काठमाडौं– नेकपा एमालेका अध्यक्ष केपी ओलीले तत्कालीन राजा ज्ञानेन्द्र शाह र माओवादी अध्यक्ष पुष्पकमल दाहालबीच सहमति भएर १९ माघको घटना भएको दाबी गरेका छन् । दाहालसँगको साँठगाँठकै कारण शाहले १९ माघको दिन शासनसत्ता हातमा लिएको उनको दाबी छ । बुधबार एमालेका मनोनित केन्द्रीय सदस्यहरूलाई च्यासलस्थित तुलसीलाल स्मृति प्रतिष्ठानमा शपथ गराउने कार्यक्रमलाई सम्बोधन गर्दै उनले भने, ‘प्रचण्ड र ज्ञानेन्द्रबीचमा सहमति भएर त्यो उपद्रो भएको थियो ।’
उनले उक्त सहमति के थियो भन्ने जनतालाई थाहा दिनुपर्ने माग गरेका छन् । उनले भने, ‘के सहमति भएको थियो, कसका विरुद्ध सहमति भएको थियो ? त्यो प्रचण्ड र ज्ञानेन्द्रले भन्नुप¥यो नि ।’ उनले शाह र दाहालबीच पाँचबुँदे सहमति भएको दाबी गर्दै उक्त सहमति सार्वजनिक हुनुपर्ने माग गरे । १९ माघमा शाहले सत्ता हातमा लिँदै दलहरूमाथि प्रतिबन्ध लगाएर प्रत्यक्ष शासन सुरू गरेका थिए । ओलीले त्यही सहमतिपछि शाहले माओवादीको बिनाकुनै अवरोध अभिनन्दन कार्यक्रम गर्न पाएको बताएका छन् । ओलीको प्रश्न छ, ‘त्यही सहमतिपछि अभिनन्दन कार्यक्रम चलाइयो । हामी रुकुम, रोल्पा जान नसक्ने, ज्ञानेन्द्र खुलुमखुल्ला जान सक्ने कसरी भयो ?’
उनले अगाडि भने, ‘यहीँ काठमाडौंमा हामीले देख्यौँ, थापाथलीदेखि हिँडेर मंगलबजारसम्म उधुम स्वागत, को थिए स्वागत गर्नेहरू ? कसरी युवाशक्तिलाई दुरूपयोग गरियाथ्यो ? कसरी गुमराहमा पारिएको थियो ?’ दाहालले बाहिर क्रान्ति र राष्ट्रियताको कुरा गर्ने तर भित्रभित्र प्रतिक्रियावादी शक्तिसँग साँठगाँठ गरेको ओलीले आरोप लगाए । त्यसको सिकार नेपाल भएको र त्यसको मार अहिले आफूहरूले खाइरहेको ओलीले बताए । ‘बाहिर क्रान्तिको कुरा, बाहिर राष्ट्रियताका कुरा, बाहिर एक खालका परिवर्तनका कुरा, भित्रभित्र प्रतिक्रियावादी साँठगाँठ,’ ओलीले भने, ‘यसको सिकार नेपाल हुने ग¥यो र हामी अहिले पनि त्यसको मार खाइरहेका छौँ ।’
दाहाल र नेपाल अस्थिरताका संवाहक
अध्यक्ष ओलीले माओवादी केन्द्रका अध्यक्ष दाहाल र नेकपा एकीकृत समाजवादीका अध्यक्ष माधवकुमार नेपाललाई अस्थिरताका संवाहकको संज्ञा दिएका छन् । नेपालमा अस्थिरता मच्चाउन खोज्ने नियन्त्रित शक्तिहरू सक्रिय रहेको र त्यसका संवाहक दाहाल र नेपाल रहेको आरोप ओलीले लगाए । उनले भने, ‘नियन्त्रित अस्थिरताका संवाहक शक्तिहरू यहाँ छन् । अहिले ती शक्तिहरूमा सबभन्दा चर्को गरी चल्ने प्रचण्ड एण्ड कम्पनी, माकुने एण्ड कम्पनी । सबभन्दा अहिले अस्थिरताका सम्बाहक तत्वहरू यिनीहरू नै हुन् । कुनै भ्रम राख्नु पर्दैन ।’
कतिपयले अझै पनि कम्युनिस्ट एकताको कुरा गरिरहेको भन्दै ओलीले भने, ‘त्यस्ताहरूसँग एकता ? अस्थिरताका शक्तिहरूसँग एकता गरेर कहाँ पुगिन्छ ? त्यो एकीकरण सम्भव नै छैन ।’ उनीहरूको सम्बन्ध कहाँ छ भन्ने कुरा आफूले राम्ररी चिनिसकेको ओलीले बताए । उनले भने, ‘हामीले राम्ररी चिनिसकेका छौँ यिनीहरूको कनेक्सन कहाँ छ, तार कहाँ जोडिएको छ, कहाँबाट स्वीच अन अफ हुन्छ, त्यो हामीले देख्या छौँ । छर्लंग देख्या छौँ ।’
बार्गेनिङका लागि दाहालको नेतृत्वमा जनयुद्ध सुरु गरेको दाबीसमेत ओलीले गरेका छन् । दाहाल एक ‘मामुली कर्मचारी’ भएको भन्दै उनले धोकापूर्ण ढंगले उनी महान् नेताको रूपमा प्रस्तुत भएकोसमेत बताए । ‘नेपालमा जनयुद्ध नामको गतिविधि सफल हुँदैनथ्यो किनभने त्यो सफल गर्न सुरु गरेकै होइन,’ ओलीले भने, ‘त्यो त बार्गेनिङका लागि लगाम आफ्नो हातमा राख्ने विधि हो ।’ त्रसित, अशान्त, अस्तव्यस्त बनाइदिने र आफ्नो दुनो सोझ्याउने नीतिअन्तर्गत जनयुद्ध सुरु गरेको भन्दै उनले, के गर्न खोजिएको हो भन्ने कुरा जनताले बुझ्नै नसकेको बताए । उनले भने, ‘महान् क्रान्तिको सेन्टिमेन्ट त्यतातिर लगियो, बुझ्न उनीहरूले सकेनन्, के गर्न खोजिँदै छ र मामुली कर्मचारीहरू, मामुली पेड मान्छेहरू महान् नेताको रूपमा प्रस्तुत भए ।’
ओलीले सेयर कारोबारीले चन्दा नदिएकाले दाहालले सेयरबजारबारे टिप्पणी गरेको आरोपसमेत लगाएका छन् । ‘प्रचण्डले सेयरबजारका बारेमा बडो क्रान्तिकारी भएर बोलेछन्, साम्राज्यवाद विकसित भएपछि सेयर बजारमा जान्छ भनेछन्,’ ओलीको भनाइ छ, ‘लेनिनभन्दा दुई कदम अघि बढेर नयाँ सिद्धान्त ल्याए छन् । कुन सेयर कारोबारीले चन्दा दिएन छन्, अनि त्यसविरुद्ध बोले । न रहे बाँस, नबजे बाँसुरी ।’
‘लेनिनले पुँजीवाद विकास भएर साम्राज्यवाद हुन्छ भनेका थिए । प्रचण्डले त्योभन्दा बढ्दा जान्ने भएर सेयर बजार साम्राज्यवादको विकसित रूप हो भनिदिए,’ ओलीले भने, ‘त्यसबाट सेयरमा लगानी गर्ने जनताको जीवन के असर पर्छ कुनै मतलब छैन । कुन सेयर कारोबारीले चन्दा दिएन होला । अब म ध्वस्त पारिदिन्छु भनेर उनले त्यस्तो भनिदिए ।’ ओलीले नेपाली कांग्रेसलक्षित टिप्पणी पनि गर्न छुटाएनन् । उनले जहिले पनि नेपाली कांग्रेसले गलत तत्वसँग साँठगाँठ गरेको आरोप लगाए । ‘नेपाली कांग्रेसले अहिलेसम्म खराब तत्वसँग साँठगाँठ गर्ने र वामपन्थी परिवर्तनकारीका विरुद्धमा उभिने ग¥यो,’ उनको भनाइ छ, ‘यो पहिलोदेखि अहिलेसम्म भएको छ । नेपाली कांग्रेसले प्रतिगामीहरूसँग साँठगाँठ गर्ने काम छाडोस् ।’
