अर्घाखाँची– नेपाली कांग्रेसका महामन्त्री गगनकुमार थापाले विदेशिएका युवाका लागि रोजगारी सृजना गर्नका लागि पार्टीले रणनीति बनाउन लागेको जानकारी गराएका छन् । सोमबार नेपाली कांग्रेस पाणिनि गाउँपालिकाले दुर्गाफाँटमा आयोजना गरेकोे बृहत् आमसभा तथा पार्टी प्रवेश कार्यक्रममा महामन्त्री थापाले भने, ‘विदेश गएका युवाका लागि रोजगारी सृजना गर्नका लागि पार्टीले आफ्नै रणनीति बनाउँदै छ ।’ कांग्रेसले गरिबीमा रहेको जनसंख्यालाई पनि विचार गरिरहेको जनाउँदै यस्ता न्यून आय भएकाहरूकाको जीवन कसरी उकास्ने र कसरी रोजगारी सृजना गर्ने भन्ने कुरामा कांग्रेसले छलफल गरीरहेको बताए । उनले भने, ‘ कांग्रेसले गरिबीमा रहेको जनसंख्यालाई पनि कसरी विकास गर्ने भन्ने सोच राखेको छ ।’
उनले २०७४ मा माओवादीले बहुमत ल्याएपनि संविधान बनाउन नसकेको, २०७४ मा एमाले र माओवादी मिलेर प्रचण्ड बहुमत ल्याएपनि देश चलाउन नसकेको बताए । महामन्त्री थापाले भने ‘ओलीको अहंकार र अयोग्यताले देशले दुख पाएको छ, सरकार पूरा कार्यकाल चल्न सकेन, त्यसैले अबको चुनावमा दण्ड पाउने पालो एमालेको हो ।’ महामन्त्री थापाले स्थानीय तहको निर्वाचन वैशाखमा हुने तथा प्रदेश र संघको निर्वाचन मंसिरमै हुने भएकाले त्यसको तयारीमा लाग्न कांग्रेस कार्यकर्तालाई निर्देशन दिए । पार्टीभित्र गुट र भागबन्डाको अन्त्य गरी विधानसम्मत ढंगले पार्टीलाई चलाउने उनले बताए । उनले भने, ‘अब पार्टीभित्र गुट र भागबन्डाको अन्त्य गरी विधानसम्मत ढंगले पार्टीलाई चल्छ ।’ अब नेपाली कांग्रेसले आफूहरूले २०४८ सालमा बहुमत पाउँदा गरेको गल्ती र २०७४ सालमा नेकपाले बहुमत पाएर गरेको गल्तीबाट पाठ सिक्दै अघि बढ्ने उनको भनाइ छ ।
आउँदो तीनै तहको चुनाव जितेर कांग्रेसले पाँच वर्ष पूरै सरकार चलाएर बहुमतको प्रयोग कसरी गर्ने भन्ने र काम गर्ने तरिका सिकाउने बताए । कम्युनिष्टहरूले विविधतायुक्त नेपाली समाजको गलत विश्लेषण र प्रोपोगाण्डा गरेर कहिले जात, कहिले धर्म र कहिले राष्ट्रियताको नाममा देश विकासको गति अवरुद्ध गरेको महामन्त्री थापाले आरोप लगाए । कांग्रेस केन्द्रीय सदस्य एवं संसदीय दलकी सचेतक पुष्पा भुसालले एमाले अध्यक्ष केपी शर्मा ओलीका कारण देश पछाडि धकेलिएको आरोप लगाईन् । उनले जनताको बलिदानीबाट प्राप्त संविधान र गणतन्त्रको रक्षाका लागि कांग्रेस जस्तोसुकै मूल्य चुकाउन पछि नपर्ने स्पष्ट पारिन् ।
कार्यक्रममा कांग्रेस पाणिनिका सभापति तुल्सी पौडेल, जिल्ला सचिव तथा पाणिनि गाउँपालिकाका अध्यक्ष अच्युत गौतम, र यादवप्रसाद घिमिरे, कांग्रेस केन्द्रीय सदस्य सञ्जय गौतम, कांग्रेस जिल्ला सभापति केशव श्रेष्ठ, नेवि संघका महामन्त्री युवराज पाण्डेलगायतले आ–आङ्खनो धारणा राखेका थिए । कार्यक्रममा विसं २०७४ को स्थानीय तहको निर्वाचनमा पाणिनि गाउँपालिकामा नेकपा (एमाले)बाट उपाध्यक्षमा निर्वाचित लक्ष्मी गौतमसहित ४७५ जना कांग्रेसमा प्रवेश गरेका छन् । उनीहरूलाई महामन्त्री थापाले पार्टी प्रवेश गरेकामा स्वागत गरेका थिए ।
