काठमाडौं– केशर महललाई ६ महिनाभित्र पुनर्निर्माण गराउने शिक्षा, विज्ञान तथा प्रविधिमन्त्री देवेन्द्र पौडेलले बताएका छन् । आइतबार शिक्षा मन्त्रालयमातहतमा रहेको केशर महललाई निरीक्षण गर्ने क्रममा सो भवन एक ऐतिहासिक स्थान रहेको भन्दै ६ महिनाभित्र पुनर्निर्माण हुने शिक्षामन्त्री पौडेलले बताएका हुन् ।
भूकम्पले भवनमा क्षति भइसकेपछि भवन बन्ने प्रक्रियामा रहेको उनले बताए । ‘कन्ट्रयाक्टरहरूले, हामी अब ६ महिनाभित्र करिब कम्प्लिट गर्छौँ । तीन महिनामा एउटा भाग हामी सक्छौँ’ उनले भने । कन्ट्रयाक्टरलाई काम छिटो सकाउन प्रशासनिक वा बजेटको आवश्यकता परेमा मन्त्रालयलाई खबर गर्न भनेका उनले बताए । उनले भने, ‘कन्ट्रयाक्टरलाई काम छिटो सकाउन प्रशासनिक वा बजेटको आवश्यकता परेमा खबर गरिहाल्नुस् ।’
उनका अनुसार महलमा भएका भौतिक वस्तुहरू पुरातत्वसँग सम्बन्धित वस्तुहरूको सुरक्षा एवं संरक्षणको साथै पुराना पुस्तकहरूको संरक्षण गर्ने कुरा शिक्षा मन्त्रालय मातहत पर्दछ । उनले भने, ‘भौतिक वस्तुहरू पुरातत्वसँग सम्बन्धित वस्तुहरूको सुरक्षा एवं संरक्षणको दायित्व हाम्रो हो ।’ उनले मन्त्रालय मातहतका निकायहरूले निजी क्षेत्रलाई निजी प्रयोजनको निम्ति बाहिरपट्टिको जमीन दिन खोजेको हो कि भन्नेबारे हाम्रो ध्यानाकर्षण भएको बताए ।
उनले थपे, ‘कुनै पनि निजी क्षेत्रलाई शिक्षा मन्त्रालय मातहतका यस प्रकारको भौतिक सम्पत्तिहरू प्रयोग गर्न दिइने छैन ।’ उनले सरकारी संरचनाहरू नियमविपरीत निजी क्षेत्रलाई प्रयोगमा दिएको पाइएमा कानुनअनुसार कारबाही गरिने पनि बताए । उनले भने, ‘सरकारी संरचनाहरू राज्यको सम्पत्ति हो, यसलाई राज्यले नै यसको सुरक्षा र जिम्मा लिनेछ ।’ उनले राष्ट्रिय सम्पत्ति निजी क्षेत्रलाई भोगचलन गर्न दिन नहुने पनि जनाए । केशरमहल ३४ रोपनी, दुई आना, एक पैसा, तीन दाम क्षेत्रफलमा फैलिएको छ ।
