीय तहका संगठनहरूलाई सक्रिय बनाउने भएको छ ।
बुधबार राजधानीमा पत्रकार सम्मेलन गर्दै संघले कांग्रेसलाई बहुमत दिलाउन सांस्कृतिक कार्यक्रमसहित ७७ वटै जिल्लाका जनताको घरआँगनमा पुग्ने जानकारी गराएको हो ।
संघले चैत मसान्तभित्र नेपालका ७ सय ५३ पालिकामा समग्र संगठनात्मक संरचना निर्माण गरी ती संगठनहरूद्वारा स्थानीय, प्रदेश र संघको निर्वाचनहरूमा सहभागिता जनाउने संकल्प र निर्णय पनि गरेको छ । कार्यक्रममा बोल्दै नेपाल सांस्कृतिक संघका सभापति तीर्थबहादुर थापाले कांग्रेस सबैको जनताको समस्या समाधान गर्ने, मजबुत पार्टी, देशको रक्षा, संरक्षण गर्ने ऐतिहासिक पार्टी भएको बताए ।
कांग्रेसबिना यो मुलुकको समृद्धि र पूर्वाधार खडा हुन नसक्ने थापाले जिकिर गरे । नेपालमा भएका अहिलेसम्मका विकासका काम ती सबै कांग्रेसको सरकारको समयमा भएको उनको दाबी छ । उनले कांगे्रसलाई भोट दिएर जिताउन सकेमामात्र मुलुक समृद्ध हुनसक्ने टिप्पणी गरे । उनले आगामी दिनमा सबैको कांग्रेस बनाउन ध्यान दिनुपर्नेमा पनि जोड दिए ।
सभापति थापाले नेपालमा कला, संस्कृतिको धेरै महत्व रहेको उल्लेख गर्दै गीतको भाषामार्फत कांग्रेसको योगदान र अबको आवश्यकताबारे जनतासमक्ष पु¥याउने पनि जनाए । सबै प्रदेशमा फागुनभित्रमा रहेका कलाकाहरूलाई प्रशिक्षण दिने कार्यक्रम तय गरेको पनि उनले सुनाए ।
सांस्कृतिक संघले कांगे्रसलाई आगामी निर्वाचनमा मजबुत बनाउन पालिका, जिल्ला र प्रदेशमा पनि संगठन/संरचना विस्तार गर्न लागिएको उनको भनाइ थियो । सातै प्रदेशका सबै जिल्लाहरूको पालिकाहरूमा चैत मसान्तसम्म संगठन विस्तार गरेर तीनै तहको निर्वाचन केन्द्रित कांग्रेसको प्रचारप्रसारको जिम्मेवारी लिने पनि बताए । उनले भने, ‘तीनै तहका आगामी निर्वाचनमा कांग्रेसको जनमत बढाउनको लागि सांस्कृतिक कार्यक्रम तय गर्न खोजेको हौँ ।’ सबै विधाका कलाकारहरूलाई केन्द्रीय समितिमा समेटेको पनि उनले विश्वास दिलाए । आफूहरूले कांग्रेसलाई सशक्त र मजबुत बनाउन चाहेको पनि उनले स्पष्ट पारे ।
सबैभन्दा ठूलो कुरा लोकतन्त्र हो भन्दै उनले लोकतन्त्रको स्थायित्वको लागि पनि कांग्रेसले बहुमत ल्याउनुपर्ने बताए । उनले भने, ‘कांग्रेसले मुलुकमा धेरै काम गरेको छ, तर आफूले गरेको काम बाहिर देखाउँदैन ।’ लोकतन्त्र र कांग्रेसको बारेमा गीत, नाटक र जिंगल्स बनाएर जनतालाई सरल र सहज भाषामा कांग्रेसको आवश्यकताबारे सूचित गराउने पनि उनले बताए । ७७ वटा जिल्लामा संरचना भएको सांस्कृतिक संघले १५ वर्षको अवधिमा लोकगीत, चलचित्र, अभिनय, नाटकलगायत सबै विधालाई समेटेको उनले बताए । संघले २ वटा अधिवेशन सम्पन्न गरिसकेको र अब तेस्रो अधिवेशन नजिक रहेको पनि जानकारी दिए ।
