काठमाडौं– सरकारले स्थानीय तहको निर्वाचनका मिति घोषणा नगरे पनि निर्वाचन आयोगले भने आङ्खनो तर्फबाट आवश्यक तयारी थालेको छ । आगामी ४ जेठमा स्थानीय तहको निर्वाचन गर्न सरकारलाई सिफारिस गरेको आयोगले आसन्न निर्वाचनलाई मध्यनजर गर्दै मतपत्र डिजाइनका लागि दरखास्त आह्वान गरेको छ । आयोगले मतपत्र, लोगो, निर्वाचन चिह्न तथा निर्वाचन शिक्षा तथा सूचना सामग्री डिजाइनका लागि दरखास्त आह्वान गरेर तयारी अगाडि बढाएको हो ।
आयोगले सार्वजनिक सूचनामार्फत मतपत्रको डिजाइन गर्न आवश्यक योग्यता पुगेको व्यक्ति तथा संस्थालाई दरखास्त हाल्न सूचित गरेको छ । आयोगले मत पत्र डिजाइनको काम गर्न चाहने इच्छुक व्यक्तिले सूचना प्रकाशित भएको मितिदेखि पाँच दिनभित्र आवेदन दिन सक्ने बताइएको छ ।
आवेदन आयोगको कार्यालय वा आयोगको इमेलमा दर्ता गर्न सकिनेछ । निवेदनको ढाँचा आयोगको मतदाता नामावली तथा निर्वाचन सञ्चालन शाखा वा वेबसाइटबाट प्राप्त गर्न सकिने सूचनामा उल्लेख छ । मान्यताप्राप्त विश्वविद्यालयबाट चित्रकला र ग्राफिक डिजाइनमा कम्तिमा स्नातक, दृष्टान्त चित्र (इलुस्ट्रेसन) र ग्राफिक डिजाइनमा कम्तिमा दुई वर्षको अनुभवी, रेखा चित्र तथा रंगिन चित्रसम्बन्धी दक्ष व्यक्तिले आवेदन दिन सक्ने आयोगले जनाएको छ ।
दरखास्त दिन चाहने इलुस्ट्रेसनको ट्याबलेट पेन र सम्बद्ध सङ्खटवेयरमा पनि दक्ष हुनु पर्नेछ । नेपाली टाइप र मुद्रण प्रणालीबारे पनि जानकार हुनुपर्ने आयोगको सूचनामा उल्लेख छ ।
आयोगले सरकारलाई ५ जेठमा हालका जनप्रतिनिधिहरूको कार्यावधि सकिनु अगावै निर्वाचन गर्न पटक–पटक ध्यानाकर्षण गराइसकेको छ । नेपालको संविधान र निर्वाचन ऐनमा स्थानीय तहका जनप्रतिनिधिको पदावधि सकिनु दुई महिना अगावै निर्वाचन गर्नुपर्ने व्यवस्था छ । सोहीअनुसार ५ जेठमा हालका जनप्रतिनिधिहरूको पदावधि सकिने भएकाले त्यसअगावै निर्वाचन हुनुपर्ने आयोगको अडान छ । आयोगले सोहीअनुसार यसअघि आगामी चैतमा निर्वाचन गर्न प्रस्ताव गरेको थियो । त्यसपछि आगामी वैशाख १४ र २२ मा निर्वाचन गर्न प्रस्ताव गरेको आयोगले पछिल्लोपटक ४ जेठमा निर्वाचन गर्न सरकारलाई सिफारिस गरेको थियो ।
आयोगको सिफारिसमा सरकारले निर्वाचनको मिति घोषणा गर्ने प्रावधान छ । प्रमुख निर्वाचन आयुक्त दिनेश थपलियासहितको आयोगका पदाधिकारीले १८ माघमा प्रधानमन्त्री शेरबहादुर देउवालाई भेटेर निर्वाचनको मिति प्रस्ताव गरेका थिए । उक्त भेटमा प्रधानमन्त्री देउवाले सरकारले तत्कालै निर्वाचनको मिति घोषणा गर्ने बताएका थिए ।
