काठमाडौं– अमेरिकाले आफ्नो सहयोग परियोजना मिलिनियम च्यालेन्ज कर्पोरेसन (एमसिसी) नेपालले संसदबाट पास गर्ने अपेक्षा व्यक्त गरेको छ । आफूले दिएको समय गुज्रिसकेको सन्दर्भमा पनि नेपालले संसदबाट एमसिसी पास भई कार्यान्वयनमा जाने आसा व्यक्त गरेको हो । नेपालले अनुमोदन गर्ने अपेक्षासहित संसदबाट पारित गर्न नेपाललाई अझै केही समय दिने भएको छ । मंगलबार बसेको एमसिसी बोर्ड बैठकले नेपाललाई सम्झौता पारित गर्न समयसीमा नतोकेसँगै नेपालले थप समय पाएको हो । यसअघि मंगलबारसम्म संसदबाट पारित गर्न दबाब दिएको एमसिसी बोर्डले पछिल्लो बैठकबाट भने समयसीमा हटाएको हो ।
मंगलबार बसेको एमसिसी बोर्ड बैठकले सम्झौता पारित गर्न समय सीमा तोक्ने वा अनुदान फिर्ता लैजाने निर्णय गर्ने अनुमान गरिएको थियो । तर, सञ्चालक समितिको चौमासिक बैठकमा चाँडै नै कम्प्याक्टलाई संसदबाट अनुमोदन गर्ने प्रतिवद्धता नेपाल सरकारबाट आएको जानकारी गराइएको र त्यसतर्फ ध्यान दिइएको एमसिसी मुख्यालयले जनाएको हो । सोही दिन नेपालमा प्रतिनिधिसभा बैठक डाकिएको थियो । एमसिसी पक्षधरहरूले सोही दिन नेपाल सरकारले एमसिसी सम्झौता संसदबाट अनुमोदन नभए एमसिसीले पनि तत्काल सहायता फिर्ता लिने भन्दै दबाब बढाएका थिए । तर, सो दिन नेपालको संसद बैठक एमसिसीका विषयमा प्रवेश नै गरेन । एमसिसी सञ्चालक समितिले पनि नेपालले सम्झौता अझै संसदबाट पारित गर्ने आसा राख्दै बैठक टुंग्याएको हो ।
पछिल्लो समय काठमाडौं आएका अमेरिकी सहायक विदेश मन्त्री डोनाल्ड लुले पनि अरू मुलुकहरूले अनुदानका लागि कुरिरहेकाले नेपालले धेरै ढिला गर्न नहुने बताएका थिए । काठमाडौंमा भएका परामर्शहरूमा केही विज्ञले राष्ट्रिय सहमति जुटाउन नेपाललाई समय लाग्ने भएकाले एमसिसीबारे तत्काल ठोस निर्णय नगर्न अमेरिकी अधिकारीहरूलाई सुझाव दिएका थिए । मंगलबारको एमसिसी बोर्ड बैठकले नेपाल सम्झौतामा भएका पछिल्ला अपडेटहरूबारे छलफल गरेको र सरकारले छिट्टै संसदबाट सम्झौता पारित गर्ने भनेको कुरालाई नोटमा लिएको बैठकपछि जारी विज्ञप्तिमा उल्लेख गरिएको छ ।
