काठमाडौं– नेकपा (एमाले) का पोलिटब्यूरो सदस्य तथा पूर्वमन्त्री महेश बस्नेतले सभामुख अग्निप्रसाद सापकोटाविरुद्ध महाभियोगको प्रस्ताव पनि दर्ता हुनसक्ने टिप्पणी गरेका छन् । मंगलबार आयोजना गरेको साक्षात्कारमा बोल्दै नेता बस्नेतले यस्तो बताएका हुन् । उनले भने, ‘अब एमालेले सभामुखज्यूलाई महाभियोग दर्ता गरेर सेफ ल्याण्डिङ खोजोस् भन्ने कतिपय बुद्धिजिवीहरूको सुझाव पनि छ ।’
उनले सभामुखविरुद्ध महाभियोग प्रस्ताव अघि बढाउनको लागि आफूहरू सय जना सांसद जुनसुकै बेला हस्ताक्षर गर्न तयार रहेको पनि स्पष्ट पारे । उनले स्थानीय तहको निर्वाचन ३० बैशाखमा हुने जुन घोषणा भएकोमा स्वागत गर्दै सरकारलाई धन्यवाद भनेका छन् । स्थानीय तहको निर्वाचनको सवालमा आफ्नो दलले कसैसँग पनि गठबन्धन नगर्ने बस्नेतको दाबी छ । उनले भने, ‘कुनै पनि खेलको मैदान होस् या निर्वाचनको मैदानमा जाने कुरा होस, जुन शक्ति आफ्नो एजेण्डामा क्लियर र विश्वस्त छ, त्यो शक्ति ढुक्कसँग मैदानमा जान्छ । जुन शक्ति कमजोर छ, त्यो मैदानमा जान डराउँछ अनि जलझेल गर्छ । एमालेमात्रै विश्वस्तका साथ निर्वाचनमा जान चाहन्छ । कांग्रेसमा पनि विश्वास र कन्फिडेन्स त छ । तर, कांग्रेसका केही नेताहरूमा निर्वाचनको भय देखिन्छ । रामचन्द्र पौडेलमा पनि त्यो भय देखियो । कांग्रेसले त्यो पाटोमा ध्यान दिओसर । हुन त शान्त कूटनीतिमा प्रधानमन्त्री एवं नेपाली कांग्रेसका सभापति शेरबहादु देउवा बलियो हुनुहुन्छ ।’
आफ्नो पार्टीको भविष्य अन्धकार देखेको कारण प्रचण्ड र माधव नेपालले स्थानीय तहको निर्वाचन टार्ने षड्यन्त्र गरेको पनि उनले आरोप लगाए । संसद्मा आफूहरूको भूमिकाभन्दा पनि सभामुखले अभिभावकको भूमिका खेल्नुपर्नेमा नेता बस्नेतले जोड दिए । उनले सभामुखसामू तीन विकल्प रहेको सुनाए ।
यद्यपि उनले सरकारले अध्यादेश र विद्येयक ल्याउने प्रक्रिया गरिरहेको पनि स्मरण गराए । बस्नेतले एमसिसीलाई प्रधानमन्त्री शेरबहादुर देउवा र नेकपा (माओवादी केन्द्र) का अध्यक्ष पुष्पकमल दाहालले लेखेको पत्रको विषयमा पनि उनले प्रश्न उठाए । उनले भने, ‘एमसिसीलाई प्रधानमन्त्री देउवा र प्रचण्डले जुन पत्र लेख्नुभयो । प्रधानमन्त्रीको हैसियतले लेखेको पत्र, प्रधानमन्त्री भनेको पावर अफ द स्टेट भनिन्छ । यो विषय स्वभाविक पनि होला । प्रचण्डले हस्ताक्षर गरेको कुरा पावर अफ स्टेटको दुरूपयोग हो । यो राज्यको शक्तिको दुरूपयोग हो ।’
उनले प्रचण्डले आफूलाई दुई जिब्रो भएको प्रचण्ड र दुई मुख भएको माओवादी केन्द्र बनाउँदै गएको टिप्पणी गरे ।
एमसिसीबारे एमालेले पर्याप्त अध्ययन गरेको पनि उनको दाबी छ । तर, सत्तापक्षले आफ्नो धारणा अघि सार्नेबित्तिकै एमालेले आफ्नो धारणा राख्ने उनले स्पष्ट पारे ।
उनले मुलुकको राजनीतिक गतिरोध अन्त्यको लागि एमाले सकारात्मक भएको उदाहरण पछिल्लो समय आफ्नो पार्टीका अध्यक्ष केपी ओलीले प्रधानमन्त्रीको सरकारी निवासमा वार्ता गर्ने स्थिति बन्नुलाई चित्रण गरे । उनले एमालेमाथि धेरै अनैतिक काम भएको स्मरण गराए । उनले नेकपा हुँदा आफूहरू एमसिसी पारित गराउन लचकताकासाथ प्रस्तुत भएको पनि स्मरण गराए ।
