कर्णाली– कर्णाली प्रदेशका सभामुख राजबहादुर शाहीले मिनी संसद्, प्रदेशसभा, यसका सीमा, मर्यादा र अनुशासनका विषयमा युवाहरूलाई जानकारी गराएका छन् ।
बुधबार कर्णाली प्रदेशसभाको चौथो स्थापना दिवसको खुला सप्ताहअन्तर्गत आयोजित ‘युवासँग प्रदेशसभा : संवाद कार्यक्रम’मा सभामुख शाहीले यस्तो जानकारी गराएका हुन् ।
उनले युवाहरूमा नै कतिपय कुरामा जानकारीको अभावले गर्दा नै विकासमा समस्या आएको उनको भनाई थियो । उनले कर्णालीका युवाहरूमा अहिले सम्म प्रदेशसभा नीति निर्माण गर्ने निकाय हो भन्ने बुझाइ नभएको बताए । उनले प्रदेशसभा सदस्य भनेको योजना माग्ने, विकास निर्माणका कार्य गर्ने व्यक्तिका रूपमा बुझ्ने गरिएको बताए । उनले सरकार र कार्यकारीले गर्ने कामको अपेक्षा विधि निर्माण गर्नेबाट गरिएको बताए ।
मुलुकमा नयाँ संरचनामा गएपछि प्रदेशसभाको व्यवस्था र यसको दायरासम्बन्धी जानकारी जनस्तरसम्म पुग्न नसकेकाको उनको भनाइ थियो । सभामुख शाहीले कार्यक्रममा सहभागी युवाले संघ, प्रदेश र स्थानीय तहबीचको आपसी समन्वय, सहकार्य र समझदारीअनुसार कानून बन्छन् वा बन्दैनन् ? सभामुख राजनीतिक व्यक्ति हुँदा आएका समस्या, सभा सञ्चालन प्रक्रियामा सभामुखको भूमिकालगायतका विषयमा राखेका जिज्ञासा मेटाएका थिए ।
त्यस्तै कार्य व्यवस्था परामर्श समितिलगायतका मिनी संसद्, प्रदेशसभा, यसका सीमा, मर्यादा र अनुशासनका विषयमा पनि उनले युवालाई प्रष्ट्याए । कार्यक्रममा उपसभामुख पुष्पा घर्तीले आफ्नो भूमिकाको बारेमा प्रकाश पारेकी थिईन् । उनले विशेष गरि कर्णालीको बहुपति तथा बालविवाह प्रथा समस्याको रूपमा रहेको भन्दै यसलाई उन्मूलन गर्नुपर्ने धारणा राखेकी थिईन् ।
अर्थ तथा प्राकृतिक स्रोत समितिका अध्यक्ष गणेशप्रसाद सिंहले उनले समितिको अध्यक्षको सीमा र अधिकारको बारेमा बताएका थिए । उनले नीति निर्माण, विधेयकको सूक्ष्म अध्ययन, जनताबाट आएका समस्याको बारेमा समितिको अध्यक्षले छलफल गर्न सक्ने बताए ।
