काठमाडौं– नेकपा माओवादी केन्द्रको राष्ट्रिय महाधिवेशन आइतबारदेखि काठमाडौंमा सुरु हुँदै छ । माओवादीको आठौँ राष्ट्रिय महाधिवेशन राजधानीको कमलादीस्थित नेपाल प्रज्ञा प्रतिष्ठानमा हुनेछ । उक्त महाधिवेशनको पार्टीका अध्यक्ष पुष्पकमल दाहालले उद्घाटन गर्नेछन् । महाविधेशनको अपराह्न १ बजे अध्यक्ष दाहालले उद्घाटन गर्ने पार्टीका प्रवक्ता कृष्णबहादुर महराले जानकारी दिएका छन् ।
उनका अनुसार आइतबारदेखि सुरु हुने महाधिवेशनको सम्पूर्ण तयारी पूरा भएको छ । यसअघि राष्ट्रिय सम्मेलन भनिए पनि यसलाई राष्ट्रिय महाधिवेशनका रूपान्तरण गर्ने निर्णय गरिएको उनले बताए । कार्यकर्ता र शुभेच्छुकहरूको अधिक उत्साह देखिएको भन्दै माओवादी केन्द्रले महाधिवेशनमा रूपान्तरण गर्ने निर्णय गरेको उनले जानकारी दिए । शनिबार बसेको स्थायी समिति बैठकले पार्टीमा आकर्षण बढ्दै गएकाले राष्ट्रिय सम्मेलनलाई आठौं महाधिवेशनमा रूपान्तरण गर्ने निर्णय गरिएको बताएका छन् ।
यसअघि माओवादीले राष्ट्रिय सम्मेलनमा विचारको बहस गरेपछि महाधिवेशनमा गएर आमसभा गरेर देखाउने बताएको थियो । तर, स्थायी समिति बैठकबाट अचानक राष्ट्रिय सम्मेलनलाई महाधिवेशनमा रूपान्तरण गर्ने निर्णय गरेको हो । महाधिवेशनको उद्घाटनपूर्व आइतबार बिहान केन्द्रीय समितिको बैठक पनि बस्ने छ । बैठक बिहान ८ बजे पार्टी केन्द्रीय कार्यालयमा बस्ने प्रवक्ता महराले जानकारी दिए । उक्त बैठकले स्थायी समिति बैठकको निर्णय अनुमोदन गर्ने उनले बताए । बैठकमा सबै केन्द्रीय सदस्यलाई उपस्थित हुन निर्देशन दिइएको छ ।
माओवादीको सम्मेलनमा १५ सय प्रतिनिधि सहभागी हुँदै छन् । बन्दसत्र प्रज्ञा भवन र कोटेश्वरस्थित पेरिसडाँडामा हुँदै छ । सोमबारदेखि नै माओवादी केन्द्रको महाधिवेशनअन्तर्गत बन्दसत्र सुरु हुनेछ । बन्दसत्रमा अध्यक्ष दाहालले आङ्खनो राजनीतिक प्रतिवेदन पेस गर्ने छन् । यही सम्मेलनले नयाँ नेतृत्व पनि चयन गर्नेछ । माओवादी केन्द्रले यसपटकको महाधिवेशनमा जनयुद्धदेखि खुला राजनीतिसम्म कहाँ त्रुटि भयो भन्ने विषयमा समीक्षा गर्ने जनाएको छ । सो आत्मसमीक्षा आफूबाटै सुरु गर्ने अध्यक्ष दाहालले सार्वजनिक कार्यक्रममार्फत उद्घोष गरेका छन् ।
सम्पादकहरूसँग अध्यक्ष दाहाल
महाधिवेशनको पूर्वसन्ध्यामा माओवादी केन्द्रका अध्यक्ष दाहालले शनिबार सम्पादकहरूसँग अन्तक्र्रिया गरेका छन् । अन्तक्र्रियामा उनले पार्टीको आन्तरिक राजनीतिदेखि समसामयिक विषयमा कुराकानी गरेका छन् । त्यसक्रममा अध्यक्ष दाहालले अमेरिकी सहयोग मिलेनियम च्यालेन्ज कर्पोरेसन (एमसिसी) आवश्यक संशोधन र परिमार्जन गरेर मात्रै स्वीकार गर्न सकिने बताएका छन् । उनले नेपालको राष्ट्रिय हित र नेपाली जनताको भावनालाई समेत केन्द्रविन्दुमा राखेर र प्रोजेक्टभित्रको सुरुवातको सम्झौता र पछिका कैयौँ सम्झौताबाट उठेका प्रश्नहरूको जवाफ दिएर मात्रै अघि बढाउन सकिने बताएका हुन् ।
