लुम्बिनी– संस्कृति, पर्यटन तथा नागरिक उड्डयनमन्त्री प्रेमबहादुर आलेले लुम्बिनी क्षेत्रमा निर्माण भइरहेका विभिन्न भौतिक संरचनाको काम समयमै सम्पन्न गर्न निर्देशन दिएका छन् । लुम्बिनी विकास कोषको अनुगमन तथा निरीक्षण भ्रमण गर्दै मन्त्री आलेले निर्माण व्यवसायीसँग लुम्बिनी क्षेत्रमा निर्माण भइरहेका विभिन्न भौतिक संरचनाको चाँडै तयार गर्न आग्रह गरे । उनले सो क्षेत्रमा निर्माण भएका काम गुणस्तरयुक्त र मापदण्डमा आधारित हुनुपर्ने उनको भनाई थियो ।
मन्त्री आलेले भने, ‘लुम्बिनीमा निर्माण गरिन लागिएका सम्पूर्ण संरचना गुणस्तरयुक्त तथा मापदण्डसहित निर्माण गर्न र गराउनका लागि सबै क्षेत्र, तह, तप्काका नागरिकले चासो देखाउनुपर्छ । उनले लुम्बिनीमा निर्माण हुँदै गरेको पाँच हजार मानिस अट्ने क्षमताको अन्तर्राष्ट्रिय ध्यान केन्द्र सभाहलको गुरुयोजनाअनुसार मूल प्रवेशद्वारमा निर्माण गरिन लागेको गेट तथा सडकको शिलान्याससमेत सो अवसरमा गर्दै लुम्बिनी क्षेत्रको विकास तथा विस्तारका लागि कुनै बजेटको कमी नहुने बताए ।
भगवान् गौतमबुद्धको जन्मस्थल पनि भएको र बुद्धकै नामले लुम्बिनी देश–विदेशमा चिनिएको पनि विकास अति आवश्यक रहेको उनको भनाई थियो । उनले आफु यस क्षेत्रको विकासका लागिसधैँ सकारात्मक रहेकाले बजेट अभाव हुन नदिने बताए । उनले बजेटको कुनै कमी हुँदैन भन्दै आवश्यक परे तुरुन्त माग गर्न आग्रह गरे । उनले भने, ‘यहाँ निर्माण गरिन लागिएका संरचना निर्माणका लागि बजेटको अभाव भयो भने लेखेर पठाउनुहोला, म यही कोषको अध्यक्ष भएकाले पनि बजेट प्रदान गर्नु मेरो दायित्व हुने छ ।’
उनले लुम्बिनी विकास कोषअन्तर्गत रहेको एक हजार १५५ बिघा जमिनमा थुप्रै भौतिक संरचना निर्माण भइसकेको जानकारी गराए । उनले लुम्बिनी क्षेत्रमा कम्तीमा पनि ८१ प्रतिशत काम सम्पन्न गरिसकेको जनाए । अब बाँकी रहेको १९ प्रतिशत काम बोलपत्र प्रक्रियाबाट काम सुरु गराउने जनाए ।
