काठमाडौं– नेकपा माओवादी केन्द्रको अध्यक्षमा पुनः पुष्पकमल दाहाल निर्वाचित भएका छन् । पार्टीको आठौँ राष्ट्रिय महाधिवेशनबाट निर्वाचित केन्द्रीय समितिको सोमबार बसेको बैठकले दाहाललाई निर्विरोध अध्यक्षमा चयन गरेको हो ।
आइतबार सम्पन्न माओवादी केन्द्रको आठौँ राष्ट्रिय महाधिवेशनबाट २३६ सदस्यीय केन्द्रीय समिति निर्वाचित गरिएको थियो । महाधिवेशनले पारित गरेको विधानमा २९९ सदस्यीय केन्द्रीय समिति हुने भनिए पनि दाहालले बन्दसत्रमा खुला र समानुपातिक सूची गरी २३५ सदस्यको नाम मात्र पेस गरेका थिए । दाहाललाई प्रस्तावलाई बन्दसत्रले अनुमोदन गरेको थियो । बाँकी सदस्यहरू पछि चयन गरिने जनाइएको छ ।
माओवादीको विधानमा महाविधेशनबाट केन्द्रीय समिति निर्वाचित गर्ने र केन्द्रीय समितिले पदाधिकारीसहित स्थायी कमिटी, पोलिटब्युरोलगायत छनोट गर्ने प्रावधान छ । सोहीअनुसार आइतबार महाधिवेशनबाट निर्वाचित केन्द्रीय समितिको पहिलो बैठक जेष्ठ सदस्य दिनानाथ शर्माको अध्यक्षतामा बसेको थियो । उक्त बैठकले अध्यक्षमा दाहाललाई निर्विरोध निर्वाचित गरे पनि अन्य पदाधिकारी भने चयन गरिएको छैन ।
बैठकमा अहिलेको सन्दर्भमा दाहालकै नेतृत्व आवश्यक रहेको भन्दै नेता नारायणकाजी श्रेष्ठले उनको नाम अध्यक्षका रूपमा प्रस्ताव गरेका थिए । पार्टीलाई समाजवादी क्रान्तिमा अघि बढाउन दाहालकै नेतृत्व अपरिहार्य रहेको उनको भनाइ थियो । दाहालकै नेतृत्वमा जनयुद्ध, जनआन्दोलन, शान्ति प्रक्रिया हुँदै संविधानसभा निर्वाचन र संघीयता तथा गणतन्त्रसहितको संविधान निर्माण भएको भन्दै उनले दाहालकै नेतृत्वमा अब बाँकी कार्यभार पूरा गर्ने संकल्प गर्नुपर्नेमा जोड दिएका थिए । श्रेष्ठले दाहाललाई अध्यक्षमा चयन गर्न राखेको प्रस्तावमा नेता कृष्णबहादुर महराले समर्थन जनाएका थिए । श्रेष्ठले राखेको प्रस्तावलाई बैठकले सर्वसम्मत अनुमोदन गरेको हो ।
अध्यक्षमा निर्वाचित भएपछि अध्यक्ष दाहालले बैठकलाई सम्बोधन गरेका थिए । उनले फेरि आङ्खनो काँधमा निकै ठूलो भारी आएको महसुस भइरहेको बताएका छन् । आफूलाई अध्यक्षमा प्रस्ताव गर्ने, समर्थन गर्ने र सर्वसम्मत स्वीकार गर्ने केन्द्रीय कमिटी सदस्यलाई धन्यवादसमेत दिएका थिए । अध्यक्ष दाहालले आफू लामो समय पार्टी नेतृत्वमा रहेको र विभिन्न घटनाक्रमको नेतृत्व गर्ने अवसर प्राप्त भएको भन्दै इतिहासका गम्भीर मोडमा गम्भीर भूमिका खेल्ने अवसर पाएको चर्चासमेत गरे । उनले भने, ‘यति लामो समय, यति धेरै राजनीतिक घटनाक्रम र उतारचढावबाट गुज्रिएर अहिलेसम्म सक्रिय राजनीतिमा कायमै रहँदा भिन्न भूमिकामा जानु पर्दैन र भन्ने लाग्छ ।’ तर, देशलाई एउटा राजनीतिक बिन्दुमा लैजाने आवश्यकता, पार्टीलाई अझै सुदृढ गर्ने आवश्यकता महसुस गर्दा आफू अझै केही समय सक्रिय हुनुपर्ने बाध्यता रहेको उनले बताए ।
कतिपयले ‘प्रचण्ड नभए यो पार्टी के होला ?’ भन्ने प्रश्न गर्ने गरेको उल्लेख गर्दै उनले यो प्रश्न नै गलत रहेको बताए । माओवादी एउटा विचार रहेको र यो विचार कुनै व्यक्तिसँग नभई सिंगो कम्युनिस्ट आन्दोलनको इतिहाससँग जोडिएको उनको भनाइ थियो ।
बैठक स्थगित
माओवादी केन्द्रको केन्द्रीय समिति बैठक आगामी २५ पुसमा बस्ने गरी स्थगित गरिएको छ । सोमबारको बैठकले केन्द्रीय अध्यक्षमा दाहाललाई चयन गरे पनि पदाधिकारी र ६३ केन्द्रीय सदस्यको मनोनयन नगरी स्थगित भएको हो । माओवादीमा पदाधिकारीको आकांक्षी धेरै भए पनि सन्तुलन मिलाउन सकस देखिएको छ । विशेषगरी महासचिवमा सहमति नजुट्दा आज पदाधिकारी चयन हुन नसकेको बताइएको छ ।
त्यसो त कतिपयले केन्द्रीय समितिले पूर्णता नपाई पदाधिकारी चयन गर्न लागिएको भन्दै केही नेताले असन्तुष्टिसमेत जनाएका थिए । महाधिवेशनबाट निर्वाचित हुनुपर्ने संख्या नै ६३ सदस्य रिक्त छ । त्यस्तै, केन्द्रीय समितिले मनोनयन गर्नुपर्ने १५ प्रतिश पनि बाँकी रहेको अवस्थामा पदाधिकारी चयन गर्न लागिएको भन्दै असन्तुष्टि व्यक्त भएको हो । माओवादी विधानमा केन्द्रीय समितिले पदाधिकारी चयन गर्ने उल्लेख गर्दा पूर्णकेन्द्रीय समितिकै परिकल्पना गरेको उनीहरूको तर्क छ ।
त्यसो हुँदा पूर्ण भइनसकेको समितिले पदाधिकारी चयन गर्दा प्रश्न उठ्न सक्ने भन्दै पार्टीकै कतिपय नेताहरूले आपत्ति जनाएका छन् । हरेक केन्द्रीय सदस्यलाई पदाधिकारी बन्ने हक भएकाले समितिलाई पूर्णता नदिइ पदाधिकारी नियुक्त गरिँदा उनीहरूको हक कुण्ठित हुने पनि कतिपयको भनाइ छ ।
