चितवन– लुम्बिनी प्रदेशका प्रमुख अमिक शेरचनले शैक्षिक संस्थालाई राजनीतिक केन्द्रका रूपमा चलाउन नहुने बताएका छन् । सप्तगण्डकी बहुमुखी क्याम्पसको प्रथम सभामा उनले व्यावहारिक र उत्पादनमूलक शिक्षमा जोड दिनुपर्ने उल्लेख गर्दै राजनीतिक आस्थाको केन्द्रका रूपमा शैक्षिक संस्था चलाउन नहुने बताए । उनले भने, ‘शैक्षिक संस्था शिक्षाको केन्द्रमा रहेर अघि बढ्नुपर्छ ।’
प्रदेश प्रमुख शेरचनले क्याम्पस स्थापनाका समयमा वामपन्थी गुरिल्ला उत्पादन गर्ने क्याम्पस भनिने गरिएको स्मरण गर्दै उनले अब त्यो तरिकाले शिक्षा क्षेत्र नचल्ने बताए । शैक्षिक संस्था राजनीतिक पार्टीको केन्द्र बन्नुहुँदैन भन्दै अहिलेको शिक्षा व्यावहारिक शिक्षा नभएका कारण बेरोजगार बढ्दै गएको बताए । प्रदेश प्रमुख शेरचनले शैक्षिक नीतिमा समस्या भएका कारण शैक्षिक क्षेत्रमा सोचे जस्तो विकास गर्न नसकिएको बताउँदै क्याम्पसलाई शिक्षाको साझा मन्दिरका रूपमा विकास गरिनुपर्ने बताए । उनले कलेजले प्राविधिक शिक्षातर्फ केन्द्रित भएर पठनपाठन गर्नुपर्ने सुझाव दिए ।
सो अवसरमा प्रतिनिधिसभा सदस्य कृष्णभक्त पोख्रेलले शैक्षिक क्षेत्रमा देखिएको समस्या समाधान गर्न राज्यले शैक्षिक नीति परिवर्तन गर्नुपर्ने बताए । विसं २०४५ मा स्थापना भएको सो क्याम्पसले ३३ वर्षपछि पहिलो क्याम्पससभा गरेको हो । क्याम्पस अहिले पनि नारायणी माविको जग्गामा सञ्चालन हुँदै आएको छ । क्याम्पसले भोग चलन गरेको जग्गा अर्काको नाममा हुँदा राज्यबाट पाउने सेवा सुविधा पाउन नसकिएको सभामा बोल्नेले वक्ताले बताएका थिए ।
कार्यक्रममा वाग्मती प्रदेश श्रम, रोजगार तथा यातायातमन्त्री घनश्याम दाहाल, क्याम्पस सञ्चालक समितिका अध्यक्ष टेकबहादुर थापा, उपाध्यक्ष बालकृष्ण पौडेललगायतले शिक्षाको विविध पक्षमाथि विचार राखेका थिए । सभाले पाँच सदस्यीय सञ्चालक समिति चयन गर्नेछ । अन्य समिति पहिलो बैठकले चयन गर्ने सो अवसरमा जानकारी दिइयो ।
