कास्की– गृहमन्त्री बालकृष्ण खाँणले पोखराको सुन्दरतालाई कायम राख्न स्थानीय सरकार जिम्मेवार र संवेदनशील बन्नुपर्ने धारणा व्यक्त गरेका छन् । रेष्टुरेण्ट एण्ड बार एशोसिएशन नेपाल (रेवान) पोखराको आयोजनामा विहिबार देखिसुरु भएको २३औँ संस्करणको सडक महोत्सवको उद्घाटन गर्दै पोखरालाई सुन्दर शहरको रूपमा नै पहिचान दिनुपर्ने धारणा उनले राखे । गृहमन्त्री खाँणले पोखराको सुन्दरता र यहाँका फेवालगायतका तालहरूको संरक्षणमा सरकार प्रतिबद्ध रहेको बताउँदै फेवातालको संरक्षणका लागि आएका प्रतिवेदनहरू अध्ययन गरेर कार्यान्वयन गरिने प्रतिबद्धता जनाए ।
उनले होटल रेष्टुरेण्टमा गएर प्रहरी प्रशासनले सहयोगी भूमिका निर्वाह गर्न उनले निर्देशन पनि दिए । देशका विभिन्न भू–भागमा रहेका पर्यटकीय क्षेत्र २४सै घण्टा रेष्टुरेण्ट खुलोस् भन्ने चाहना सरकारको रहेको बताउँदै उनले त्यसका लागि स्थानीय सरकारको सहयोग आवश्यक रहेको उल्लेख गरे । उनले निरन्तर सेवा दिन सकिने ठाउँहरू तय भएको खण्डमा परीक्षणका रूपमा सुरु गर्न सकिने बताए । गण्डकी प्रदेशका पर्यटन, उद्योग, वाणिज्य तथा आपूर्तिमन्त्री मणिभद्र शर्माले पर्यटन विकासका कार्यक्रममा सरकार निजी क्षेत्रसँग मिलेर काम गर्न तयार रहेको बताए ।
कानुन, सञ्चार तथा प्रदेशसभा मामिलामन्त्री विन्दुकुमार थापाले पोखरा अन्तर्राष्ट्रिय विमानस्थल निर्माणपछि सराङकोटबाट सञ्चालन हुँदै आएको प्याराग्लाइडिङ विस्थापित हुन सक्ने आशङ्का रहेको बताउँदै स्वदेशी तथा विदेशी पर्यटकको आकर्षण रहेको प्याराग्लाइडिङ बचाउनुपर्ने बताए । गण्डकी प्रदेशसभा सदस्य राजीव पहारीले नेपालको पर्यटनको राजधानी पोखरा हो भनेर घोषणा गर्न संघीय सरकारसँग आग्रह गरे । उद्घाटन समारोहमा रेवानका केन्द्रीय प्रथम उपाध्यक्ष संघर्ष विष्ट, पोखरा पर्यटन परिषद्का अध्यक्ष गोपिबहादुर भट्टराई, नेपाली कांग्रेसका केन्द्रीय सदस्य बहादुरसिंह लामा, रेवानका अध्यक्ष लक्ष्मण बराललगायतले पर्यटन क्षेत्रलाई सरकारले प्राथमिकतामा राख्नुपर्नेमा जोड दिए । महोत्सव पुस १७ गतेसम्म सञ्चालन हुनेछ ।
