काठमाडौं– राष्ट्रिय प्रजातन्त्र पार्टीका महामन्त्री भुवन पाठकले यथास्थितिमा एमसिसी संसदमा टेबुल भए आफ्नो पार्टीले एमसिसीको पक्षमा मतदान नगर्ने बताएका छन् । उनले भने, ‘यथास्थितिमा एमसिसी पारित गर्नुहुँदैन । एमसिसी सम्झौतामा भएका केही दफाहरू विवादित छन्, राष्ट्रिय अखण्डतामा प्रभावित पार्ने खालका छन् । त्यसैले यथास्थितिमा एमसिसी पारित गर्नुहुँदैन । र, यथास्थितिमा एमसिसीबारे संसद्मा मतदान भयो भने राप्रपाले विपक्षमा मतदान गर्छ ।’
आइतबार आयोजना गरेको विशेष साक्षात्कारमा बोल्दै महामन्त्री पाठले यस्तो बताएका हुन् । उनले पार्टी कुनै पनि हालतमा नफुट्नेसमेत दाबी गरे । पाठकले अब पार्टी एकताबद्ध भएर स्थानीय तहको निर्वाचनमा जाने बताएका छन् । उनले भने, ‘राप्रपा फुट्दैन भन्ने आाधार त लामो समयपछि निवर्तमान अध्यक्ष थापा र वर्तमान अध्यक्ष राजेन्द्र लिङ्देनबीच भेटवार्ता भएको छ । यो त आइसब्रेक भयो । उहाँहरूबीच सम्वाद प्रारम्भ भयो । पार्टीका सबै तह र तप्काका साथीहरूले पनि पार्टीलाई एकताबद्ध राख्नुपर्छ भन्ने पक्षमा छौँ । अब हामीले स्थानीय तहको निर्वाचनको मिति घोषणा भयो भने पार्टीको अर्जुनदृष्टि निर्वाचनमा राख्छौँ ।’
पाठकले वर्तमान पाँच दलीय गठबन्धनको सरकारको ६ महिना पूरा असफल भएको टिप्पणी गरेका छन् । उनले भने, ‘यो सरकारले ६ महिना पूरा गरेको छ । यो सरकारको विश्लेषण गर्दा हरेक पक्षमा यो सरकार असफल भएको छ । महँगी र भ्रष्टाचार नियन्त्रण गर्न सरकार असफल भएको छ । शान्ति सुरक्षा कायम गर्ने विषयमा पनि असफल भएको छ । रोजगारी सिर्जना गर्न पनि असफल भएको छ । देशको आर्थिक स्थिति अहिले कमजोर छ । मुलुकको आर्थिक अवस्था अहिले डरलाग्दो मोडमा पुगेका देखिन्छ । पुँजीगत खर्च भएको छैन् । शोधान्तार घाटा बढ्दै गएको छ । विदेशी सहयोग घटेको छ । अहिले आर्थिक सुचक नकारात्मक छन् । मूल्यवृद्धि झण्डै ७ प्रतिशतदेखि कतिपय कुरामा १४–१५ प्रतिशतसम्म भएको छ । आर्थिक वृद्धि २ प्रतिशतभन्दा पनि घटेको छ । अहिले देशको आर्थिक अवस्था डरलाग्दो अवस्थामा छ ।’ उनले देश विदेशमा रहेका नेपाली श्रमिकहरूले पठाएको रेमिट्यान्सबाट धानिरहेको अवस्था सुनाए ।
मुलुक स्थानीय तहको निर्वाचनको संघारमा रहेको सुनाए । उनले भने, ‘स्थानीय तहको निर्वाचन आगामी ४ जेठमा गर्ने भनेर भनिएको छ । प्रधानमन्त्री र निर्वाचन आयोगका पदाधिकारीबीच भएको छलफलमा यो कुरा आएको छ, तर औपचारिक रूपमा आएको छैन । निर्वाचनको लागि पनि आयोगले तयारी गरिरहेको कुरा छ, कतै शंका र उपशंका छ । एमसिसीको चपेटामा यो सरकारले स्थानीय तहको निर्वाचन नगर्ने हो कि भन्ने देखिन्छ । एमसिसी पास गर्ने पक्षमा प्रधानमन्त्री हुनुहुन्छ । तर, माओवादी र नेकपा (एकीकृत समाजवादी) पारित गर्ने पक्षमा छैनन् । उनीहरूले यदि एमसिसी पारित गर्ने प्रयास गरियो भने हामी विपक्षमा जान्छौँ भनेको अवस्था छ । समग्रमा हेर्दा सरकारको गतिविधि सकारात्मक देखिँदैन् । यो पनि
दुर्भाग्यपूर्ण छ ।’
