कास्की– सत्तारुढ नेपाली कांग्रेसका नवनिर्वाचित सहमहामन्त्री जीवन परियारले प्रमुख प्रतिपक्ष दल नेकपा (एमाले) सहितका सबै दलको सहमतिमा सरकारले संसदबाट एमसीसी पारित गराउने दावी गरेका छन् ।
सहमहामन्त्री परियारले एमसीसीले नेपालमा दिने अनुदान सहायता समृद्धि र विकासका लागि भएकाले सरकारले सबै दलहरूको सहमतिमा सो प्रस्ताव संसदबाट पारित हुने बताएका हुन् । नेपाल प्रेस युनियन, कास्कीले आइतबार पोखरामा आयोजना गरेको पत्रकार सम्मेलनमा बोल्दै उनले एमसीसीमा राष्ट्रका लागि अहित हुने कुनै पनि विषय भए त्यसलाई हटाउन आफ्नो पार्टी प्रतिवद्ध रहेको बताए ।
नेता परियारले एमसीसीको बारेमा सत्तारुढ दलहरूलाई एकढिक्का बनाएर आफ्नो पार्टीले लैजाने पनि बताए । ‘गठबन्धनमा रहेका सम्पूर्ण दलहरूलाई एक ढिक्का भएर मात्र होइन प्रमुख प्रतिपक्ष दल नेकपा एमालेको समेत सहमति गराएर मात्रै एमसीसी पास हुन्छ’ उनले भने । सहमहामन्त्री परियारले आगामी निर्वाचनमा सत्तारुढ दलहरूबीच आवश्यकताको आधारमा सहकार्य हुने बताए । त्यस्तै उनले कांग्रेस लोकतान्त्रिक र लोकतान्त्रिक मुल्यमान्यतामा विश्वास गर्ने पार्टी रहेको र विधिसम्मत ढंगले चल्ने भएकाले वडादेखि केन्द्रसम्म निर्वाचनका माध्यमबाट नेतृत्व चयन गरिएको बताए ।
उनले अहिले पार्टीमा नेतृत्व चयनको अधिवेशन गरेको र अब वैचारिक र सांगठनिक रूपमा कसरी पार्टीलाई अघि बढाउने भन्ने दस्तावेज केन्द्रीय कार्य समितिले प्रस्ताव गरेर महासमितिको भेलाबाट पारित गरेर अघि बढ्ने जनाए । उनले पार्टीभित्र विचारको बहस आवश्यक रहेकामा जोड दिँदै नेता परियारले त्यो विचारको बहस विना सैद्धान्तिक विचारमा स्पष्टता नआएसम्म पार्टीले दृष्टिकोण अगाडि बढाउन नसक्ने बताए ।
