काठमाडौं– संघीय राजधानी काठमाडौंमा जारी नेकपा माओवादी केन्द्रको आठौँ राष्ट्रिय महाधिवेशनमा मंगलबारदेखि समूहगत छलफल सुरु हुने भएको छ । आइतबारदेखि सुरु भएको महाधिवेशनअन्तर्गत आइतबार राजनीतिक प्रतिवेदन तथा विधान संशोधन मस्यौदा प्रस्तुत भएपछि त्यसमाथि मंगलबारदेखि समूहगत छलफल गर्ने कार्यक्रम तय गरिएको हो ।
कमलादीस्थित नेपाल प्रज्ञा प्रतिष्ठानको भवनमा जारी महाधिवेशनमा सोमबार अध्यक्ष पुष्पकमल दाहालले राजनीतिक प्रतिवेदन तथा नेता देवप्रसाद गुरुङले विधान संशोधन मस्यौदा प्रस्तुत गरेका थिए । ती दुवै प्रतिवेदनमाथि छलफल गर्नका लागि विभिन्न २५ वटा समूह निर्माण गरिएको छ । विभाजन गरिएकामध्ये जेष्ठ कम्युनिस्ट, सल्लाहकार परिषद् र सल्लाहकार परिषद्को समूहको छलफल प्रज्ञा भवनमा हुनेछ । यस्तै प्रदेश १ को दुई समूहको प्रज्ञा भवनको भानुभक्त हलमा छलफल हुनेछ भने प्रदेश २ को दुई समूहको छलफल पनि प्रज्ञा भवनकै पारिजात हलमा हुनेछ ।
यस्तै, पुस्तकालय हलमा लुम्बिनीको विभाजन गरिएको दुई समूहको छलफल हुनेछ भने गण्डकीको दुई समूहको छलफल पार्टी कार्यालय पेरिसडाँडामा हुनेछ । यस्तै प्रवास समूहको पनि पेरिसडाँडामै हुनेछ ।
यसैगरी कर्णाली र सुदूरपश्चिम प्रदेशको दुई–दुई समूहको ए वान पार्टी प्यालेस, विभागको क्वालिटी ब्यांक्वेटमा दुई समूहमा छलफल हुनेछ । यस्तै उपत्यका विशेष प्रदेश समूहको पनि क्वालिटी ब्यांक्वेटमा छलफल हुनेछ भने दुई समूहमा विभाजन गरिएको सम्पर्क समन्वयको क्रिष्टल पार्टी प्यालेस, वाग्मतीको दुई समूहको बानेश्वर ब्यांक्वेट, आयोगको पनि सोही ब्यांक्वेटमा छलफल हुनेछ । यस्तै जन वर्गीय संगठन, मोर्चा इन्चार्ज, कार्यालयको काठमाडौं ब्यांक्वेटमा छलफल हुनेछ । बन्दसत्रमा देव गुरुङले प्रस्तुत गरेको विधान संशोधन प्रस्तावमाथि पनि छलफल हुनेछ ।
मंगलबार दिनभर समूहगत छलफल हुनेछ भने बुधबार ११ बजेदेखि समूहका नेताहरूले समूहगत छलफलको निष्कर्ष प्रस्तुत गर्ने कार्यक्रम छ । बुधबार बिहानको कार्यक्रम नेपाल प्रज्ञा प्रतिष्ठान, कमलादीमा हुने माओवादीले जनाएको छ । अध्यक्ष दाहालले महाधिवेशनको बन्दसत्रमा ‘२१औँ शताब्दीमा समाजवादको नेपाली बाटो’ शीर्षकको राजनीतिक प्रतिवेदन पेस गरेका थिए । उक्त प्रतिवेदनमा निरन्तर र व्यवस्थित तवरले शान्तिपूर्ण क्रान्तिको तयारी गर्ने, श्रमिक जनताप्रति जवाफदेही हुने विषय उल्लेख गरिएको छ ।
जनवर्गीय संगठन निर्माण गर्ने र सम्पूर्ण पार्टी पंक्ति जनताको माझमा गई व्यापक जनाधार खडा गरी शान्तिपूर्णरूपमा समाजवादी क्रान्ति सम्पन्न गर्ने चुरो दस्तावेजमा छ । ‘शान्तिपूर्ण क्रान्तिबाट समाजवाद सम्भव छ । सर्वहारावर्गप्रति प्रतिबद्ध छौँ, निरन्तर र व्यवस्थित रूपमा क्रान्ति जारी छ, राष्ट्रिय स्वाधिनताको रक्षा, श्रमिक जनताप्रति उदत्तरदायी हुनुपर्छ’, दस्तावेजको सार रहेको छ । सोमबारको बन्दसत्रमा स्थायी समिति सदस्य देवप्रसाद गुरुङले विधान मस्यौदा प्रस्तुत गरेका छन् ।
