काठमाडौं– नेपाली कांग्रेसको उपसभापतिमा पूर्णबहादुर खड्का र धनराज गुरुङ निर्वाचित भएका छन् । नेपाली कांग्रेसको १४औँ महाधिवेशनमा उपसभापति पदका लागि भएको निर्वाचनमा खड्का र गुरुङ विजयी भएका हुन् ।
बुधबार राति अबेर प्राप्त मत परिणाम अनुसार सभापति शेरबहादुर देउवा पक्षका उम्मेदवार खड्का र शेखर कोइराला पक्षका उम्मेदवार गुरुङ निर्वाचित भएका छन् । देउवा पक्षका उम्मेदवार विजयकुमार गच्छदार दुई मतान्तरले पराजित भएका छन् । खड्का सभापति निर्वाचित शेरबहादुर देउवा प्यानलका उम्मेदवार हुन् भने गुरूङ शेखर कोइराला समूहका नेता हुन् । दुई जना उपसभापतिका लागि सात जना उम्मेदवारबीच प्रतिस्पर्धा भएको थियो । विजय गच्छदार तेस्रो स्थानमा रहेका छन् । अन्तिम परिणाम अनुसार खड्काले २०७६ र गुरुङले १८६९ मत पाएर विजयी भएका छन् । तेस्रोमा विजयकुमार गच्छदारले १८६१ मत प्राप्त गरेका छन् भने चौँथोमा डा. चन्द्र भण्डारीले १५५१ मत ल्याएका छन् ।
नेपाली कांग्रेसका उपसभापतिका उम्मेदवार विजय गच्छदारले बुधबार साँझ भएको मत परिणामप्रति असहमति जनाएका छन् । गच्छदार पुनः मतगणना हुनुपर्ने मागसहितको निवेदन लिएर कांग्रेस केन्द्रीय कार्यालयमा गएका हुन् । कोइराला प्यानलका गुरुङ विजयी भएपछि गच्छदारले पुनः मतगणनाको माग गरेका हुन् । यसअघि गुरुङले पनि सय मत पुनः गणना गराएका थिए । कोइराला पक्षका गुरुङसँग झिनो मतान्तरले पराजित भएको जानकारी पाएपछि उनले आफू मतगणना स्थलमा नै आउने भनी आफ्ना प्रतिनिधिलाई जानकारी गराएका छन् । निर्वाचन समिति स्रोतका अनुसार गच्छदार मतगणनास्थल पार्टी कार्यालयमा आउँदै गरेकाले यो समाचार तयार पार्दासम्म परिणामको आधिकारिक घोषणा गरिएको छैन ।
