काठमाडौं– नेकपा माओवादी केन्द्रले आगामी आइतबारदेखि हुने राष्ट्रिय सम्मेलनको सम्पूर्ण तयारी पूरा भएको जनाएको छ । पार्टी हेडक्वार्टर पेरिसडाँडामा बुधबार पत्रकार सम्मेलनको आयोजना गरेर माओवादी केन्द्रले राष्ट्रिय सम्मेलनको सम्पूर्ण तयारी पूरा भएको जानकारी दिएको हो ।
पत्रकार सम्मेलनमा प्रवक्ता कृष्णबहादुर महराले राजनीतिक, वैचारिक र प्राविधिक तयारी पूरा बताएका छन् । चिनियाँक्रान्तिका नायक माओको जन्मजयन्तीको सन्दर्भ पारेर माओवादीले यही ११ देखि १३ पुससम्म राष्ट्रिय सम्मेलन आयोजना गर्दै छ । माओ दिवसको अवसर पारेर माओवादी केन्द्रका अध्यक्ष पुष्पकमल दाहालले राष्ट्रिय सम्मेलन उद्घाटन गर्ने छन् । राष्ट्रिय सम्मेलन राजधानीको कमलादीस्थित नेपाल प्रज्ञा–प्रतिष्ठानमा हुनेछ । प्रवक्ता महराले नयाँक्रान्तिकारी विचार र पार्टी निर्माणका लागि सम्पूर्ण पार्टी पंक्तिलाई त्यसतर्फ निर्देशित गर्ने उद्देश्यका लागि अध्यक्ष दाहालले राजनीतिक प्रतिवेदन लेख्दै गरेको जानकारी दिए । उनका अनुसार अध्यक्ष दाहालको राजनीतिक प्रतिवेदन स्थायी समिति बैठकले अनुमोदन गरेपछि मात्र राष्ट्रिय सम्मेलनमा पेस हुनेछ ।
महाधिवेशन र राष्ट्रिय सम्मेलन फरक हुने भन्दै उनले राष्ट्रिय सम्मेलनले विचार र पार्टी निर्माण गर्ने बताए । ‘नयाँक्रान्तिकारी विचार र पार्टी निर्माण गर्ने राष्ट्रिय सम्मेलनको मुख्य उद्देश्य हो, २१औँशताब्दीसम्म आइपुग्दा धेरै परिवर्तन भएका छन’, प्रवक्ता महराले भने, ‘विश्व साम्राज्यवादले लिएको नयाँरूपलाई परास्त गर्न नयाँक्रान्तिकारी विचार र पार्टीको आवश्यकता छ ।’ सम्मेलनमा पार्टीको राजनीतिक वैचारिक अवस्थाका बारेमा गम्भीर ढंगले समीक्षा हुने उनले बताएका छन् ।
‘सामन्तवादको अवशेष उखेलेर फाल्ने ढंगबाट माओवादीको नेतृत्वमा जनयुद्ध भयो, ०६४ सालको निर्वाचनमा आम जनताको विश्वास जितेको पार्टी अहिले यो अवस्थामा आइपुगेको छ’, उनले भने, ‘हिजो हामी कसरी बलियो भयौँ, आज किन कमजोर भयौँभनेर समीक्षा हुनेछ ।’ सम्मेलनमार्फत फरक ढंगबाट पार्टी निर्माण गर्ने संकल्प लिइने उनले बताएका छन् । क्रान्तिको नयाँकार्यभार तथा नेपाली जनताको आकांक्षा पूरा गर्न नयाँपार्टीको आवश्यकता रहेको भन्दै उनले सम्मेलनले त्यसतर्फ अविचलितरूपमा लाग्ने पार्टी निर्माण गर्ने बताए । प्रवक्ता महराका अनुसार सम्मेलनमा एक हजार ५०० बढी प्रतिनिधिको सहभागिता हुनेछ ।
सम्मेलनमा प्रदेश प्रतिनिधि ८०३, केन्द्रीय प्रतिनिधि २७, केन्द्रीय विभागबाट १०२, आयोगबाट ७५, ज्येष्ठ कम्युनिस्ट मञ्चबाट १२५, केन्द्रीय सल्लाहकारबाट १४९ र आयोजक समितिका तर्फबाट १७९ प्रतिनिधि सहभागी हुनेछन् । त्यसमा जनयुद्धका घाइते, अपांगता भएका, पूर्वजनमुक्ति सेनाबाट पाँच प्रतिशत मनोनित गरिनेछ । माओवादीले राष्ट्रिय सम्मेलनको तयारीस्वरूप यसअघि सेल, टोल, वडा, शाखा, महाशाखा, पालिका र प्रदेश सम्मेलन सम्पन्न गरिसकेको छ । पत्रकार सम्मेलनमार्फत माओवादीको प्रथम राष्ट्रिय सम्मेलनको लोगो सार्वजनिक गरेको छ । लोगोमा ‘नयाँक्रान्तिकारी विचार र पार्टी निर्माणका लागि ऐतिहासिक प्रथम राष्ट्रिय सम्मेलन’ नारा लेखिएको छ ।
लोगोभित्र विश्व कम्युनिस्ट आन्दोलनका अग्रज नेताको प्रतिक राखिएको छ । यस्तै पार्टीको झण्डा र निर्वाचन चिह्न राखिएको छ । माओवादी केन्द्रले राष्ट्रिय सम्मेलनमा कुनै तामझाम नगर्ने र विदेशी पाहुना समेत नबोलाउने जनाएको छ । राष्ट्रिय सम्मेलन र महाधिवेशन फरक हुने भएकाले सम्मेलनमा विदेशी पाहुना समेत नबोलाउने प्रवक्ता महराले बताए । ‘यो महाधिवेशन होइन, राष्ट्रिय सम्मेलन हो, यसको मुख्य काम नयाँक्रान्तिकारी विचार र पार्टी निर्माण गर्नु हो,’ उनले भने, ‘सम्मेलनमा हामी कुनै तामझाम गर्दैनौँ ।’ त्यस्तै उनले सम्मेलनमा राष्ट्रिय, अन्तराष्ट्रिय अतिथि पनि नबोलाउने बताए ।
