काठमाडौं– काठमाडौंमा जारी नेपाली कांग्रेसको १४औँ महाधिवेशनअन्तर्गत नेतृत्व चयनका लागि सोमबार मतदान हुँदै छ । १३ पदाधिकारीसहित १३४ सदस्यीय केन्द्रीय समिति चयनका लागि मतदान हुन लागेको हो । कांग्रेस निर्वाचन समितिले सोमबार बिहान ८ बजेदेखि साँझ ५ बजेसम्म राष्ट्रिय सभागृह र भृकुटीमण्डपमा मतदान गर्ने कार्यक्रम तय गरेको छ । समितिले निर्वाचनका लागि तीन स्थानमा मतदान केन्द्र स्थापना गरेको छ । यसैगरी १ हजार १ सय बुथमार्फत मतदान गर्ने व्यवस्था मिलाएको छ ।
मतदाताको संख्या बढी भएपछि निर्वाचन समितिले तीन स्थानमा मतदान केन्द्र स्थापना गरेको महाधिवेशन मिडिया सेन्टरका संयोजक सुरेश आचार्यले जानकारी दिएका छन् । महाधिवेशनस्थल राष्ट्रिय सभागृहमा पार्टी केन्द्रीय कार्यसमिति, जनसम्पर्क समिति, भ्रातृ÷शुभेच्छुक संघसंस्था, कर्णाली प्रदेश र लुम्बिनी प्रदेशका मतदाताका लागि मतदान गर्ने व्यवस्था तोकिएको छ । उनका अनुसार भृकुटीमण्डपको प्रांगणमा प्रदेश २ र गण्डकी प्रदेशका मतदाताका लागि मतदान गर्ने व्यवस्था गरिएको छ भने भृकुटीमण्डपको हलमा प्रदेश १, वाग्मती र सुदूरपश्चिम प्रदेशका महाधिवेशन प्रतिनिधिका लागि मतदान गर्ने व्यवस्था मिलाइएको छ । निर्वाचनमा २९ प्रकारका मतपत्रको व्यवस्था गरिएको छ । सबै मतपत्रका लागि अलग–अलग मतपेटिकाको व्यवस्था गरिएको समितिले जनाएको छ । मतदान गर्नका लागि राष्ट्रिय सभागृहमा २९३, भृकुटीमण्डप प्रांगणमा २९३ बुथ र भृकुटीमण्डपको हलमा ५१४ बुथ राखिने छ ।
अन्तिम नामावली प्रकाशन
कांग्रेस निर्वाचन समितिले आइतबार उम्मेदवारको अन्तिम नामावली प्रकाशन गरेको छ । जसअनुसार सभापति पदमा पाँचजना बीच प्रतिष्पर्धा हुनेछ । यसअघि सभापति पदमा उम्मेदवारी दिएका युवराज न्यौपानले अर्का प्रत्यासी डा.शेखर कोइरालालाई समर्थन गर्दै उम्मेदवारी फिर्ता लिएका छन् । अब सभापति पदमा डा. कोइरालासहित वर्तमान सभापति एवं प्रधानमन्त्री शेरबहादुर देउवा, प्रकाशमान सिंह, विमलेन्द्र निधि र कल्याण गुरुङबीच प्रतिष्पर्धा हुनेछ ।
निर्वाचन समिति दिएको समयसीमाभित्र सहमहामन्त्री पदका उम्मेदवार सुरेन्द्र चौधरीले पनि उम्मेदवारी फिर्ता गरेका छन् । पदाधिकारीका अन्यको भने उम्मेदवारी कायम छ । त्यस्तै, केन्द्रीय सदस्य पदका विभिन्न क्लस्टरमा उम्मेदवारी दिएका ५५ जनाले पनि उम्मेदवारी फिर्ता लिएका छन् । सोमबार उपसभापति पदमा दुई सिटका लागि सात जना, दुई महामन्त्री पदका लागि छ, सहमहामन्त्रीतर्फ महिला एक सिटका लागि दुई जना, दलित एक सिटका लागि तीन, आदिवासी जनजाति एक सिटका लागि दुई, खस आर्य एक सिटका लागि दुई, मधेसी एक सिटका लागि तीन, मुस्लिम एक सिटका लागि दुई, थारु एक सिटका लागि दुई र पिछडिएको क्षेत्र एक सिटका लागि तीन जनाबीच प्रतिस्पर्धा हुने छ । त्यस्तै, केन्द्रीय सदस्य खुला ३५ सिटका लागि ९९, केन्द्रीय सदस्य महिला खुला नौ सिटका लागि ३० जनाबीच प्रतिस्पर्धा हुने भएको छ ।
प्रदेशतर्फ महिला एक जना र खुलातर्फ दुई जना निर्वाचित हुने विधानको व्यवस्था छ । सोहीअनुसार प्रदेश १ महिलामा तीन, खुलामा सात जनाबीच अन्तिम प्रतिस्पर्धा हुनेछ । प्रदेश २ मा महिला एक सिटका लागि दुई जनाबीच प्रतिस्पर्धा हुनेछ भने खुलातर्फ आनन्दप्रसाद ढुंगाना र रमेश रिजाल निर्विरोध निर्वाचित भएका छन् । वाग्मती प्रदेशमा महिलाका लागि तीन जना, खुलातर्फ छ, गण्डकी प्रदेश महिलातर्फ दुई, खुलातर्फ चार, लुम्बिनीमा महिलातर्फ तीन, खुलातर्फ छ, कर्णालीमा महिलातर्फ दुई तथा खुलातर्फ पाँच र सुदूरपश्चिममा महिलातर्फ तीन र खुलातर्फ छ जनाबीच प्रतिष्पर्धा हुनेछ ।
