काठमाडौं– नेपाली कांग्रेसको १४औँ महाधिवेशनअन्तर्गत सोमबार नेतृत्व चयनका लागि मतदान सम्पन्न भएको छ । सोमबार बिहान ८ बजेदेखि नै मतदानको समय तोकिए पनि चार घन्टा ढिलो गरी मध्याह्न १२ बजेदेखि मात्र मतदान सुरु भएको थियो । मतपत्र छपाइमा भएको ढिलाइ तथा अन्य प्राविधिक कारणले मतदान निर्धारित समयभन्दा ढिलो सुरु भएको निर्वाचन समितिले जनाएको छ । मतदान चलिरहेकै समयमा पनि मतपत्र सकिएपछि केहीबेर मतदान रोकिएको थियो ।
मत हाल्न लाइनमा बसेका प्रतिनिधिहरूलाई मतपत्र सकिएको भन्दै कुराइएपछि उनीहरूले केहीबेर नाराबाजीसमेत गरेका थिए । यसअघि निर्वाचन समितिले सोमबार साँझ ५ बजेसम्म मतदानको समय तोके पनि ढिलो गरी सुरु भएकाले राति ९ बजेसम्म मतदानको समय थप गरिएको थियो । कांग्रेसको नेतृत्व चयनका लागि सोमबार भएको मतदानमा एक सय ३२ पदका लागि ४८७ उम्मेदवार चुनावी प्रतिस्पर्धामा गरेका थिए । कांग्रेसले मतदानका लागि राष्ट्रियसभा गृहमा एक स्थान र भृकुटीमण्डपमा दुई स्थानमा मतदानको व्यवस्था गरेको थियो ।
निर्वाचन समितिका अनुसार र भृकुटीमण्डपका दुई स्थानमा दुई हजार १०० र एक हजार ३०० तथा राष्ट्रिसभा गृहमा एक हजार ३०० मतदाताका लागि मतदान गर्ने प्रबन्ध मिलाइएको थियो । मतदान सम्पन्न भएलगत्तै मत गणना हुने भनिए पनि यो समाचार तयार पार्दासम्म मत गणना सुरु हुन भएको छैन । कांग्रेसका नेता कुलबहादुर गुरुङले पहिलो मत खसालेका थिए । एक जना प्रतिनिधिलाई मतदान गर्न करिब आधा घन्टा बढी समय लागेको थियो । कांग्रेस विधानअनुसार १६७ सदस्यीय कार्यसमितिमध्ये १३४ पदमा निर्वाचन हुने र बाँकी ३३ सदस्य केन्द्रीय सभापतिबाट मनोनीत हुने व्यवस्था छ । महाधिवेशनमा प्रतिनिधिको संख्या जम्मा ४ हजार ७४३ रहेको छ ।
सभापतिमा को बलियो ?
मतदान सकिएसँगै कांग्रेस नेता तथा कार्यकर्ताहरूबीच आगामी नेतृत्व कसले हत्याउने हो भन्ने विषयमा चासो र चर्चा सुरु भएको छ । सुरुमा सभापति पदको मतगणना गरिनेछ भने त्यसपछि मात्र बाँकी पदाधिकारीको मतगणना हुनेछ । यसपटक सभापति पदमा वर्तमान सभापति शेरबहादुर देउवा, नेताहरू प्रकाशमान सिंह, डा.शेखर कोइराला, विमलेन्द्र निधि र कल्याण गुरुङबीच प्रतिष्पर्धा हुँदै छ । सभापतिमा पाँच जना चुनावी मैदानमा रहेकाले पनि प्रतिष्पर्धा निकै पेचिलो हुने देखिएको छ । तर, मुख्य गरी देउवा र कोइरालाबीच द्विपक्षीय प्रतिस्पर्धा हुने सबैले आँकलन गरिरहेका छन् । उनीहरूमध्ये को अगाडि छ भन्न सकिने स्थिति छैन । यद्यपि, एकथरि विश्लेषणअनुसार यदि देउवाले पहिलो चरणमा चुनाव जितेनन् भने दोस्रो चरणमा शेखरले खेल उल्टाउन सक्छन् ।
कांग्रेस विधानअनुसार सभापतिमा निर्वाचित हुन खसेको मतको बहुमत अर्थात ५१ प्रतिशत प्राप्त गर्नुपर्ने हुन्छ । यदि त्यसो भएन भने नयाँ सभापतिका लागि फेरि अर्को निर्वाचन गर्नुपर्ने हुन्छ । पहिलो चरणको चुनावमा पहिलो र दोस्रो सर्वाधिक मत प्राप्त गर्ने दुई उम्मेदवारले मात्रै दोस्रो चरणको चुनाव लड्न पाउने छन् । त्यसैले, दोस्रो चरणमा दुईमध्ये एक जनाले बहुमत ल्याउने निश्चितप्रायः हुन्छ ।
अघिल्लो निर्वाचनमा बल्ल दोस्रो चरणमा निर्वाचित भएका देउवा यसपटक भने पहिलो चरणमा नै ५१ प्रतिशत मत पाउने अपेक्षामा छन् । उनले सोहीअनुसार मेहनत पनि गरेका छन् ।
