काठमाडौं– प्रधानमन्त्री शेरबहादुर देउवा र नेकपा एमालेका अध्यक्ष केपी ओलीबीच शनिबार भेटवार्ता भएको छ । लामो समयदेखि संघीय संसद् प्रतिनिधिसभा र राष्ट्रियसभाको बैठकमा अवरोध गर्दै आएको एमालेका अध्यक्ष ओली र नेपाली कांग्रेसका सभापति एवं प्रधानमन्त्रीबीचको औपचारिक भेटले जारी राजनीतिक गतिरोध अन्त्यको आस पलाएको छ ।
मुख्य गरेर गत ५ पुसमा तत्कालीन प्रधानमन्त्री ओलीले प्रतिनिधिसभा विघटन गरेपछि दुई दलका शीर्ष नेताका बीचमा संवादहीनताको अवस्था सिर्जना भएको थियो । उक्त निर्णयलाई सर्वोच्च अदालतले खारेज गर्दै प्रतिनिधिसभा पुनस्र्थापना गरिदिएको थियो । त्यसपछि ओलीले दोस्रोपटक गत ८ जेठमा प्रतिनिधिसभा विघटन गरेका थिए । उक्त विघटित प्रतिनिधिसभालाई पनि सर्वोच्चले पुनस्र्थापित गरिदिएको थियो । यसपटक देउवाको नेतृत्वमा सरकार गठनको अन्तरिम आदेश माग गर्दै एमालेकै केही सांसदसहित अन्य दलका सांसदहरू अदालत पुगेका थिए । दोस्रोपटक सर्वोच्चले प्रतिनिधिसभा पुनस्र्थापना मात्र गरेन, देउवालाई समय तोकेर प्रधानमन्त्रीमा नियुक्त गर्न परामदेश नै जारी गरेको थियो ।
पहिलोपटकको संसद विघटनपछि नै कांग्रेस उक्त निर्णयविरुद्ध आन्दोलनमा उत्रिएको थियो । दोस्रोपटक सर्वोच्चले देउवालाई प्रधानमन्त्रीमा नियुक्त गर्न परमादेश दिएपछि एमालेले संसदमा अवरोध गर्दै आएको छ । कांग्रेस आन्दोलनमा उत्रिएपछि नै एमाले अध्यक्ष ओली र कांग्रेस सभापति देउवाबीचमा औपचारिक संवाद हुन सकेको थिएन । लामो समयदेखिको संवादहीनताको अन्त्य गर्दै ओली र देउवाबीचमा शनिबार भेटवार्ता भएको हो । प्रमुख प्रतिपक्षी दलका नेता ओलीलाई भेट्न प्रधानमन्त्री देउवा भक्तपुरको बालकोटस्थित ओली निवास पुगेका थिए ।
भेटमा एमालेले संसदमा गरिरहेको अवरोध अन्त्य गर्ने विषयमा छलफल भएको छ । प्रधानमन्त्रीका प्रेस संयोजक गोविन्द परियारले संसदको गतिरोध हटाउने विषयमा प्रधानमन्त्रीले अनुरोध गरेको बताएका छन् । भेटमा अमेरिकी सहायता परियोजना एमसिसी सम्झौता अगाडि बढाउने विषयमा पनि प्रधानमन्त्री देउवाले एमालेको सहयोग मागेका छन् । एमालेले कारबाही गरेका माधव नेपालसहित १४ संसदको कारबाही रोकेर अवैध रूपमा दल (नेकपा एस) दर्ता गरिएको प्रतिपक्षीले लगातार संसद अवरुद्ध गर्दै आएको छ । माधव नेपालको कारबाही वैध हुनुपर्ने, सांसदको हैसियतमा संसदमा उपस्थित गराउन नहुने र कारबाही रोक्ने सभामुख अग्नि सापकोटाले राजीनामा दिनुपर्ने एमालेको माग छ ।
एमालेसँग सम्वाद गर्न यसअघि प्रधानमन्त्री देउवाले सर्वदलीय बैठक बोलाए पनि माधव नेपाल सहभागी भएका कारण एमाले सहभागी भएन । त्यसैगरी सभामुखले बोलाएको सर्वदलीय बैठकमा पनि एमाले सहभागी भएको छैन । सहमतिको निरन्तर प्रयास गर्दा पनि एमालेले अवरोध कायमै राखेपछि सत्ता गठबन्धनले सम्वाद गर्ने जिम्मा प्रधानमन्त्री देउवालाई दिएको छ । जसअन्तर्गत देउवा बालकोटा पुगेका हुन् ।
ओली र देउवाको शनिबारको भेटले राजनीतिक गतिरोध अन्त्य गर्दै निकासको वातावरण बन्ने अपेक्षा गरिएको छ । राजनीतिक दलहरूबीच संवाद हुन नसक्दा अवधि पूरा हुन लाग्दासमेत स्थानीय तहको निर्वाचनको बारेमा केही निर्णय गर्न सकिएको छैन । निर्वाचन आयोगले पहिले चैतमा र पछिल्लोपटक आगामी २० वैशाखमा निर्वाचन गर्ने गरी मितिसमेत प्रस्ताव गरिसकेको छ । तर, दलहरूबीच यसबारेमा केही सहमति हुन सकेको छैन ।
