काठमाडौं– जारी संसदको अवरोध तथा अमेरिकी सहयोग मिलेनियम च्यालेन्ज कर्पोरेसन (एमसिसी)लगायतबारे छलफल गर्न प्रधानमन्त्री शेरबहादुर देउवाले सर्वदलीय बैठक आह्वान गरेका छन् । २८ मंसिरदेखि सुरु भएको संसदको हिउँदे अधिवेशनमा प्रमुख प्रतिपक्षी दल नेकपा एमालेले अवरोध कायमै राखेपछि त्यसबारे छलफल गर्न उनले आइतबार अपराह्न ४ बजे सर्वदलीय बैठक बोलाएका हुन् ।
प्रधानमन्त्रीको सरकारी निवास बालुवाटारमा बैठक बोलाइएको प्रधानमन्त्रीका प्रेस सल्लाहकार गोविन्द परियारले जानकारी दिएका छन् । प्रधानमन्त्रीका प्रमुख स्वकीय सचिव भानु देउवाका अनुसार संसद्को गतिरोध अन्त्य गर्नका लागि बैठक बोलाइएको हो । ‘नेकपा एमालेको विरोधका कारण अघि बढ्न सकेको छैन । त्यही भएर गतिरोध अन्त्य गरेर संसद्लाई सुचारु गर्न प्रधानमन्त्रीज्यूले पहल सुरु गर्नुभएको हो । सबै दललाई पत्र पठाइसकिएको छ,’ उनले भने ।
प्रमुख सत्तासाझेदार दल नेकपा माओवादी केन्द्रका अध्यक्ष पुष्पकमल दाहालसँगको परामर्शमा प्रधानमन्त्री देउवाले बैठक बोलाएको कांग्रेस स्रोतले जनाएको छ । शुक्रबार बिहान प्रधानमन्त्री देउवा र दाहालबीच भएको भेटवार्तामा सर्वदलीय बैठक बोलाउने विषयमा छलफल भएको थियो । बालुवाटारमा भएको भेटवार्तामा संसदमा भइरहेको अवरोध हटाउन तथा एमसीसी लगायतका विषयमा छलफल गर्न सर्वदलीय बैठक बोलाएर अघि बढ्नुपर्ने विषयमा दुई नेता सहमत भएका थिए ।
अमेरिकाले एमसिसी सम्झौता अघि बढाउन सरकारमाथि निरन्तर दबाब बढाइरहेको छ । यससअघि २८ मंसिरमा अमेरिका एमसिसी बोर्डको बैठक बस्नुपूर्व एमसिसी नेपालको संसदबाट पारित गर्न अमेरिकाले नेपाल सरकारलाई चेतावनीयुक्त भाषामा सम्झाएको थियो । सोही अनुसार २८ मंसिरमा सरकारले संसदको हिउँदे अधिवेशन आह्वान गरेको चर्चा चलेको थियो । उक्त दिन एमसिसीलाई प्रतिनिधिसभाको बैठकको कार्यसूचीमा राखिएको थियो ।
उता एमसिसी बोर्डमा भने नेपालसम्बन्धका बारेमा छलफल भएको थियो । उक्त बैठकमा नेपालमा एमसिसीको बारेमा सकारात्मक ढंगले अगाडि बढेको भन्दै अझै केही समय कुर्ने बताएको थियो । नेपालले एमसिसी सम्झौता अनुमोदन गर्न प्रतिबद्धता जनाएको बैठकमा रिपोर्टिङ गरिएको थियो । अमेरिका नेपालले एमसिसी सम्झौता अनुमोदन गर्ने पूर्ण विश्वस्त देखिएको छ ।
तर, नेपालमा भने राजनीतिक दलहरूबीच मात्र होइन, सत्तारुढ दलहरूबीच पनि एकमत छैन । अघिल्लोपटक कांग्रेस र माओवादी केन्द्रको संयुक्त सरकारले नै एमसिसी सम्झौता गरेको थियो । प्रमुख सत्तारुढ घटक कांग्रेस एमसिसी सम्झौता जस्तोको तस्तै पारित गर्नुपर्ने पक्ष्ँमा छ । तर, माओवादी केन्द्र, नेकपा एकीकृत समाजवादीलगायतका दलहरू भने केही बुँदा शंसोधन गरेरमात्र पारित गर्नुपर्ने पक्षमा छन् ।
एमालेले बहिष्कार गर्ने
प्रमुख प्रतिपक्षी दल एमालेले प्रधानमन्त्री देउवाले बोलाएको सर्वदलीय बैठक बहिष्कार गर्ने भएको छ । एमालेका महासचिव शंकर पोखरेलले उक्त बैठकमा आफूहरूको सहभागिता नहुने बताएका छन् । प्रधानमन्त्रीले बोलाएको सर्वदलीय बैठकमा आफूहरूले कारबाही गरेका माधवकुमार नेपालको पनि सहभागिता हुने भएपछि एमालेले बहिष्कार गर्ने निर्णय लिएको हो ।
महासचिव पोखरेलले भने, ‘हामीले स्वीकार नगरेको दलको उपस्थिति त्यहाँ हुन्छ भने हामी सर्वदलीय बैठकमा जाँदैनौँ ।’ महासचिव पोखरेलले दलहरूबीच हुने दुई पक्षीय वार्ता र छलफलमा भने आङ्खनो पार्टीले सहभागिता जनाउने पनि जानकारी दिएका छन् । ‘हामी दुई पार्टीबीच हुने छलफल तथा संसदमा मान्यता पाएका दलहरूसँग छलफल गर्न तयार छौँ,’ उनले भने, ‘तर हामी हामीले दलको हैसियतका रूपमा नस्वीकारेको पार्टी उपस्थित हुने बैठकमा सहभागी हुन सक्दैनौँ । को–को सहभागी हुन्छन् भनेर प्रधानमन्त्रीलाई सोध्छौँ, यदि त्यस पार्टी सहभागी भए हामी सर्वदलीय बैठकमा सहभागी हुँदैनौँ ।’
